Yausuas 8

Lub Nroog A-is Raug Puastsuaj

1Tus TSWV hais rau Yausuas tias, “Ciali coj tagnrho cov tubrog nrog koj nce mus rau saum lub nroog A-is. Tsis txhob ntshai lossis qaugzog. Kuv twb muab lub nroog A-is tus vajntxwv, muab nws cov neeg, nws lub nroog, thiab lub tebchaws cob rau koj tes lawm. 2Koj ciali mus tua lub nroog A-is thiab nws tus vajntxwv rawsli koj tau ua rau lub nroog Yelikaus thiab nws tus vajntxwv los lawm, tiamsis zaum no koj tseg tej khoom tseemceeb, thiab tej tsiaj uas nej txeeb tau los ua nej tug. Ciali txhij tubrog thiab nyas twjywm mus tuaj tom lawv qab tua tuaj.”

3Yogli ntawd Yausuas thiaj txhij nws cov tubrog mus tua lub nroog A-is. Nws xaiv tau 30,000 leej uas khovkho thiab xa lawv mus thaum ib taghmo. 4Nws xaaj rau lawv hais tias, “Nej mus nkaum rau sab tomqab nraum lub nroog, tiamsis tsis txhob mus deb dhau; thiab npaj rawv tos sibtua. 5Kuv thiab cov tubrog uas nrog kuv, peb yuav txeem mus rau hauv lub nroog uantej. Thaum cov tubrog hauv lub nroog A-is tawm tuaj tua peb, peb yuav thim khiav rovqab ib yam li peb ua thawjzaug. 6Lawv yuav caum peb mus txog thaum peb ntxias lawv tawm tuaj dhau ntug nroog. Lawv yuav xav tias peb khiav lawv ib yam li thawjzaug. 7Thaum ntawd nej ciali tawm hauv nej tej chaw nkaum los mus txeeb kiag lub nroog. Tus TSWV uas yog nej tus Vajtswv, yuav muab lub nroog ntawd rau nej. 8Thaum nej txeeb tau lub nroog lawm, nej ciali tis hluavtaws hlawv lub nroog, rawsli tus TSWV tau xaaj tseg lawm. Tej no yog kuv tej lus xaaj rau nej.” 9Yogli ntawd, Yausuas thiaj kom lawv mus, ces lawv txawm mus rau ntawm lawv cov chaw nkaum ntawm lub nroog A-is sab hnubpoob, nruabnrab ntawm lub nroog A-is thiab Npethees zov tos. Hmo ntawd Yausuas tseem nyob hauv lub yeej.

10Tagkis sawvntxov Yausuas hu nws cov tubrog tuaj uake, ces nws thiab cov Yixalayees cov thawjcoj txawm coj lawv mus rau pem lub nroog A-is. 11Yausuas thiab cov tubrog uas nrog nws txawm mus tsuam chaw rau ntawm ncaujke uas mus rau hauv lub nroog ntawv sab ped uas muaj ib lub voshav quas lawv thiab lub nroog A-is. 12Yausuas coj kwvlam li 5,000 tus tubrog nrog nws mus nkaum ntawm lub nroog A-is sab hnubpoob, nruabnrab ntawm lub nroog A-is thiab Npethees. 13Lawv muab cov tubrog faib, cia cov coob tsuam yeej rau ntawm lub nroog sab qaumteb, dua li lwm cov, cia lawv mus nyob rau sab hnubpoob. Hmo ntawd Yausuas nyob rau hauv lub voshav.

14Thaum lub nroog A-is tus vajntxwv pom Yausuas cov tubrog, nws txawm maj ceevnrooj tuaj. Nws thiab nws cov tubrog taug lub hav Yauladees tuaj tua cov Yixalayees ntawm tibqho chaw qub uas lawv tau sibtua thawjzaug. Tiamsis vajntxwv tsis paub tias nws yuav raug puav thiab tua tomqab tuaj. 15Yausuas thiab cov tubrog uas nrog nws uatxuj ua li uas lawv swb, thiab txawm khiav mus rau tom tiaj suabpuam. 16Lawv txawm hu tagnrho cov txivneej hauv nroog tuaj caum tua Yausuas lawv. Lawv yim caum Yausuas, lawv yim mus deb nroog ntxiv xwb. 17Cov txivneej hauv lub nroog A-is#8:17: Ib phau ntawv qub-qub thaum ub saum hais tias A-is; phau los Henplais hais tias A-is thiab Npethees. txhua tus mus raws cov Yixalayees tas lawm, tseg lub nroog qhib lug cia, tsis muaj leejtwg yuav tivthaiv li.

