Lukas 11

Yexus Qhia Txog Kev Thov Vajtswv

(Mathais 6:9-13; 7:7-11)

1Muaj ib hnub Yexus mus thov Vajtswv ntawm ib qhov chaw. Thaum Nws thov tag lawm, Nws ib tug thwjtim hais rau Nws tias, “Tus Tswv, thov Koj qhia kom peb paub thov Vajtswv ib yam li Yauhas qhia nws cov thwjtim thiab.”

2Yexus hais rau lawv tias, “Thaum nej thov Vajtswv, nej hais li no:

“ ‘Leejtxiv,

thov kom sawvdaws hwm Koj lub npe;

thov kom Koj lub tebchaws los.

3Thov Koj niajhnub pub mov rau peb noj.#11:3: niajhnub pub mov rau peb noj; lossis pub mov rau peb noj tagkis.

4Thov Koj zamtxim rau peb,

rauqhov peb twb zamtxim rau txhua tus uas ua txhaum rau peb lawm.

Thov Koj tsis txhob coj peb mus raug kev simsiab.’ ”

5Thiab Yexus hais rau Nws cov thwjtim tias, “Pivxam hais tias thaum ib taghmo, nej cov muaj ib tug mus rau tom nws tus phoojywg tsev thiab thov hais tias, ‘Phoojywg, thov txais koj peb lub ncuav rau kuv, 6rauqhov kuv ib tug phoojywg dhau kev tuaj so hauv kuv tsev, tiamsis kuv tsis muaj dabtsi rau nws noj li!’ 7Tus phoojywg uas nyob hauv tsev teb tias, ‘Tsis txhob tuaj txob kuv! Kuv twb liaj qhovrooj lawm, thiab kuv cov menyuam los twb nrog kuv pw tas lawm. Kuv yuav sawv tsis tau mus muab ib yam dabtsi rau koj li.’ 8Kuv qhia rau nej tias, txawm nkawd yog phoojywg zoo npaum licas los nws yuav tsis sawv mus muab ncuav rau nws tus phoojywg, tiamsis vim nws tus phoojywg pheej taij tsis tseg li, nws yeej yuav sawv mus muab tej uas nws tus phoojywg cheemtsum rau tus phoojywg.

9“Yogli ntawd, Kuv qhia rau nej hais tias: Nej thov, nej yuav tau; nej nrhiav, nej yuav ntsib; nej khob, lub qhovrooj yuav qhib rau nej. 10Rauqhov txhua tus uas thov yeej tau, txhua tus uas nrhiav yeej ntsib, thiab txhua tus uas khob, lub qhovrooj yeej qhib rau nws. 11Nej cov uas yog leejtxiv, yog nej tus menyuam thov ntses, nej puas yuav muab nab rau nws? 12Lossis yog nej tus menyuam thov qe, nej puas yuav muab raubris teb rau nws? 13Txawm nej yog neeg phem npaum licas los nej tseem paub muab yam uas zoo rau nej tej menyuam. Yogli ntawd, nej Leejtxiv uas nyob saum ntuj ceebtsheej, yimhuab yuav muab Vaj Ntsujplig tus Dawbhuv rau txhua tus uas thov Nws!”

Yexus Thiab Npexenpus

(Mathais 12:22-30; Malakaus 3:20-27)

14Yexus tabtom ntiab ib tug dab tsis haislus; thaum tus dab tawm lawm, tus txivneej ntawd txawm rov hais tau lus. Cov neeg coob-coob uas nyob ntawd xav tsis thoob li. 15Tiamsis muaj qeeleej hais tias, “Twb yog Npexenpus uas yog cov dab tus thawj pub hwjchim rau Nws ntiab cov dab ntawd tawm.” #Math 9:34; 10:25

16Muaj qeeleej xav sim Yexus, yogli ntawd lawv thiaj hais kom Yexus ua ib yam txujci tseemceeb uas yog los saum ntuj los. #Math 12:38; 16:1; Malak 8:11 17Yexus twb paub tej uas lawv xav lawm, Nws thiaj hais rau lawv tias, “Lub tebchaws twg uas faib ua pab ua pawg thiab muaj kev sib tawmtsam, ces tsis ntev xwb lub tebchaws ntawd yuav ploj mus; tsev neeg twg uas faib ua pab ua pawg, ces tsev neeg ntawd yeej yuav tawg tas mus. 18Yogli ntawd, yog Xatas tseem faib ua ntau pab thiab rov sib tawmtsam, lawv lub tebchaws yuav ua licas khov taus? Nej hais tias qhov uas Kuv ntiab tau cov dab ntawd tawm yog Npexenpus pub hwjchim rau Kuv. 19Yog tias Kuv siv Npexenpus lub hwjchim ntiab lawv tawm, leejtwg ho pub hwjchim rau nej cov neeg ntiab tau cov dab ntawd tawm? Nej cov neeg ntag lau yog cov uas yuav txiavtxim rau nej! 20Tiamsis yog Kuv ntiab tau dab los ntawm Vajtswv lub hwjchim, ces qhov ntawd qhia tau rau nej paub tias Vajtswv lub Tebchaws twb los txog nej lawm.

