Malakis 3
3
1Tus TSWV uas muaj Hwjchim Loj Kawg Nkaus teb tias, “Kuv yuav txib Kuv ib tug tubtxib uantej mus kho kev tos Kuv. Thaum ntawd tus TSWV uas nej niajhnub tos yuav los rau hauv Nws lub Tuamtsev. Tus tubtxib uas nej xav pom los ntev lawm, yuav los thiab tshajtawm Kuv tej lus cogtseg.” #Math 11:10; Malak 1:2; Lukas 1:76; 7:27
2Tiamsis leejtwg yuav muaj cuabkav tiv taus hnub uas Nws los? Leejtwg yuav sawv taus thaum Nws tshwm los? Nws yuav zoo li cov tshuaj uas ntxhua khaubncaws kom dawb, thiab zoo li cov nplaimtaws uas cig hauv lub yeejvub nchuav hlau. #Yau 2:11; Tshwm 6:17 3Nws yuav los txiavtxim ib yam li tus neeg nchuav nyiaj kom tau cov tseem nyiaj. Luag nchuav nyiaj nchuav kub licas, ces tus TSWV tus tubtxib yuav los muab cov povthawj hlob ntxuav kom dawbhuv li ntawd, kom lawv thiaj yuav nqa tej khoom uas haum tus TSWV siab tuaj fij rau Nws. 4Thaum ntawd tej khoom uas cov Yudais thiab cov neeg hauv Yeluxalees nqa tuaj fij rau tus TSWV thiaj yuav ua rau Nws txaussiab li yav thaum ub.
5Tus TSWV uas muaj Hwjchim Loj Kawg Nkaus hais tias, “Kuv yuav los saib nej thiab txiavtxim rau nej. Kuv yuav ua timkhawv tawmtsam cov neeg uas txawj yeessiv, cov neeg uas ua nkauj ua nraug, cov neeg uas ua timkhawv tsis tseeb, cov neeg uas txhav nws tej tubzog li nyiaj yuav, thiab cov neeg uas ua limhiam rau tej pojntsuam, tej menyuam ntsuag, thiab cov neeg txawv tebchaws, thiab txhua tus uas tsis hwm Kuv.
Muab Ib Feem Kaum
6“Kuv yog tus TSWV, thiab Kuv yeej tsis hloov li. Yogli ntawd, nej cov uas yog Yakhauj cajces tseem tsis tau tu noob. 7Nej zoo yam nkaus li nej cov yawgkoob uas nyob uantej nej lawm. Nej tau tso Kuv tej kevcai tseg thiab yeej tsis ua rawsli tej kevcai ntawd. Nej ciali tig rov los cuag Kuv, Kuv thiaj yuav tig los cuag nej. Tiamsis nej nug hais tias, ‘Peb yuav ua licas thiaj tig tau rov los cuag Koj?’
8“Kuv nug nej tias, puas tsimnyog ib tug tibneeg twg txhav Vajtswv tug? Yeej tsis tsimnyog hlo li, tiamsis nej txhav Kuv tug! Nej nug hais tias, ‘Peb txhav Koj tug licas?’ Nej txhav Kuv tug los ntawm ib feem kaum thiab tej khoom fij. 9Nej txhua tus puavleej raug foom phem lawm, rauqhov tagnrho nej haivneeg puavleej txhav Kuv tug. 10Nej yuavtsum nqa kom txwm ib feem kaum tuaj tso rau hauv lub Tuamtsev, kom thiajli yuav muaj noj nplua-mias nyob rau hauv. Nej sim Kuv maj, nej yeej yuav pom tias Kuv yuav qhib roojntug nchuav koobhmoov ntau nplua-mias los rau nej. #Levi 27:30; Teev 18:21-24; 2Kev 12:6; 14:22-29; Nehemi 13:12 11Kuv yuav tsis pub kab noj nej tej qoobloo, thiab nej tej txivhmab los yuav txi ncw. 12Thaum ntawd txhua haivneeg yuav hu nej ua cov tibneeg uas tau koobhmoov, rauqhov nej lub tebchaws yog lub uas tau zoo noj tau zoo nyob.”
Vajtswv Coglus Yuav Tabncuab Nws Haivneeg
13Tus TSWV hais tias, “Nej haislus phem kawg nkaus xyav Kuv, tiamsis nej tseem nug hais tias, ‘Peb haislus phem thuam Koj licas?’ 14Nej hais tias, ‘Qhov uas peb tiam Vajtswv ntawd yeej tsis muaj qabhau dabtsi li. Qhov uas peb ua rawsli tus TSWV uas muaj Hwjchim Loj Kawg Nkaus hais lossis pheej lees tej kev txhaum uas peb tau ua tag los ntawd, muaj qabhau dabtsi rau peb? 15Rawsli peb pom mas cov neeg khavtheeb yog cov uas muaj kev zoosiab. Cov neeg ua phem tsis yog muaj kev vammeej xwb, tiamsis lawv tabmeeg ua txhaum sim Vajtswv siab los lawv twb tseem tsis raug txim li thiab.’ ”
16Ces cov neeg uas paub ntshai tus TSWV, lawv ib leeg txawm nrog ib leeg tham, thiab tus TSWV yeej mloog ntsoov thiab hnov tej uas lawv sibtham ntawd. Nyob tabmeeg tus TSWV xubntiag, muaj ib phau ntawv uas teev txog cov tibneeg uas paub ntshai thiab hwm tus TSWV tej npe rau hauv. 17Tus TSWV uas muaj Hwjchim Loj Kawg Nkaus hais tias, “Lawv yuav yog Kuv haivneeg. Thaum txog hnub uas Kuv txiavtxim, lawv yuav yog Kuv tug. Kuv yuav tabncuab lawv ib yam li leejtxiv tabncuab nws tus tub uas tiam nws ntag. 18Kuv haivneeg yuav pom cov tibneeg ncajncees thiab cov uas ua phem ua qias dua ib zaug ntxiv tias sibtxawv licas, thiab cov tibneeg uas tiam Kuv thiab cov uas tsis tiam Kuv sibtxawv licas.”
Currently Selected:
Malakis 3: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
