Lukas 3

Yauhas Tus Uas Muab Neeg Ua Kevcai Rausdej Tej Lus Qhuabqhia

(Mathais 3:1-12; Malakaus 1:1-8; Yauhas 1:19-28)

1Xyoo thib kaum-tsib uas Tinpelius ua Huabtais kav tebchaws, thaum ntawd Pootius Philaj yog tus tswvxeev kav lub xeev Yudas. Helauj yog tus kav lub xeev Kalilais thiab nws tus kwv Filiv yog tus kav lub xeev Itule-as thiab lub xeev Takaunitis; Lixaniyas yog tus kav lub xeev Anpilees, 2Anas thiab Kaiyafas nkawd yog Tuam Povthawj Hlob. Lub sijhawm ntawd, Vajtswv tau qhia Nws txojlus rau Xekhaliyas tus tub Yauhas tom roob mojsab qhua. 3Yogli ntawd, Yauhas thiaj mus qhuabqhia thoobplaws ib cheebtsam uas nyob raws tus Dej Yauladees hais tias, “Nej yuavtsum tso nej tej kev txhaum tseg thiab ua kevcai rausdej, Vajtswv thiaj yuav zam nej lub txim.” 4Qhov no muaj rawsli Yaxayas, uas yog tus xibhwb cev Vajtswv lus tau sau tseg rau hauv nws phau ntawv hais tias:

“Muaj ib tug hais nrov-nrov tom roob mojsab qhua hais tias,

‘Ciali kho kev tos tus Tswv;

kho kev kom ncaj rau Nws tau taug! #Yaxaya 40:3-5 (LXX)

5Txhub txhua lub kwjha kom puv,

khawb txhua lub roob thiab txhua lub povroob kom tiaj.

Kho tej kev uas nkhaus kom ncaj,

muab qhov siab thiab qhov qis pheev kom tiaj xwmyeem.

6Txhua haivneeg yuav pom Vajtswv txoj kev cawmdim!’ ”

7Muaj neeg coob-coob tuaj cuag Yauhas kom nws muab lawv ua kevcai rausdej. Yauhas hais rau lawv tias, “Cov niag nab phem! Leejtwg qhia rau nej hais tias nej yuav khiav dim Vajtswv txoj kev txiavtxim uas yuav muaj los sai-sai no? #Math 12:34; 23:33 8Nej yuavtsum ua lub neej kom qhia tau hais tias nej twb tso nej tej kev txhaum tseg lawm. Nej tsis txhob khav hais tias Anplahas yog nej yawgkoob. Kuv qhia rau nej hais tias, Vajtswv muaj peevxwm muab tej pobzeb no los ua Anplahas li cajces los yeej tau! #Yauh 8:33 9Tamsim no rab taus twb nyob ntawm cov hauvpaus ntoo lawm; txhua tsob ntoo uas tsis txi cov txiv zoo, yuav raug muab ntov thiab muab pov rau hauv cub hluavtaws.” #Math 7:19

10Cov neeg coob-coob ntawd nug Yauhas hais tias, “Yogli ntawd, peb yuav ua licas?”

11Yauhas teb lawv hais tias, “Yog leejtwg muaj ob lub tsho, nws yuavtsum muab ib lub pub rau tus uas tsis muaj; thiab yog leejtwg muaj zaub-mov, nws yuavtsum muab faib rau tus uas tsis muaj thiab.”

12Cov neeg uas sau se los kuj muaj qeeleej tuaj ua kevcai rausdej thiab, lawv nug Yauhas hais tias, “Xibhwb, peb yuav ua licas?” #Lukas 7:29

13Yauhas teb tias, “Nej yuavtsum tsis txhob sau tej se tshaj li txojcai.”

14Cov tubrog muaj qeeleej kuj nug Yauhas ib yam nkaus hais tias, “Peb ne, peb yuav ua licas?”

Yauhas teb tias, “Nej tsis txhob txhav leejtwg li nyiaj los ntawm kev uanruj uatsiv lossis komtxim tsis tseeb rau lwmtus. Nej ciali txaussiab rau lub nyiaj hli uas nej tau.”

15Cov neeg uas tosntsoov tus Cawmseej xav hauv lawv lub siab hais tias, Yauhas puas yog tus Mexiyas tiag. 16Yauhas thiaj hais rau lawv tias, “Kuv muab nej ua kevcai raus los ntawm dej, tiamsis tus uas yuav lawv kuv qab los, Nws muaj hwjchim loj dua kuv, txawm yog Nws nkawm khau xwb los kuv twb tsis tsimnyog mus daws txoj nyuag hlua. Nws yuav muab nej ua kevcai raus los ntawm Vaj Ntsujplig tus Dawbhuv thiab hauv hluavtaws. 17Nws tuav rawv ib rab ntxuam, yuav ntxuaj Nws pawg nplej kom cov npluag ya tawm huv tibsi. Nws yuav muab cov nplej ntim rau hauv Nws lub txhab tiamsis Nws yuav muab cov npluag pov rau hauv cub hluavtaws uas cig tsis paub tuag.”