21“Thaum ib tug txivneej uas muajzog heev, nws npaj tej cuabyeej khovkho, thiab zov nws lub tsev lawm, ces nws tej khoom yuav nyob ruaj. 22Tiamsis thaum muaj ib tug uas tseem muajzog dua nws tuaj ntaus nws thiab kovyeej nws lawm, ces tus ntawd yuav txeeb tagnrho tej cuabyeej uas nws ciasiab rau, nqa mus huv tibsi, thiab muab tej uas nws huab tau los coj mus sibfaib.

23“Tus uas tsis tuaj Kuv tog, ces yog nws tawmtsam Kuv. Tus uas tsis pab Kuv muab sau los uake, ces yog nws ua kom tawg uasab uasua. #Malak 9:40

Ntsujplig Phem Rovqab Los

(Mathais 12:43-45)

24“Thaum ib tug ntsujplig phem tawm hauv ib tug neeg lub cev mus lawm, nws txawm mus rau tom roob mojsab qhua thiab nrhiav chaw so. Yog nws nrhiav tsis tau, nws yuav hais tias, ‘Kuv yuav rovqab mus rau tom kuv lub qub tse uas kuv tawm tuaj lawm.’ 25Thaum nws rov los txog, uaciav lub tsev twb cheb du lug thiab txhua yam yeej tu tiavlog cia lawm. 26Ces nws txawm mus coj xya tus ntsujplig uas tseem phem dua nws los nrog nws nyob hauv lub tsev ntawd. Thaum kawg tus neeg ntawd hajyam txomnyem heev dua thaum chivthawj.”

Txoj Kev Zoosiab Uas Tseeb

27Thaum Yexus tseem tabtom hais txog tej ntawd, muaj ib tug pojniam uas nyob hauv cov neeg coob-coob txawm hais nrov-nrov tuaj hais tias, “Tus pojniam uas yug Koj thiab pub mis rau Koj noj mas ntshe muaj kev zoosiab tshajplaws!”

28Tiamsis Yexus teb tias, “Yog, tiamsis tseeb tiag ces cov neeg uas hnov Vajtswv Txojlus thiab ua raws nraim li txojlus ntawd yog cov uas tseem muaj kev zoosiab tshaj thiab!”

Neeg Xav Pom Txujci Tseemceeb

(Mathais 12:38-42)

29Thaum muaj neeg coob zujzus tuaj sawv puagncig Yexus, Nws hais rau lawv tias, “Tiam neeg no yog ib tiam uas phem kawg nkaus li! Lawv thov kom Kuv ua ib yam txujci tseemceeb, tiamsis Kuv yuav tsis ua dabtsi rau lawv pom li, tshwj yog zaj uas hais txog Yaunas nkaus xwb. #Math 16:4; Malak 8:12 30Yaunas ua lub cim rau cov neeg uas nyob hauv lub nroog Nineves licas, Neeg Leejtub yuav ua lub cim rau cov neeg tiam no ib yam nkaus li ntawd. #Yauna 3:4

31“Thaum txog Hnub Txiavtxim, tus pojniam Vajntxwv uas kav tebchaws Senpas yuav sawv los komtxim rau cov neeg nyob rau tiam no, rauqhov nws taug kev puag tim qabntuj kawg tuaj mloog Vajntxwv Xalumoos tej kev txawjntse. Kuv qhia rau nej hais tias, muaj ib tug nyob ntawm no tseem muaj hwjchim loj dua Xalumoos thiab. #1Vaj 10:1-10; 2Xwm 9:1-12 32Thaum txog Hnub Txiavtxim, cov neeg uas nyob hauv lub nroog Nineves yuav sawv los komtxim rau nej, rauqhov thaum lawv hnov Yaunas qhia, lawv twb tso lawv tej kev txhaum tseg lawm. Kuv qhia rau nej hais tias, muaj ib tug nyob ntawm no tseem muaj hwjchim loj dua Yaunas thiab! #Yauna 3:5

Lub Teeb Uas Ci Rau Lub Cev

(Mathais 5:15; 6:22-23)

33“Tsis muaj leejtwg taws teeb es muab coj mus zais lossis muab ib lub phiab khwb rau;#11:33: Tej phau ntawv qub uas xuas tes sau tsis muaj lossis muab ib lub phiab khwb rau. tsuas muaj uas yuav muab txawb rau saum lub txee qhov chaw siab xwb, kom thaum neeg tuaj rau hauv tsev, lawv thiaj pomkev. #Math 5:15; Malak 4:21; Lukas 8:16 34Koj lub qhovmuag yog lub teeb uas ci rau lub cev pomkev. Thaum koj lub qhovmuag tseem zoo, tagnrho koj lub cev yuav pomkev kajnrig. Tiamsis hnub twg koj lub qhovmuag tsis zoo lawm, ces tagnrho koj lub cev yuav tsausntuj nti. 35Ua tibzoo ceevfaj, tsis txhob cia qhov pomkev uas nyob hauv koj tsaus mus. 36Yog koj lub cev yeej kajnrig, tsis muaj ib qho tsaus li, koj yuav ci mus thoobplaws, ib yam li thaum tus duab teeb ci tuaj rau ntawm koj.”

