Yausuas 6
6
Lub Nroog Yelikaus Puastsuaj
1Lub nroog Yelikaus tej roojloog raug muab kaw cia thiab muaj neeg zov zoo heev kom cov Yixalayees nkag tsis txhob tau rau hauv. Tsis muaj leejtwg nkag tau lossis tawm tau hauv lub nroog hlo li. 2Tus TSWV hais rau Yausuas tias, “Kuv yuav muab lub nroog Yelikaus, muab tus vajntxwv uas kav lub nroog, thiab tej tubrog uas siab tawv cob rau koj tes. 3Koj thiab koj cov tubrog ciali ncig lub nroog no rau hnub, ib hnub ncig ib lwm. 4Kom xya leej povthawj hlob, ib leeg nqa ib lub rajxyu, mus ua lub Phijxab Lus Cogtseg ntej. Hnub thib xya koj thiab koj cov tubrog yuavtsum mus ncig lub nroog xya lwm, thiab kom cov Povthawj hlob tshuab rajxyu. 5Hais kom lawv yuavtsum tshuab ib zag kom nrov ntev loo. Thaum nej hnov lub suab rajxyu ntawd, nej sawvdaws ciali qw nrov-nrov, ces tej ntsaloog yuav pob thiab vau mus. Thaum ntawd tagnrho nej sawvdaws ciali mus kiag rau hauv lub nroog.”
6Yausuas thiaj hu cov povthawj hlob los cuag nws thiab hais rau lawv tias, “Nej ciali kwv lub Phijxab Lus Cogtseg thiab nej xya leej nqa nej cov rajxyu mus ua lub phijxab ntej.” 7Ces nws xaaj rau cov pejxeem hais tias, “Peb ciali mus ncig lub nroog, cia pab tubrog uas muaj cuabyeej mus uantej tus TSWV lub Phijxab Lus Cogtseg.”
8-9Thaum Yausuas xaaj li ntawd tag, pab tubrog uas muaj cuabyeej txawm mus ua cov povthawj hlob uas tshuab rajxyu ntej; pab uas mus ua cov tshuab rajxyu qab yog cov povthawj hlob uas kwv lub Phijxab Lus Cogtseg, thiab ib pab tubrog lawv cov povthawj hlob ntawd qab. Lub sijhawm ntawd suab raj suab xyu nrov tsis tu li. 10Tiamsis Yausuas tau xaaj rau nws cov neeg kom tsis txhob qw thiab tsis txhob hais ib lolus mus txog thaum nws xaaj kom qw, mamli qw. 11Yogli ntawd, nws thiaj hais kom lawv kwv tus TSWV lub Phijxab Lus Cogtseg mus ncig lub nroog ib lwm, thiab rov los so hauv lub yeej ib hmo.
12-13Hnub tomqab Yausuas sawvntxov tsees los txhib cov povthawj hlob thiab cov tubrog rov mus ncig lub nroog Yelikaus ib yam li thawj hnub thiab kom lawv mus siblaw li no: pab tubrog uas muaj cuabyeej mus uantej, ntxiv mus yog xya tus povthawj hlob uas tshuab xya lub rajxyu, ces cov povthawj hlob uas kwv tus TSWV lub Phijxab Lus Cogtseg, pab kawg yog cia pab tubrog fajseeb lawv cov povthawj hlob ntawd qab. Lub sijhawm ntawd suab rajxyu nrov tsis tu li. 14Hnub thib ob los lawv rov mus ncig lub nroog ib lwm, lawv mamli rov los so rau hauv lub yeej. Lawv ua li ntawd tau rau hnub.
15Hnub thib xya lawv sawvntxov mus ncig lub nroog ib yam li txhua hnub, tiamsis hnub ntawd lawv ncig xya lwm. 16Thaum lawv ncig lwm thib xya tag, cov povthawj hlob txawm tshuab raj tshuab xyu, thiab Yausuas xaaj kom nws cov tubrog ciali qw nrov-nrov hais tias, “Tus TSWV twb muab lub nroog no rau nej lawm! 17Lub nroog thiab txhua yam uas nyob hauv lub nroog no yuavtsum raug puastsuaj kom tag, zooli ib qho khoom fij rau tus TSWV. Yuavtsum tseg tus niamntiav uas hu ua Lahaj thiab nws tsev neeg, rauqhov nws tau zais peb ob tug neeg soj tebchaws lawm. 18Nej tsis txhob yuav ib yam dabtsi uas twb npaj yuav muab rhuav kom puastsuaj lawm; yog nej muab tej ntawd los yuav, nej yuav coj teebmeem thiab kev puastsuaj los rau hauv cov Yixalayees lub yeej. 19Txhua yam uas yog muab nyiaj, muab kub, muab tooj lossis muab hlau ua, yog tej uas tshwj tseg rau tus TSWV. Yuavtsum coj tej ntawd los khaws cia rau hauv tus TSWV lub txhab.”
20Yogli ntawd, cov povthawj hlob thiaj tshuab rajxyu. Thaum cov tubrog hnov tej suab ntawd, lawv txawm qw nrov-nrov, ces lub nroog Yelikaus tej ntsayeej txawm pob thiab vau tag. Cov tubrog txawm nce pes hlo mus rau hauv lub nroog thiab txeeb kiag tamsim ntawd. #Henpl 11:30 21Lawv muab ntaj tua txhua tus neeg hauv lub nroog, tsis hais pojniam, txivneej, tus hlob tus yau, thiab tua tej nyuj tej yaj, tej neesluav tuag tag huv tibsi.
22Yausuas hais rau ob tus uas mus soj tebchaws tias, “Neb ciali mus rau hauv Lahaj uas yog tus niamntiav lub tsev, coj nws thiab nws tsev neeg txhua tus tawm los, rawsli neb tau coglus rau nws lawm.” 23Yogli ntawd nkawd thiaj mus coj Lahaj, nws niam nws txiv, nws cov kwvtij thiab tagnrho tej txheebze tawm los. Nkawd thiaj coj lawv sawvdaws uas yog Lahaj tsev neeg thiab cov tubqhe los nyob ze cov Yixalayees lub yeej.
24Ces lawv txawm hlawv lub nroog thiab txhua yam uas nyob hauv kubhnyiab tag, tsuas tshwj tej uas yog muab nyiaj, muab kub, muab tooj, lossis muab hlau ua uas coj los khaws cia rau hauv tus TSWV lub txhab xwb. 25Vim tus niamntiav Lahaj tau zais ob tug uas Yausuas tso mus soj lub nroog Yelikaus, yogli ntawd Yausuas thiaj tsis tua nws thiab tagnrho nws tej txheebze. (Lahaj cajces tseem nyob hauv tebchaws Yixalayees los txog niajhnub no). #Henpl 11:31
26Lub sijhawm ntawd Yausuas tau coglus hais tias, “Yog leejtwg tseem rov txhimkho lub nroog Yelikaus no dua, tus ntawd yuav raug tus TSWV foom phem.
“Yog leejtwg tseem rov kho lub nroog no, nws tus tub hlob yuav tuag;
Yog leejtwg tseem rov kho tej roojloog, nws tus tub ntxawg yuav tuag.” #1Vaj 16:34
27Yogli ntawd, tus TSWV thiaj nrognraim Yausuas, ua rau nws lub koob lub npe nrov-ncha mus thoob lub tebchaws.
Currently Selected:
Yausuas 6: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
