Yausuas 7
7
Akhas Tej Kev Txhaum
1Tus TSWV tau xaaj tsis pub cov Yixalayees nqa ib yam khoom dabtsi uas yuavtsum raug muab rhuav kom puastsuaj hauv lub nroog Yelikaus los yuav, tiamsis muaj ib tug txivneej npe hu ua Akhas tsis mloog tus TSWV lolus xaaj ntawd. Yogli ntawd, tus TSWV thiaj npautaws heev rau cov Yixalayees. (Akhas yog Khamis tus tub thiab yog Xanpedis tus xeebntxwv uas yog Xelas cuab kwvtij thiab yog xeem Yudas.)
2Yausuas tau tso qeeleej neeg tawm hauv Yelikaus mus rau lub nroog A-is uas nyob ntawm Npethees sab hnubtuaj, ze Npethavees, kom lawv mus soj lub tebchaws ntawd. Thaum lawv mus soj tag lawm, 3lawv rov los qhia rau Yausuas hais tias: “Tsis tas yuav xa tagnrho peb sawvdaws mus tua lub nroog A-is. Tsuas xa 2,000 lossis 3,000 leej mus tua xwb, rauqhov lub nroog ntawd tsis yog ib lub nroog loj.” 4Yogli ntawd lawv thiaj tso kwvlam li 3,000 tus tubrog Yixalayees mus tua, tiamsis lawv swb thiab thim rov los. 5Cov tubrog hauv lub nroog A-is caum lawv tua ntawm lub roojloog tuaj txog ntua thaj chaw khawb pobzeb, ua rau kwvlam li pebcaug-rau leej raug tua tuag thaum lawv khiav nqis hav. Cov Yixalayees qaugzog thiab ntshai kawg li.
6Yausuas thiab cov Yixalayees cov thawjcoj nyuajsiab heev lawv thiaj dua lawv tej ristsho, thiab txhoscaug khoov ti nkaus hauv av tabmeeg tus TSWV lub Phijxab Lus Cogtseg ib hnub tsausntuj. Lawv tsuab hmoov av rau saum lawv taubhau, uas yog qhia txog lawv tej kev nyuajsiab. 7Yausuas hais tias, “Tus TSWV uas kav ibpuas tsavyam! Vim licas Koj thiaj coj peb hla tus dej Yauladees los? Puas yog Koj coj peb los cob rau cov Amaules txhais tes kom peb raug puastsuaj? Uacas tsis cia peb nyob twjywm sab ntug dej Yauladees tim ub? 8Tus TSWV, nimno cov tubrog Yixalayees raug yeebncuab tua swb thim los lawm, kuv yuav hais licas no? 9Cov Kana-as thiab tej neeg uas nyob hauv lub tebchaws no yuav hnov txog tej xwm no. Lawv yuav tuaj vij peb thiab muab peb txhua tus tua huv tibsi! Zaumno Koj yuav ua licas thiaj yuav txuag tau Koj lub npe?”
10Tus TSWV hais rau Yausuas tias, “Ciali sawv! Ua licas koj yuav khwb hauv av li no? 11Cov Yixalayees tau ua txhaum lawm! Lawv tau hla Kuv tej lus cogtseg uas Kuv tau xaaj kom lawv yuavtsum ua. Lawv tau nqa qeeyam khoom uas yuavtsum raug muab rhuav kom puastsuaj. Lawv tseem nyiag, tseem dag, thiab tseem nqa tej khoom ntawd los zais xyaw lawv cov. 12Vimli no ntag lau, cov Yixalayees thiaj tua tsis yeej lawv cov yeebncuab. Lawv swb thiab thim rov los, rauqhov lawv raug foom kom puastsuaj lawm! Yog nej tsis muab tej khoom uas Kuv tau txwv ntawd ua kom puastsuaj mus, Kuv yuav tsis nrog nej nyob ntxiv lawm!
