Yausuas 5

1Thaum cov Amaules tej vajntxwv sawvdaws uas nyob ntawm tus dej Yauladees sab hnubpoob thiab cov Kana-as tej vajntxwv uas nyob raws ntug Hiavtxwv Meditelanees hnov xov hais tias tus TSWV ua rau tus dej Yauladees qhuav qhawv rau cov Yixalayees hla mus, lawv ntshai cov Yixalayees thiab poobsiab kawg li.

Ua Kevcai Txiav Ntawm Nkilenkas

2Thaum ntawd tus TSWV hais rau Yausuas tias, “Koj ciali muab cov pobzeb hauv sibtsoo kom ntse li hniav riam thiab muab cov Yixalayees ua kevcai txiav.” 3Yogli ntawd, Yausuas thiaj muab cov Yixalayees ua kevcai txiav saum lub roob uas hu ua Roob Kevcai Txiav rawsli tus TSWV xaaj.

4-6Thaum cov Yixalayees tawm hauv tebchaws Iziv los, cov txivneej puavleej ua kevcai txiav tag lawm. Tiamsis plaubcaug xyoo uas lawv los hla tiaj suabpuam, lawv yeej tsis tau muab ib tug menyuam tub twg ua kevcai txiav li. Thaum lub sijhawm ntawd xaus, cov txivneej uas muaj hnubnyoog ua taus tubrog uas los hauv tebchaws Iziv los, tau tuag tas lawm rauqhov lawv tsis mloog tus TSWV lus. Tej ntawd yog muaj rawsli tus TSWV tau hais tseg tias, yuav tsis pub lawv mus pom lub tebchaws uas muaj kua mis thiab zib ntab ntws nto uas Nws tau coglus tseg rau lawv cov yawgkoob lawm. #Teev 14:28-35 7Yogli ntawd, Yausuas thiaj muab lawv tej tub, cov uas sawv los nyob lawv lub chaw, ua kevcai txiav. Rauqhov cov menyuam tiam ntawd yeej tsis tau ua kevcai txiav li.

8Tomqab muab tagnrho cov txivneej ua kevcai txiav lawm, lawv thiaj so hauv lub yeej mus txog thaum uas lawv tej qhovtxhab zoo tag. 9Tus TSWV hais rau Yausuas tias, “Hnubno Kuv muab nej txoj kev poob ntsejmuag uas nej tau ua luag qhev thaum nej nyob nram tebchaws Iziv rho mus.” Yogli no thiaj muab thaj chaw ntawd hu ua Nkilenkas,#5:9: Nkilenkas: Lub npe no hais muaj ntsis thooj li lolus Henplais uas hais tias “raug muab tshem tawm.” niajhnub nimno luag tseem hu lub npe ntawd.

10Thaum cov Yixalayees tseem nyob ntawm Nkilenkas hauv lub tiajnrag uas ze lub nroog Yelikaus, lawv tau ua kevcai Hla Dhau rau hmo thib kaum-plaub ntawm lub hlis ntawd. #Khiav 12:1-13 11Hnub tomqab yog thawj hnub uas lawv tau noj tej qoobloo uas lawv ua tau hauv lub tebchaws Kana-as: yog cov ncuav tsis xyaw keeb thiab tej mov kib. 12Txij hnub ntawd Manas tsis poob saum ntuj los lawm, thiab cov Yixalayees tsis tau Manas noj li lawm. Txij thaum ntawd los ces lawv noj tej qoobloo uas lawv cog tau hauv tebchaws Kana-as lawm xwb. #Khiav 16:35

Yausuas Thiab Tus Uas Tuav Rab Ntaj

13Thaum Yausuas nyob ze lub nroog Yelikaus, nws txawm tsa muag pom ib tug txivneej tuav rawv ib rab ntaj sawv ntawm nws hauvntej. Yausuas txav zog mus ze thiab nug hais tias, “Koj yog peb ib tug tubrog los yog peb ib tug yeebncuab?”

14Tus txivneej ntawd teb tias, “Kuv tsis yog tog twg tubrog li. Kuv los no vim kuv yog tus TSWV pab tubrog tus thawj.”

Yausuas txhoscaug ntua rau hauv av pehawm thiab hais tias, “Tus tswv, kuv yog koj tus tubtxib; koj xav kom kuv ua dabtsi?”

15Tus thawj ntawm tus TSWV pab tubrog ntawd txawm hais rau Yausuas tias, “Ciali hle koj nkawm khau, vim thaj chaw uas koj sawv ko, yog qhov chaw dawbhuv.” Ces Yausuas txawm ua li nws hais.

Currently Selected:

Yausuas 5: MWW2022

Highlight

Copy