Mathais 1

Yexus Khetos Cov Yawgkoob

(Lukas 3:23-38)

1No yog Yexus Khetos cov yawgkoob tej npe. Yexus yog Daviv cajces uas yog Anplahas li cajces.

2-6aTxij Anplahas los txog rau Vajntxwv Daviv, cov yawgkoob muaj li no: Anplahas yog Ixaj txiv, Ixaj yog Yakhauj txiv, Yakhauj yog Yudas thiab nws cov kwvtij txiv, Yudas yog Peles thiab Xelas txiv (nkawd niam yog Tamaj), Pelej yog Hexeloos txiv, Hexeloos yog Las txiv, Las yog Aminadas txiv, Aminadas yog Nasoos txiv. Nasoos yog Xamoos txiv, Xamoos yog Npau-am txiv (Npau-am niam yog Lahaj), Npau-am yog Aunpes txiv (Aunpes niam yog Luv), Aunpes yog Yexis txiv, Yexis yog Vajntxwv Daviv txiv.

6b-11Txij Daviv los txog rau cov Yixalayees raug ntes mus rau tebchaws Npanpiloos, cov yawgkoob muaj li no: Daviv yog Xalumoos txiv (Xalumoos niam yog Uliyas tus pojniam), Xalumoos yog Lehaunpau-as txiv, Lehaunpau-as yog Anpiyas txiv, Anpiyas yog Axas txiv, Axas yog Yehausafas txiv, Yehausafas yog Yehaulaas txiv, Yehaulaas yog Uxiyas txiv, Uxiyas yog Yauthas txiv, Yauthas yog Ahaj txiv, Ahaj yog Hexekiyas txiv, Hexekiyas yog Manaxes txiv, Manaxes yog Amoos txiv, Amoos yog Yauxiyas txiv, Yauxiyas yog Yehauyakhees thiab nws cov kwvtij txiv. #2Vaj 24:14-15; 2Xwm 36:10; Yelemi 27:20

12Txij cov Yixalayees raug ntes mus rau tebchaws Npanpiloos los txog rau thaum yug Yexus, cov yawgkoob muaj li no: Yehauyakhees yog Se-atiyees txiv, Se-atiyees yog Xelunpanpees txiv, 13Xelunpanpees yog Anpius txiv, Anpius yog Eliakees txiv, Eliakees yog Axaus txiv, 14Axaus yog Xadaus txiv, Xadaus yog Akhis txiv, Akhis yog Elius txiv, 15Elius yog Ele-axas txiv, Ele-axas yog Mathas txiv, Mathas yog Yakhauj txiv, 16Yakhauj yog Yauxej txiv. Malis uas yog Yexus niam yog Yauxej tus pojniam. Yexus yog tus uas sawvdaws hu ua tus Mexiyas.

17Yogli ntawd, txij Anplahas los txog rau Daviv yog muaj kaum-plaub tiam, txij Daviv los txog cov Yixalayees raug ntes mus rau tebchaws Npanpiloos yog muaj kaum-plaub tiam, thiab txij cov Yixalayees raug ntes mus rau tebchaws Npanpiloos los txog thaum yug tus Mexiyas yog muaj kaum-plaub tiam.

Yug Yexus Khetos

(Lukas 2:1-7)

18Zaj uas Yexus Khetos los yug yog muaj li no. Yauxej twb xub qhaib Malis uas yog Yexus niam lawm. Tiamsis uantej thaum nkawd tseem tsis tau sibyuav, Malis tau xeeb Menyuam los ntawm Vaj Ntsujplig tus Dawbhuv lawm. #Lukas 1:27 19Yauxej yog ib tug neeg ncajncees, nws tsis xav cia Malis poob ntsejmuag, nws txawm xav tias nws yuav thim qhov kev qhaib ntawd thiab tso Malis twjywm tseg. 20Thaum nws tseem tabtom xav txog zaj ntawd, tus TSWV ib tug timtswv ceebtsheej tau los tshwm huv npausuav rau nws thiab hais tias, “Yauxej, uas yog Daviv li cajces, koj tsis txhob ntshai mus coj Malis los ua koj tus pojniam. Rauqhov Malis xeeb tus Menyuam ntawd yog los ntawm Vaj Ntsujplig tus Dawbhuv. 21Malis yuav yug ib tug Metub, thiab koj yuav tis Nws lub npe hu ua Yexus, rauqhov Nws yuav cawm Nws haivneeg kom lawv dim lawv lub txim.” #Lukas 1:31

22Txhua yam no tshwmsim twb yog muaj rawsli tej lus uas tus Tswv tau qhia tseg rau tus xibhwb cev Vajtswv lus lawm hais tias, 23“Ib tug ntxhais nkaujxwb yuav xeeb Menyuam thiab yuav yug ib tug Metub, thiab sawvdaws yuav hu Nws lub npe hais tias Emanuees” (uas txhais hais tias, “Vajtswv nrog peb nyob”). #Yaxaya 7:14 (LXX)

24Thaum Yauxej tsim dheev los, nws thiaj mus coj Malis los ua nws pojniam rawsli tus Tswv tus timtswv tau los hais rau nws. 25Tiamsis nws yeej tsis nrog Malis pw ua niamtxiv mus txog thaum uas Malis yug tus Metub ntawd. Yauxej tis Nws lub npe hu ua Yexus. #Lukas 2:21

Currently Selected:

Mathais 1: MWW2022

Highlight

Copy