13“Koj ciali sawv! Muab cov neeg ua kevcai ntxuav thiab npaj coj lawv tuaj cuag Kuv. Hais kom lawv ciali npaj kom txhij rau tagkis, vim tus TSWV uas yog cov Yixalayees tus Vajtswv, muaj lus yuav hais rau lawv hais tias: ‘Cov Yixalayees 'e, nej nqa qeeyam khoom uas Kuv tau xaaj kom nej yuavtsum muab rhuav puastsuaj lawm! Nej yuav tua tsis yeej nej cov yeebncuab mus txog thaum nej muab tej khoom ntawd tshem tawm ntawm nej mus!’ 14Koj ciali hais rau lawv tias tagkis sawvntxov lawv txhua xeem yuav tau tuaj sawv ntawm hauvntej ib xeem ib xeem zujzus. Kuv hu xeem twg, xeem ntawd sawv los ib cuab ib cuab zujzus. Kuv hu cuab twg cuab ntawd sawv los ib tse ib tse zujzus. Thiab Kuv hu tsev neeg twg, tsev ntawd sawv los ib tug ib tug zujzus. 15Tus uas raug ntes tau, vim nws muaj tej khoom txwv ntawd nyob rau ntawm nws, yuavtsum muab nws, nrog rau nws tsev neeg thiab tej qhov txhia chaw uas nws muaj, hlawv huv tibsi povtseg, rauqhov nws tau hla Kuv tej lus cogtseg thiab tau ua rau cov Yixalayees poob ntsejmuag dhau lawm.”
16Hnub tomqab thaum sawvntxov, Yausuas thiaj coj cov Yixalayees tuaj, thiab kom ib xeem zujzus sawv los rau tom hauvntej, ces lawv txawm rho ntawv tau xeem Yudas. 17Nws thiaj coj xeem Yudas ib cuab zujzus los, ces lawv rho tau cuab Xelas npe. Ces nws coj cuab Xelas ib tsev zujzus los, lawv rho tau Xanpedis tsev neeg npe. 18Nws coj Xanpedis tsev neeg ib tug zujzus los, lawv rho tau Akhas, uas yog Khamis tus tub thiab yog Xanpedis tus xeebntxwv lub npe. 19Yausuas hais rau Akhas tias, “Kuv tub 'e, ciali qhia tseeb tabmeeg tus TSWV uas yog cov Yixalayees tus Vajtswv, thiab lees koj tej kev txhaum. Koj qhia rau kuv seb koj tau ua dabtsi lawm? Tsis txhob zais li.”
20Akhas teb tias, “Muaj tseeb, kuv tau ua txhaum rau tus TSWV uas yog cov Yixalayees tus Vajtswv lawm. Kuv tau ua li no: 21Tej khoom uas peb mus txeeb tau ntawd, kuv pom ib lub tsho Npanpiloos uas zoonkauj heev, thiab pom ib co nyiaj hnyav kwvlam li 2 kilus, thiab ib daim kub hnyav kwvlam ibnrab ntau mentsis kilus. Kuv ntshaw cov khoom ntawd heev ces kuv txawm nqa los lawm. Kuv muab faus rau hauv kuv lub tsevntaub, uas yog muab cov nyiaj tso tuaj hauvqab.”
22Yogli ntawd, Yausuas thiaj txib tus puav txivneej khiav mus rau tom lub tsevntaub, thiab pom cov khoom ntawd faus rau hauv, nrog rau cov nyiaj uas nyob tuaj hauvqab. 23Lawv nqa cov khoom ntawd tawm hauv lub tsevntaub los rau Yausuas thiab tagnrho cov Yixalayees saib thiab muab tso tabmeeg tus TSWV. 24Yausuas thiab cov Yixalayees txawm coj Akhas, coj cov nyiaj, coj lub tsho, coj daim kub, coj nws tej tub tej ntxhais, nws cov nyuj, nws cov neesluav, nws cov yaj, nws cov tshis, nws lub tsevntaub, thiab tagnrho nws tej khoom huvsi mus rau hauv lub Hav Teebmeem. 25Yausuas hais rau Akhas tias, “Uacas koj yuav coj tej teebmeem li no los rau peb? Hnubno tus TSWV yuav coj teebmeem los rau koj!” Ces tagnrho cov Yixalayees txawm muab pobzeb txawb Akhas thiab nws tsev neeg kom tuag, thiab muab lawv hlawv nrog tej khoom. 26Lawv muab pobzeb los tsuam ua ib pawg rau saum Akhas, uas tseem nyob los txog niajhnub no. Yogli ntawd, thiaj muab thaj chaw ntawd hu ua lub Hav Teebmeem.
Ces tus TSWV thiaj tsis chim rau lawv lawm.
Currently Selected:
Yausuas 7: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