Yexus Cem Cov Falixais Thiab Cov Xibhwb Uas Qhia Kevcai

(Mathais 23:1-36; Malakaus 12:38-40)

37Thaum Yexus qhia tas, muaj ib tug Falixais tau caw Yexus mus nrog nws noj mov; Yexus txawm mus hauv nws tsev thiab zaum ntawm lub rooj mov. 38Thaum tus Falixais pom tias Yexus tsis ntxuav tes uantej noj mov, nws xav tsis thoob li. 39Tus Tswv thiaj hais rau nws tias, “Nej cov Falixais yeej ntxuav nej lub khob thiab lub phaj sabnraud xwb, tiamsis sabhauv mas nej puvnkaus tej kev uanruj uatsiv thiab kev phem. 40Cov niag neeg ruam! Vajtswv tus uas tsim sabnraud, Nws tsis yog tus uas tsim sabhauv thiab lov? 41Nej ciali muab tej uas nyob hauv nej tej khob thiab tej phaj pub rau cov neeg pluag, kom txhua yam thiajli yuav huv rawsli kevcai rau nej.

42“Cov Falixais, nej yuav raug kev puastsuaj lau! Nej muab ib feem kaum ntawm nej tej txujlom, xwsli pumhub, luamlaws thiab txhua yam txujlom rau Vajtswv, tiamsis nej ho tso txoj kev ncajncees thiab txoj kev hlub Vajtswv tseg. Tej no yog tej uas tsimnyog nej yuavtsum tau ua, tiamsis ho tsis txhob muab lwm nqe tsotseg thiab. #Levi 27:30

43“Cov Falixais, nej yuav raug kev puastsuaj lau! Nej nyiam mus nyob tej rooj uas tseemceeb hauv tej tsev sablaj, thiab nyiam kom sawvdaws hawm nej tom tej kiab. 44Nej yuav raug kev puastsuaj lau! Nej zoo ib yam li tej ntxa uas tsis muaj dabtsi cim rau saud, uas tej neeg twb tsuj mus tsuj los, los lawv yeej tsis paub tias yog ntxa.”

45Muaj ib tug xibhwb uas qhia Kevcai hais rau Yexus tias, “Xibhwb, Koj hais li no mas yog Koj txobthuam peb xwb!”

46Yexus teb tias, “Cov xibhwb uas qhia Kevcai, nej yuav raug kev puastsuaj thiab! Nej muab tej nra hnyav uas tsis yoojyim ris rau neeg ris, tiamsis nej twb tsis kam cev ib tug nyuag ntivtes mus pab thiaj tej nra ntawd li. 47Nej yuav raug kev puastsuaj lau! Nej txhim cov xibhwb cev Vajtswv lus tej ntxa kom zoonkauj. Lawv cov ntawd yog cov uas nej tej yawgkoob muab tua povtseg ntag. 48Tej uas nej ua ntawd qhia tau rau sawvdaws paub tias nej yeej pomzoo txog tej uas nej cov yawgkoob tau ua los. Nej cov yawgkoob yog cov uas tua cov xibhwb cev Vajtswv lus, thiab nej yog cov uas txhim lawv tej ntxa. 49Vimli no, Vajtswv tus uas muaj tswvyim thiajli hais tias, ‘Kuv yuav txib cov xibhwb cev Vajtswv lus thiab Kuv cov timthawj mus qhia lawv, lawv yuav muab qeeleej tua thiab yuav muab qeeleej tsimtxom.’ 50Yogli ntawd, cov neeg tiam no yuav tau ris lub txim vim cov ntshav uas cov neeg tiam thaum ub tau tua cov xibhwb cev Vajtswv lus, txij thaum tsim lub ntiajteb los, 51suav txij li Anpees cov ntshav los txog rau Xekhaliyas cov ntshav, uas raug tua nyob nruabnrab ntawm lub thaj thiab qhov chaw uas Dawbhuv. Kuv qhia rau nej hais tias, cov neeg tiam no yuav tau ris tagnrho cov neeg uas tua cov xibhwb cev Vajtswv lus ntawd lub txim! #Chiv 4:8; 2Xwm 24:20-21

52“Cov xibhwb uas qhia Kevcai, nej yuav raug kev puastsuaj lau! Nej muab tus yuamsij uas qhib mus rau txoj kev txawjntse zais cia lawm; txawm yog nej kiag los nej twb tsis kam mus rau hauv, nej tseem txwv cov uas xav mus kom mus tsis tau rau hauv thiab!”

53Thaum Yexus tawm hauv tus Falixais tsev mus lawm, cov xibhwb uas qhia Kevcai thiab cov Falixais txawm pib tawmtsam Yexus hnyav heev thiab nug Yexus ntau yam, 54seb lawv puas yuav liamtxim tau rau tej lus uas Nws teb.

Currently Selected:

Lukas 11: MWW2022

Highlight

Copy