Yausuas 9
9
Cov Neeg Nkinpe-oos Dag Yausuas
1Qhov uas cov Yixalayees muajyeej ntawd nrov-ncha mus txog rau txhua tus vajntxwv uas nyob ntawm tus dej Yauladees sab hnubpoob, tsis hais saum tej laj roob, tej taw roob, tej tiajnrag thiab raws ntug Hiavtxwv Meditelanees mus rau pem Lenpanoos. Cov vajntxwv no yog cov uas kav cov Hitis, cov Amaules, cov Kana-as, cov Pelixes, cov Hivis, thiab cov Yenpus. 2Lawv tagnrho txawm sibsau uake tuaj tua Yausuas thiab cov Yixalayees.
3Tiamsis cov neeg Nkinpe-oos, uas yog cov Hivis, hnov tej uas Yausuas tau ua rau lub nroog Yelikaus thiab lub nroog A-is, 4ces lawv txawm tuav tswvyim tuaj dag Yausuas. Lawv muab tej khoom noj ntim rau hauv tej hnab uas qub-qub thiab muab tej hnabtawv uas qub-qub ntim cawv txivhmab, nog rau saum lawv cov neesluav thauj tuaj. 5Lawv hnav tej tsoostsho khaub-khaubhlab thiab rau tej khau ntuag-ntuag uas tau muab ntxiv-ntxiv rau lawm xwb. Tej ncuav uas lawv coj tuaj twb qhuav thiab tuajpwm tag lawm. 6Lawv tuaj rau hauv lub yeej uas nyob ntawm Nkilenkas, thiab hais rau Yausuas thiab cov Yixalayees tias, “Peb taug kev deb heev tuaj, peb xav tuaj nrog nej coglus sib raugzoo.”
7Tiamsis cov Yixalayees teb tias, “Vim licas peb thiaj yuav nrog nej sib coglus? Tejzaum nej nyob ibncig ze ntawm no xwb.” #Khiav 23:32; 34:12; 2Kev 7:2
8Lawv hais rau Yausuas tias, “Peb yog koj cov tubqhe.”
Yausuas nug lawv tias, “Nej yog leejtwg? Nej tuaj qhovtwg tuaj?”
9Lawv teb Yausuas tias: “Peb tuaj lub tebchaws uas deb heev tuaj, rauqhov peb tau hnov txog tus TSWV uas yog nej tus Vajtswv. Peb hnov txog txhua yam txujci uas Nws tau ua nram tebchaws Iziv, 10thiab tej uas Nws tau ua rau cov Amaules ob tug vajntxwv uas nyob tim tus dej Yauladees sab hnubtuaj, uas yog Vajntxwv Xihoos uas kav lub nroog Hesenpoos thiab Vajntxwv Aus uas nyob hauv lub nroog uas Asetalus kav hauv tebchaws Npasas. #Teev 21:21-35 11Peb cov thawjcoj thiab cov pejxeem uas nyob hauv peb lub tebchaws kom peb npaj mentsis khoom noj taug kev tuaj cuag koj. Lawv kom peb tuaj ua koj qhev thiab thov nrog koj sib coglus. 12Thaum peb sawvkev tuaj peb tej ncuav tseem sov-sov, tiamsis koj saib seb, twb qhuav thiab tuajpwm tag lawm. 13Thaum peb siv cov hnabtawv uas ntim kua txivhmab no, cov hnab tseem tshiab, tiamsis koj saib seb, tej hnab ntuag tag. Peb tej ristsho thiab khau los ntuag tag vim peb taug kev deb heev tuaj.”
14Cov Yixalayees txawm ciali txais qeeyam khoom noj ntawm cov neeg no, tiamsis lawv tsis nug tus TSWV li. 15Yausuas pomzoo nrog cov Nkinpe-oos cog phoojywg thiab cia lawv nrog cov Yixalayees nyob. Cov Yixalayees tej thawjcoj tau coglus hais tias lawv yuav ceev tej lus cogtseg ntawd.
16Tomqab uas coglus tag tau peb hnub, cov Yixalayees mamli paub tias cov neeg ntawd yeej nyob ze ntawm lawv ntag. 17Yogli ntawd, cov Yixalayees mus peb hnub xwb, lawv txawm mus txog cov nroog uas cov neeg ntawd nyob: uas yog Nkinpe-oos, Khefilas, Npe-elaus, thiab Kili-as Ye-alees. 18Tiamsis cov Yixalayees tsis tua lawv, rauqhov cov thawjcoj twb tuav tus TSWV, uas yog cov Yixalayees tus Vajtswv lub npe, nrog cov neeg ntawd sib coglus lawm. Cov Yixalayees thiajli yws lawv cov thawjcoj, 19tiamsis cov thawjcoj teb tias, “Peb twb tuav tus TSWV, uas yog cov Yixalayees tus Vajtswv lub npe, nrog lawv coglus lawm. Zaumno peb thiaj ua tsis tau licas rau lawv. 20Peb yuavtsum cia lawv muaj sia nyob vim tej lus cogtseg, yog peb tsis cia lawv nyob, Vajtswv yuav rautxim rau peb. 21Peb tseg lawv nyob, tiamsis cia lawv mus txiav taws thiab nqa dej rau peb.” Nov yog tej uas cov thawjcoj tau hais rau cov Yixalayees.
22Yausuas tau xaaj kom cov Nkinpe-oos tuaj cuag nws. Nws nug lawv hais tias, “Vim licas nej thiaj tuaj dag peb hais tias nej nyob deb heev tuaj, tiamsis nej tsuas yog nyob ibncig ntawm no xwb? 23Vim nej dag li ntawd, Vajtswv thiaj rautxim rau nej. Nej cov neeg yuav ua qhev txiav taws thiab nqa dej rau hauv kuv tus Vajtswv lub Tuamtsev mus li.”
24Lawv teb tias, “Qhov uas peb ua li no vim peb paub meej-meej tias tus TSWV, uas yog nej tus Vajtswv, tau xaaj rau Nws tus tubtxib Mauxes kom muab tagnrho lub tebchaws Kana-as no rau nej, thiab kom nej yuavtsum tua cov neeg uas nyob hauv lub tebchaws no kom tuag tas huv tibsi. Peb dag li ntawd, vim peb ntshai nej; ntshai tsam nej txov peb txojsia. 25Nimno peb nyob hauv nej xibteg lawm, nej yuav ua licas rau peb los nyob ntawm nej pom tias zoo thiab yog lawm xwb.”
26Yogli ntawd, Yausuas thiaj cawm lawv thiab tsis pub cov Yixalayees tua lawv. 27Tiamsis hnub ntawd kiag xwb nws tau hais kom cov Nkinpe-oos ua qhev txiav taws thiab nqa dej rau cov Yixalayees thiab rau tus TSWV lub thaj. Lawv yeej tseem ua qhev li ntawd rau hauv thaj chaw uas tus TSWV xaiv ua chaw pehawm los txog niajhnub no.
Currently Selected:
Yausuas 9: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
