Mathais 11

Yauhas Tus Uas Muab Neeg Ua Kevcai Rausdej Cov Thwjtim

(Lukas 7:18-35)

1Thaum Yexus qhia Nws kaum-ob tug thwjtim tag lawm, Nws txawm tawm qhov ntawd mus cobqhia thiab qhuabqhia rau hauv tej nroog uas nyob ze ntawd.

2Thaum Yauhas tus uas muab neeg ua kevcai rausdej raug kaw rau hauv tsev lojcuj hnov txog tej uas Khetos niajhnub ua, nws txawm txib nws cov thwjtim qeeleej mus cuag Yexus. 3Lawv tuaj nug Yexus hais tias, “Thov Koj qhia rau peb seb Koj puas yog tus uas Yauhas hais tias yuav los ntawd, lossis peb tseem yuav tos dua lwmtus?”

4Yexus teb tias, “Nej ciali rov mus qhia tej uas nej hnov thiab nej pom rau Yauhas hais tias 5cov neeg digmuag twb pomkev lawm, cov neeg tuag ceg twb mus taus kev lawm, cov neeg mob ruas#11:5: mob ruas: lus Kilis siv lolus no rau ntau yam kab mob uas yog mob phem-phem rau ntawm daim tawv nqaij, kuj yuav tsis yog kiag mob ruas thiab. twb zoo lawm,#11:5: zoo lawm: saib 8:2. cov neeg lagntseg twb hnov lus lawm, cov neeg tuag twb sawv rov los muaj txojsia, thiab Txoj Moo Zoo twb raug qhia rau cov neeg txomnyem lawm. #Yaxaya 35:5-6; Yaxaya 61:1 6Tus uas ntseeg Kuv, tus ntawd muaj kev zoosiab.”

7Thaum Yauhas cov thwjtim tabtom sawvkev rovqab mus, Yexus txawm qhia txog Yauhas rau cov neeg coob-coob ntawd tias, “Thaum nej mus cuag Yauhas tom roob mojsab qhua, nej xav tias nej mus saib dabtsi? Nej mus saib tus lojkov uas cua ntsawj rawv mus rawv los no lov? 8Nej mus saib dabtsi? Nej mus saib tus neeg uas hnav tej tsoostsho zoo-zoo no lov? Cov neeg uas hnav zoo-zoo ntawd tsuas yog cov uas nyob hauv tej vajloog xwb! 9Nej qhia rau Kuv seb, nej mus saib dabtsi? Nej mus saib ib tug xibhwb cev Vajtswv lus puas yog? Yog lawm, tiamsis tus uas nej pom ntawd nws tseem muaj hwjchim loj dua ib tug xibhwb cev Vajtswv lus thiab. 10Tus Yauhas no yog tus uas Vajtswv Txojlus twb xub qhia tseg lawm hais tias, ‘Vajtswv hais tias, Kuv yuav txib Kuv tus tubtxib ua Koj ntej mus kho kev tos Koj.’ #Mlakis 3:1

11“Kuv qhia tseeb rau nej hais tias, cov neeg uas yug ntawm pojniam los, tsis tau muaj dua ib tug uas loj tshaj Yauhas tus uas muab neeg ua kevcai rausdej no. Tiamsis tus uas yau kawg nkaus hauv Vajtswv lub Ntuj Ceebtsheej tseem loj tshaj Yauhas thiab. 12Txij thaum Yauhas qhuabqhia los txog rau niajhnub no, Vajtswv lub Ntuj Ceebtsheej tau raug tawmtsam hnyav heev#11:12: muaj cov neeg uas tawmtsam hnyav heev; lossis muaj kev tawmtsam. thiab muaj cov neeg uas uanruj uatsiv txeeb lub Ntuj Ceebtsheej ntawd. #Lukas 16:16 13Txhua tus xibhwb cev Vajtswv lus thiab Mauxes txoj Kevcai yeej qhia zaj no los txog ntua rau Yauhas; 14yog nej ntseeg li Kuv hais, ces tus Yauhas no lau yog Eliyas, tus uas tau hais tseg lawm tias yuav los. #Mlakis 4:5; Math 17:10-13; Malak 9:11-13 15Yogli ntawd, leejtwg muaj pobntseg ciali mloog!

