Mathais 15

Cov Yawgkoob Tej Lus Qhia

(Malakaus 7:1-13)

1Thaum ntawd cov Falixais thiab cov xibhwb uas qhia Kevcai qeeleej tuaj nram lub nroog Yeluxalees tuaj cuag Yexus thiab nug hais tias, 2“Uacas Koj cov thwjtim tsis ua rawsli peb cov yawgkoob tej lus uas ibtxwm qhia rau peb? Lawv tsis xub ntxuav tes mamli noj mov!”

3Yexus teb tias, “Nej ua rawsli tej uas nej ibtxwm ua los, tiamsis uacas nej tsis ua rawsli Vajtswv Txojlus qhia? 4Vajtswv hais tias, ‘Koj yuavtsum hwm koj niam koj txiv,’ thiab hais tias, ‘Yog leejtwg cem nws niam nws txiv, yuavtsum muab tus ntawd tua kom tuag.’ #Khiav 20:12; 2Kev 5:16; Khiav 21:17; Levi 20:9 5Tiamsis nej qhia hais tias yog leejtwg muaj ib yam dabtsi uas yuav siv los pab tau nws niam nws txiv, tiamsis nws hais tias, ‘Yam no twb muab rau Vajtswv lawm,’ 6tsis tag tus ntawd yuav hwm nws txiv#15:6: nws txiv; tej phau ntawv qub uas xuas tes sau hais tias nws niam nws txiv. lawm. Qhov uas nej ua li no yog nej ua saib tsis taus Vajtswv Txojlus kom nej thiaj ua tau rawsli tej uas nej ibtxwm ua los. 7Cov niag neeg ntsejmuag ncaj siabnkhaus! Qhov uas tus xibhwb cev Vajtswv lus, Yaxayas tau hais txog nej ntawd yeej muaj tseeb tiag!

8“ ‘Vajtswv hais tias cov neeg no lub ncauj qhuas Kuv

tiamsis lawv lub siab nyob deb Kuv heev. #Yaxaya 29:13 (LXX)

9Qhov uas lawv pehawm Kuv tsis muaj qabhau li,

rauqhov lawv muab neeg tej kevcai qhia ib yam li tej ntawd yog Kuv tej kevcai!’ ”

Tej Uas Ua Rau Neeg Tsis Huv

(Malakaus 7:14-23)

10Yexus hu cov neeg coob-coob los cuag Nws thiab hais rau lawv tias, “Nej ua tibzoo mloog Kuv hais, nej thiaj totaub! 11Tsis yog yam uas mus rau hauv neeg lub qhovncauj, ua rau neeg tsis huv, tiamsis yog yam uas tawm hauv neeg lub qhovncauj los, ua rau neeg tsis huv xwb.”

12Thaum ntawd cov thwjtim los hais rau Yexus hais tias, “Koj puas paub tias tej lus uas Koj hais ko ua rau cov Falixais chim kawg li?”

13Yexus teb tias, “Txhua tsob ntoo uas tsis yog Kuv Txiv uas nyob saum ntuj cog, yuav raug muab rho cag hlo mus povtseg huv tibsi. 14Puamchawj lawv! Lawv yog cov digmuag uas coj cov digmuag kev; yog tus digmuag coj tus digmuag kev, nkawd yeej yuav mus poob qabke xwb.” #Lukas 6:39

15Petus hais tias, “Thov Koj txhais zaj lus pivtxwv no rau peb.”

16Yexus teb cov thwjtim hais tias, “Nej tseem tsis totaub li thiab lov? 17Nej tsis paub tias yam uas nkag rau hauv neeg lub qhovncauj, yam ntawd mus rau hauv neeg lub plab, thiab tawm dhau mus lawm xwb. 18Tiamsis tej uas tawm hauv neeg lub qhovncauj los, yog tawm hauv neeg lub siab los, tej ntawd yog tej uas ua rau neeg tsis huv. #Math 12:34 19Rauqhov lub tswvyim uas xav ua kev phem, kev tua neeg, kev deev luag pojniam luag txiv, kev nkauj kev nraug, kev ua tubsab, kev ua timkhawv tsis tseeb, thiab kev rhuav lwmtus ntsejmuag, puavleej yog yam uas tawm hauv neeg lub siab los. 20Tej no yog tej uas ua rau neeg tsis huv, tiamsis qhov uas tsis ntxuav tes uantej noj mov, yeej ua tsis tau rau neeg tsis huv.”