18Ces tus TSWV hais rau Yausuas tias, “Taw koj rab hmuv rau lub nroog A-is; Kuv yuav muab lub nroog ntawd cob rau koj tes.” Yausuas txawm ua rawsli tus TSWV hais. 19Thaum nws tsa hlo nws rab hmuv lawm, ces cov tubrog uas nkaum ntawm ntug nroog txawm sawv khiav mus rau hauv lub nroog thiab txeeb kiag tau lub nroog. Lawv thiaj tis hluavtaws hlawv lub nroog tamsim ntawd. 20Thaum cov tubrog A-is tig saib tomqab, lawv pom pataws ncho auv niab rau saum ntuj, ua rau lawv twskev, rauqhov cov tubrog Yixalayees uas khiav rau tom tiaj suabpuam, tig rov tua lawv lawm.

21Thaum Yausuas thiab cov tubrog uas nrog nws pom nws lwmpab tubrog txeeb tau lub nroog A-is thiab tis hluavtaws hlawv lawm, lawv txawm tig rov pib tua cov tubrog A-is. 22Cov tubrog Yixalayees uas mus txeem tau lub nroog lawm txawm tawm tuaj pab tua thiab. Yogli ntawd, cov tubrog A-is pom tias cov tubrog Yixalayees vij lawv tag lawm, lawv thiaj raug tua tuag tas huvsi. Tsis muaj ib tug dim li, 23tsuas yog tshuav cov A-is tus vajntxwv xwb. Lawv thiaj ntes tau nws thiab coj mus cuag Yausuas.

24Cov tubrog Yixalayees tua cov tubrog A-is uas tuaj caum lawv tom tiaj suabpuam tuag tas huvsi. Ces lawv rov los rau hauv lub nroog thiab muab txhua tus uas nyob hauv nroog tua tag huv tibsi. 25-26Yausuas yeej tuav rawv nws rab hmuv taw rau lub nroog A-is, thiab yeej tsis muab cia, mus txog thaum lawv tua txhua tus tuag tas huv tibsi. Hnub ntawd cov neeg hauv lub nroog A-is, tsis hais pojniam, txivneej uas raug tua tuag muaj 12,000 leej. 27Cov Yixalayees tseg tej khoom tseemceeb thiab tej tsiaj uas lawv txeeb tau hauv lub nroog cia rawsli tus TSWV tau xaaj rau Yausuas lawm. 28Yausuas hlawv lub nroog A-is kubhnyiab thiab puastsuaj tag. Lub nroog yeej tseem zooli ntawd los txog niajhnub no. 29Yausuas muab tus vajntxwv uas kav lub nroog A-is dai cajdab rau ntawm ib tsob ntoo mus txog thaum yuav tsausntuj. Thaum lub hnub yuav poobqho, Yausuas tau xaaj kom nws cov tubrog mus muab vajntxwv lub cev txo los thiab coj mus pov rau tim ncaujke roojloog. Lawv muab pobzeb los tsuam ua ib pawg rau saum nws, uas tseem nyob los txog niajhnub no.

Nyeem Tus TSWV Txoj Kevcai Saum Roob Enpas

30Yausuas tau teeb ib lub thaj rau saum lub roob Enpas rau tus TSWV, uas yog cov Yixalayees tus Vajtswv. #2Kev 27:2-8 31Nws ua lub thaj ntawd zoo ib yam li tus qauv uas tus TSWV tus tubtxib Mauxes qhia tseg rau cov Yixalayees, rawsli Mauxes txoj Kevcai uas hais tseg tias: “lub thaj uas muab pobzeb ua, uas yeej tsis tau muab txaug hlau los txaug.” Lawv txawm hlawv khoom theej txhoj thiab hlawv khoom fij ua kev sib raugzoo rau tus TSWV rau saum lub thaj. #Khiav 20:25 32Thaum ntawd Yausuas sau Vajtswv txoj Kevcai uas Mauxes twb xub saum tseg lawm rau saum cov txiag zeb#8:32: cov txiag zeb; lossis pobzeb. tabmeeg cov Yixalayees. 33Cov Yixalayees, nrog rau lawv cov thawjcoj, cov nomtswv, cov txiavtxim, thiab lwm haivneeg uas nrog lawv nyob, puavleej tuaj sawv rau ob sab ntawm tus TSWV lub Phijxab Lus Cogtseg, thiab tig xubntiag rau cov povthawj hlob uas kwv lub Phijxab. Cov neeg ibnrab tig nrobqaum rau lub Roob Nkelixees, thiab ibnrab tig nrobqaum rau lub Roob Enpas. Tus TSWV tus tubtxib Mauxes tau xaaj kom cov Yixalayees ua li ntawd thaum txog lub sijhawm uas lawv tuaj txais koobhmoov. #2Kev 11:29; 27:11-14 34Yausuas txawm nyeem nrov-nrov txog tus TSWV txoj Kevcai, thiab nyeem tej lus foom koobhmoov thiab tej lus foom phem, rawsli tau sau cia rau hauv phau ntawv uas teev txoj Kevcai lawm. 35Txhua nqe Kevcai uas Mauxes sau tseg, Yausuas muab los nyeem rau sawvdaws mloog, tsis hais pojniam menyuam, thiab lwm haivneeg uas nrog lawv nyob.

Currently Selected:

Yausuas 8: MWW2022

Highlight

Copy