18Yauhas siv ntau txojkev los qhia Txoj Moo Zoo rau cov neeg ntawd thiab nquahu kom lawv hloov lawv lub siab. 19Tiamsis Yauhas cem Helauj uas yog tus tswvxeev Kalilais, rauqhov Helauj yuav Helaudias uas yog nws tus niamntxawm los ua nws tus pojniam, thiab nws ua ntau yam kev phem. #Math 14:3-4; Malak 6:17-18 20Helauj tseem ua ib qhov phem tshaj tej ntawd ntxiv thiab, uas yog nws muab Yauhas ntes coj mus kaw rau hauv tsev lojcuj.

Yexus Ua Kevcai Rausdej

(Mathais 3:13-17; Malakaus 1:9-11)

21Tomqab uas sawvdaws ua kevcai rausdej tas lawm, Yexus kuj ua kevcai rausdej thiab. Thaum Nws tseem tabtom thov Vajtswv, roojntug txawm qhib plho, 22thiab Vaj Ntsujplig tus Dawbhuv txawm los tshwmsim muaj lub cev zooli tus nquab los rau saum Yexus. Thiab muaj ib lub suab hais saum ntuj tuaj hais tias, “Koj yog Kuv tus Tub uas Kuv hlub, Kuv txaussiab rau Koj heev.” #Chiv 22:2; Nnkauj 2:7; Yaxaya 42:1; Math 3:17; Malak 1:11; Lukas 9:35

Yexus Cov Yawgkoob

(Mathais 1:1-17)

23Thaum Yexus chiv ua haujlwm, Nws muaj hnubnyoog kwvlam li pebcaug xyoo. Rawsli sawvdaws xav, Yexus yog Yauxej tub, Yauxej yog Helis tub, 24Helis yog Mathaj tub, Mathaj yog Levis tub, Levis yog Melekhis tub, Melekhis yog Yaanais tub, Yaanais yog Yauxej tub, 25Yauxej yog Matathias tub, Matathias yog Amaus tub, Amaus yog Nahus tub, Nahus yog Exalis tub, Exalis yog Nakhais tub, 26Nakhais yog Ma-aj tub, Ma-aj yog Matathias tub, Matathias yog Xemi-ees tub, Xemi-ees yog Yauxes tub, Yauxes yog Yaudas tub, 27Yaudas yog Yau-anas tub, Yau-anas yog Lexas tub, Lexas yog Xelunpanpees tub, Xelunpanpees yog Se-atiyees tub, Se-atiyees yog Nelis tub, 28Nelis yog Melekhis tub, Melekhis yog Adis tub, Adis yog Kauxas tub, Kauxas yog Emadas tub, Emadas yog Aws tub, 29Aws yog Yausuas tub, Yausuas yog Eli-exaws tub, Eli-exaws yog Yaulees tub, Yaulees yog Mathaj tub, Mathaj yog Levis tub, 30Levis yog Xime-oos tub, Xime-oos yog Yudas tub, Yudas yog Yauxej tub, Yauxej yog Yaunames tub, Yaunames yog Eliakees tub, 31Eliakees yog Mele-as tub, Mele-as yog Menas tub, Menas yog Matathas tub, Matathas yog Nathas tub, Nathas yog Daviv tub, 32Daviv yog Yexis tub, Yexis yog Aunpes tub, Aunpes yog Npau-am tub, Npau-am yog Xamoos tub, Xamoos yog Nasoos tub, 33Nasoos yog Aminadas tub, Aminadas yog Amis tub, Amis yog Anis tub, Anis yog Hexeloos tub, Hexeloos yog Pelej tub, Pelej yog Yudas tub, 34Yudas yog Yakhauj tub, Yakhauj yog Ixaj tub, Ixaj yog Anplahas tub, Anplahas yog Telas tub, Telas yog Nahaus tub, 35Nahaus yog Xelus tub, Xelus yog Le-us tub, Le-us yog Pelej tub, Pelej yog Enpaws tub, Enpaws yog Selas tub, 36Selas yog Kainas tub, Kainas yog Afaxas tub, Afaxas yog Xees tub, Xees yog Nau-as tub, Nau-as yog Lamej tub, 37Lamej yog Methuxelas tub, Methuxelas yog Enauj tub, Enauj yog Yalej tub, Yalej yog Mahalalees tub, Mahalalees yog Kenaas tub, 38Kenaas yog Enauj tub, Enauj yog Xej tub, Xej yog Adas tub, Adas yog Vajtswv tub.

Currently Selected:

Lukas 3: MWW2022

Highlight

Copy