Tus Pojniam Kana-as Kev Ntseeg

(Malakaus 7:24-30)

21Yexus tawm qhov ntawd mus rau pem cheebtsam uas ze lub nroog Thailes thiab lub nroog Xidoos. 22Muaj ib tug pojniam uas yog neeg Kana-as nyob hauv cheebtsam ntawd tuaj cuag Yexus thiab thov hais tias, “Tus Tswv, Daviv tus Tub, thov Koj hlub kuv! Kuv tus ntxhais raug ib tug dab mas nws txomnyem kawg li.”

23Tiamsis Yexus tsis teb tus pojniam ntawd ib los li. Yexus cov thwjtim thiaj los thiab thov Yexus hais tias, “Koj ciali hais kom nws khiav mus! Rauqhov nws pheej lawv peb qab thiab quaj thov li ntawd!”

24Yexus teb tias, “Vajtswv tsuas txib Kuv los nrhiav cov Yixalayees uas yog pab yaj uas ploj lawm xwb.”

25Thaum ntawd, tus pojniam ntawd txawm los txhoscaug ntua ntawm Yexus kotaw thov hais tias, “Tus Tswv, thov pab kuv!”

26Yexus teb tias, “Tsis tsimnyog uas yuav muab menyuam tej mov pov rau dev noj.” 27Tus pojniam ntawd teb tias, “Yog los mas tus Tswv, tiamsis txawm yog dev los yeej tau noj tej mov uas poob saum nws tus tswv lub rooj los thiab.”

28Yexus teb tus pojniam ntawd hais tias, “Koj yog ib tug pojniam uas muaj kev ntseeg loj heev! Koj yuav tau rawsli koj thov.” Ces lub sijhawm tamsim ntawd nws tus ntxhais txawm zoo kiag lawm.

Yexus Kho Ntau Leej

29Yexus tawm qhov chaw ntawd thiab taug ntug Hiavtxwv Kalilais, Nws txawm nce mus zaum pem roob. 30Muaj neeg coob-coob tuaj cuag Nws, lawv coj tej neeg uas tuagtes tuagtaw, digmuag, cegtawv, hais tsis tau lus, thiab cov neeg uas muaj mob ntau leej tuaj tso rau ntawm Yexus kotaw; mas Nws kho lawv txhua tus zoo huv tibsi. 31Thaum sawvdaws pom cov neeg uas hais tsis tau lus rov hais tau lus, cov neeg cegtawv rov zoo, cov neeg qhuavtes qhuavtaw rov mus taus kev, thiab cov neeg digmuag rov pomkev lawm, mas lawv xav tsis thoob li; lawv ciali qhuas cov Yixalayees tus Vajtswv.

Yexus Pub Mov Rau 4,000 Leej Noj

(Malakaus 8:1-10)

32Yexus hu Nws cov thwjtim los cuag Nws thiab hais rau lawv tias, “Kuv hlub cov neeg no heev, vim lawv twb tuaj nrog Kuv nyob tau peb hnub lawm, tamsim no lawv tsis muaj ib yam dabtsi noj li. Kuv tsis xav kom lawv ciali mus tsev uas tsis tau noj ib yam dabtsi, nyobtsam lawv lam tsausmuag ntog tom tej kev.”

33Cov thwjtim nug Yexus hais tias, “Ntawm no yog roob mojsab qhua xwb, peb yuav mus nrhiav mov qhovtwg los kom txaus cov neeg no noj?”

34Yexus nug cov thwjtim hais tias, “Nej muaj pestsawg lub ncuav?” Lawv teb tias, “Muaj xya lub ncuav thiab tus puav ntses me-me xwb.”

35Yexus hais kom sawvdaws zaum hauv pemteb. 36Ces Nws txawm muab xya lub ncuav thiab cov ntses ntawd los ua Vajtswv tsaug, muab ntais thiab cev rau cov thwjtim coj mus faib rau sawvdaws. 37Txhua tus puavleej tau noj tsau huv tibsi. Cov thwjtim mus sau tej seem uas sawvdaws noj tsis tag tau xya tawb puvnkaus. 38Cov txivneej uas tau noj zaum no muaj 4,000 leej, tsis suav cov pojniam thiab menyuam.

39Yexus txawm kom sawvdaws rov mus tsev, ces Nws txawm nce nkoj mus rau tim cheebtsam Mankadas lawm.

Currently Selected:

Mathais 15: MWW2022

Highlight

Copy