16“Kuv yuav muab cov neeg tiam no piv rau dabtsi? Lawv zoo ib yam li tej menyuam yaus uas zaum hauv tej kiab. Pab no hu rau pab tod tias, 17‘Peb twb tshuab raj noj tshoob lawm, tiamsis nej yeej tsis seevcev li! Peb twb hu tej nkauj tuag lawm, tiamsis nej yeej tsis quaj li!’ 18Thaum Yauhas los, nws ua kevcai yoo mov thiab nws tsis haus cawv txivhmab, los sawvdaws hais tias, ‘Nws raug ib tug dab lawm!’ 19Neeg Leejtub los, Nws noj thiab haus, sawvdaws ho hais tias, ‘Nej saib seb, tus neeg no noj loj haus ntau, Nws nrog cov neeg sau se thiab cov neeg txhaum ua phoojywg!’ Tiamsis Vajtswv lub tswvyim yeej muaj tseeb thaum tes haujlwm ntawd tiav.”

Tej Nroog Uas Tsis Ntseeg

(Lukas 10:13-15)

20Yexus txawm cem cov neeg uas nyob hauv tej nroog uas Nws tau mus ua txujci tseemceeb ntau zaus lawm, rauqhov lawv tsis kam tso lawv tej kev txhaum tseg. 21“Lub nroog Khaulaxees, koj yuav raug kev puastsuaj lau! Lub nroog Npexaidas, koj yuav raug kev puastsuaj lau! Kheevlam tej txujci tseemceeb uas tau ua rau neb pom lawm, yog ua nyob rau hauv lub nroog Thailes thiab lub nroog Xidoos, ces ntshe cov neeg uas nyob hauv ob lub nroog ntawd twb xub muab hnabtsaj los npua thiab tsuab tshauv nphoo lawv ibce, qhia hais tias lawv twb tso lawv tej kev txhaum tseg thaum ntxov los lawm. #Yaxaya 23:1-18; Exek 26:1—28:26; Yau 3:4-8; Amaus 1:9-10; Xekhali 9:2-4 22Kuv qhia rau neb hais tias thaum txog Hnub Txiavtxim, Vajtswv tseem yuav tabncuab cov neeg uas nyob hauv lub nroog Thailes thiab lub nroog Xidoos tshaj li uas Nws tabncuab neb!

23“Lub nroog Kapena-us, koj yuav tsav koj lub hwjchim kom siab mus txij ntuj no lov? Koj yuav raug muab pov mus rau hauv ntujtawg lau! Tej txujci tseemceeb uas tau ua rau koj pom lawm, kheevlam yog ua nyob rau hauv lub nroog Xaudoos, ces ntshe lub nroog ntawd tseem nyob los txog niajhnub no. #Yaxaya 14:13-15; Chiv 19:24-28 24Kuv qhia rau koj hais tias thaum txog Hnub Txiavtxim, Vajtswv yuav rautxim rau koj hnyav dua li nws rautxim rau lub nroog Xaudoos!” #Math 10:15; Lukas 10:12

Los Cuag Kuv Thiab So

(Lukas 10:21-22)

25Lub sijhawm ntawd Yexus hais tias, “Txiv, tus Tswv uas kav lub ntuj thiab lub ntiajteb! Kuv ua Koj tsaug rauqhov Koj tau muab tej no zais cia tsis qhia rau cov neeg muaj tswvyim thiab txawjntse paub, tiamsis Koj ho muab tej ntawd qhia rau cov neeg uas tsis txawj tsis ntse paub. 26Yog lawm, Txiv, qhov no yog qhov uas Koj yeej pomzoo kom muaj li ntawd.

27“Kuv Txiv twb muab ibpuas tsavyam rau Kuv lawm. Tsis muaj leejtwg paub Leejtub, tsuas yog Leejtxiv thiaj paub xwb, thiab tsis muaj leejtwg paub Leejtxiv, tsuas yog Leejtub thiab cov uas Leejtub pomzoo qhia rau thiaj paub xwb. #Yauh 3:35; Yauh 1:18; 10:15

28“Nej cov uas sab-sab vim ris nra hnyav, nej ciali los cuag Kuv, Kuv yuav cia nej so. 29Nej los kwv Kuv tus quab thiab kawm ntawm Kuv, rauqhov Kuv muaj lub siabzoo thiab siab mosmuag, nej thiajli tau so. #Yelemi 6:16 30Kuv tus quab yoojyim kwv, thiab Kuv lub nra sib.”

Currently Selected:

Mathais 11: MWW2022

Highlight

Copy