Malakis 4

Vajtswv Hnub Twb Los Yuav Txog

1Tus TSWV uas muaj Hwjchim Loj Kawg Nkaus hais tias, “Thaum txog hnub ntawd cov neeg khavtheeb thiab cov ua phem ua qias yuav kubhnyiab yam li tej quavnyab. Hnub ntawd lawv yuav kubhnyiab tag, yuav tsis tshuav ib yam dabtsi seem li. 2Tiamsis rau cov uas hwm Kuv, Kuv lub hwjchim yuav tawm tuaj cawm nej zoo li lub hnub tawm tuaj thiab coj kev kho mob los rau nej yam li tej duab hnub. Nej yuav nyob ywjsiab thiab muaj kev zoosiab yam li tej menyuam nyuj uas khiav rag rhi tawm hauv nkuaj los noj zaub. 3Thaum txog hnub uas Kuv txiavtxim, nej yuav tsuj cov neeg ua phem; lawv yuav zoo yam li tej hmoov av hauv nej qab xibtaws.

4“Ncontsoov Kuv tus tubtxib Mauxes tej lus qhia, uas yog tej kevcai thiab tej lus xaaj uas Kuv tau muab rau nws saum Roob Xinais, kom cov Yixalayees txhua tus yuavtsum coj thiab ua rawsli ntawd.

5“Tiamsis uantej hnub uas tus TSWV txoj kev txiavtxim hnyav los txog, Kuv yuav txib tus xibhwb cev Vajtswv lus, uas yog Eliyas los rau nej. #Math 11:14; 17:10-13; Malak 9:11-13; Lukas 1:17; Yauh 1:21 6Nws yuav tig cov uas ua txiv lub siab mus rau ntawm lawv cov menyuam, thiab tig cov menyuam lub siab mus rau ntawm cov uas ua txiv; yog tsis li ntawd, Kuv yuav los thiab rhuav nej lub tebchaws kom puastsuaj mus.”

Currently Selected:

Malakis 4: MWW2022

Highlight

Copy