Mathais 14

Yauhas Tus Uas Muab Neeg Ua Kevcai Rausdej Kev Tuag

(Malakaus 6:14-29; Lukas 9:7-9)

1Lub sijhawm ntawd, tus Helauj uas kav lub xeev Kalilais hnov txog Yexus lub moo. 2Nws txawm hais rau nws cov nomtswv hais tias, “Tus no yeej yog Yauhas tus uas muab neeg ua kevcai rausdej xwb, nws tau sawv rovqab los lawm ntag! Yogli ntawd, nws thiaj muaj lub hwjchim no ua tau tej txujci tseemceeb.”

3Uantej ntawd Helauj tau txib neeg mus ntes Yauhas, muab nws khi thiab coj mus kaw rau hauv tsev lojcuj. Helauj ua li ntawd twb yog Helauj yuav Helaudias uas yog nws tus kwv Filiv tus pojniam. #Lukas 3:19-20 4Rauqhov Yauhas tus uas muab neeg ua kevcai rausdej pheej hais rau Helauj hais tias, “Koj tsis muaj cai yuav Helaudias los ua koj tus pojniam!” #Levi 18:16; 20:21 5Helauj xav tua Yauhas, tiamsis nws ntshai cov Yudais, rauqhov sawvdaws ntseeg tias Yauhas yog ib tug xibhwb cev Vajtswv lus.

6Thaum txog Helauj hnub yug, Helaudias tus ntxhais los seevcev rau sawvdaws saib, ua rau Helauj txaussiab heev, 7Helauj thiaj coglus rau tus ntxhais ntawd hais tias, “Kuv coglus rau koj hais tias koj thov yam twg, kuv yuav muab yam ntawd rau koj!”

8Nws niam twb rau tswvyim rau nws lawm, nws thiaj hais tias, “Kuv xav kom koj muab Yauhas tus uas muab neeg ua kevcai rausdej lub taubhau tso rau hauv lub phaj nqa los rau kuv tamsim no!”

9Vajntxwv nyuajsiab kawg li, tiamsis vim nws tau coglus tabmeeg sawvdaws lawm, nws thiaj hais kom lawv mus ua rawsli tus ntxhais tau thov. 10Ces nws txawm txib neeg mus txiav Yauhas cajdab hauv tsev lojcuj. 11Lawv muab Yauhas lub taubhau tso rau hauv lub phaj nqa los rau tus ntxhais, ces tus ntxhais nqa mus rau nws niam. 12Yauhas cov thwjtim thiaj tuaj muab nws lub cev coj mus faus; thiab lawv mus qhia tej no rau Yexus paub.

Yexus Pub Mov Rau 5,000 Leej Noj

(Malakaus 6:30-44; Lukas 9:10-17; Yauhas 6:1-14)

13Thaum Yexus hnov xov txog Yauhas, ces Nws txawm caij nkoj tawm qhov ntawd mus rau ib qhov chaw uas nyob ntsiagto. Thaum sawvdaws hnov li ntawd ces lawv txawm tawm hauv lawv tej nroog thiab taug kev raws Nws qab mus. 14Thaum Yexus tawm hauv nkoj los, Nws pom muaj neeg coob-coob, Nws hlub lawv kawg li, thiab Nws kho lawv zoo mob huv tibsi.

15Thaum yuav tsausntuj, Nws cov thwjtim los hais rau Nws hais tias, “Twb lig-lig lawm, thiab ntawm thaj chaw no tsis muaj dabtsi li; yuav tau hais kom sawvdaws mus nrhiav yuav mov tom tej zos rau lawv noj.”

16Yexus teb tias, “Tsis txhob kom lawv mus, nej ciali nrhiav rau lawv noj!”

17Cov thwjtim teb tias, “Peb tsuas muaj tsib lub ncuav thiab ob tug ntses xwb.”

18Yexus hais tias, “Ciali muab los rau Kuv.” 19Yexus hais kom sawvdaws zaum ntawm tej nyom; ces Nws txawm muab tsib lub ncuav thiab ob tug ntses los, Nws tsa qhovmuag saib rau saum ntuj thiab ua Vajtswv tsaug. Nws muab cov ncuav ntais cev rau cov thwjtim ces cov thwjtim txawm nqa mus faib rau sawvdaws. 20Txhua tus puavleej tau noj tsau huv tibsi. Cov thwjtim mus sau tej seem uas sawvdaws noj tsis tag tau kaum-ob tawb puvnkaus. 21Cov uas tau noj mov ntawd, cov txivneej xwb yog muaj kwvlam li 5,000 leej, tsis suav cov pojniam thiab menyuam.

Yexus Mus Saum Nplaimdej

(Malakaus 6:45-52; Yauhas 6:15-21)

22Tamsim ntawd Yexus txawm hais kom cov neeg sawvdaws rov mus tsev, thiab hais kom cov thwjtim nce nkoj thiab caij hla hiavtxwv uantej mus rau sab tim ub. 23Thaum cov neeg mus tag lawm, Yexus tibleeg txawm nce mus thov Vajtswv pem roob. Thaum tsausntuj lawm los Nws tseem nyob Nws ib leeg pem roob. 24Lub sijhawm ntawd lub nkoj twb mus deb rau tom hiavtxwv lawm. Cua ntsawj hlob heev ua rau dej ntas tej niag nthwv tuaj ntaus lub nkoj.

25Kwvlam li thaum peb teev mus rau rau teev yav yuav kajntug ntawd, Yexus txawm mus kotaw saum nplaimdej los cuag cov thwjtim. 26Thaum lawv pom Nws mus kotaw saum nplaimdej, lawv ntshai kawg li, lawv qw hais tias, “Dab 'auj!”

27Tamsim ntawd Yexus hais rau lawv tias, “Txhob poobsiab! Yog Kuv xwb, tsis txhob ntshai!”

28Petus hais tias, “Tus Tswv, yog tias yog Koj tiag, thov Koj hais kom kuv mus kotaw saum nplaimdej los cuag Koj.”

29Yexus teb tias, “Los maj!” Petus txawm tawm hauv lub nkoj thiab pib rhais ruam saum nplaimdej mus rau ntawm Yexus. 30Tiamsis thaum Petus pom cua ntsawj hlob heev nws txawm ntshai, ces nws ciali pib tog rau hauv dej. Nws thiaj hu nrov-nrov hais tias, “Tus Tswv, thov cawm kuv!”

31Tamsim ntawd Yexus txawm cev loo tes mus tuav nkaus Petus thiab hais tias, “Uacas koj kev ntseeg yuav me ualuaj li! Uacas koj tsis ntseeg?”

32Thaum nkawd nce mus rau hauv lub nkoj, ces cua txawm tu zujzus lawm. 33Cov thwjtim uas nyob hauv lub nkoj txawm txhoscaug ntua hawm Yexus thiab hais tias, “Koj yog Vajtswv tus Tub tiag lau!”

Yexus Kho Mob Hauv Nkenexales

(Malakaus 6:53-56)

34Yexus thiab Nws cov thwjtim caij nkoj hla hiavtxwv mus txog tim Nkenexales. 35Thaum cov neeg uas nyob ntawd paub tias yog Yexus, lawv txawm xa xov mus qhia rau cov neeg uas nyob puagncig cheebtsam ntawd kom coj cov neeg muaj mob tuaj cuag Nws. 36Lawv thov kom Nws cia cov neeg muaj mob ntawd kov Nws lub tw tsho; txhua tus uas tau kov lawd puavleej zoo huv tibsi.

Currently Selected:

Mathais 14: MWW2022

Highlight

Copy