Yausuas 4
4
Teeb Pobzeb Cia Ua Chaw Nco
1Thaum haivneeg Yixalayees mus dhau tus Dej Yauladees rau sab tim ub tagnrho lawm, tus TSWV hais rau Yausuas tias, 2“Koj xaiv kaum-ob leeg ntawm cov Yixalayees, ib xeem twg ib leeg, 3thiab xaaj kom lawv khaws kaum-ob lub pobzeb hauv plawv Dej Yauladees ntawm thaj chaw uas cov povthawj hlob sawvntsug, los tso rau ntawm thaj chaw uas hmo no nej yuav mus tsuam chaw so.”
4Yausuas hu kaum-ob leeg uas nws twb xaiv tau lawm los cuag nws, 5thiab hais rau lawv tias, “Nej ciali mus rau hauv tus dej Yauladees uantej ntawm tus TSWV uas yog nej tus Vajtswv lub Phijxab Lus Cogtseg, thiab ib leeg khaws ib lub pobzeb kwv saum xubpwg los rau cov Yixalayees ib xeem ib lub. 6Cov pobzeb ntawd yuav ua lub cim rau cov neeg nco txog tej xwm uas tus TSWV tau ua los lawm. Yav tomntej yog nej cov tubki nug nej hais tias, ‘Cov pobzeb no yog piv txog dabtsi?’ 7Ces nej yuav tau qhia rau lawv tias thaum ub cov povthawj hlob kwv tus TSWV lub Phijxab Lus Cogtseg los hla tus dej Yauladees, ces tus dej txawm teev tsis ntws lawm. Cov pobzeb no yuav ua cim qhia rau cov Yixalayees ncontsoov txog tej xwm uas muaj rau ntawm thaj chaw no mus tag ib simneej.”
8Lawv txawm mus ua rawsli Yausuas xaaj. Lawv kwv kaum-ob lub pobzeb hauv plawv dej Yauladees los, ib lub rau ib xeem, coj los tso rau ntawm qhov chaw uas lawv tsuam yeej rawsli tus TSWV tau xaaj rau Yausuas lawm. 9Yausuas muab dua kaum-ob lub pobzeb teeb rau hauv plawv dej Yauladees ntawm qhov chaw uas cov povthawj hlob kwv lub Phijxab Lus Cogtseg los sawv. (Niajhnub no cov pobzeb ntawd tseem nyob hauv plawv dej.) 10Cov povthawj hlob sawv hauv plawv tus dej Yauladees mus txog thaum lawv ua txhua yam tiav tag rawsli tus TSWV tau xaaj kom Yausuas hais rau sawvdaws. Tej no yog tej uas Mauxes tau xaaj tseg.
Cov neeg mus ceevnrooj tag rau sab ntug dej tim ub. 11Thaum sawvdaws mus dhau rau sab tid lawm, cov povthawj hlob uas kwv tus TSWV lub Phijxab Lus Cogtseg mam los mus ua sawvdaws ntej. 12Cov txivneej uas yog xeem Lunpees, xeem Nkaj, thiab ibnrab xeem Manaxes, nqa lawv tej cuabyeej uarog hla ua sawvdaws ntej mus rawsli Mauxes twb hais tseg rau lawv lawm. 13Cov tubrog ntawd muaj kwvlam li ntawm 40,000 leej uas npaj txhij mus uarog, tau hla tus TSWV lub xubntiag mus rau hauv lub tiaj uas nyob ze lub nroog Yelikaus. 14Qhov uas tus TSWV ua hnub ntawv, ua rau cov Yixalayees hwm hais tias Yausuas yog ib tug neeg uas tseemceeb. Lawv tau hwm Yausuas mus tag nws simneej ib yam li lawv hwm Mauxes.
15Tus TSWV hais rau Yausuas tias, 16“Koj xaaj kom cov povthawj hlob uas kwv lub Phijxab Lus Cogtseg ciali tawm hauv tus dej Yauladees los.” 17Yausuas ua rawsli ntawd, 18ces thaum cov povthawj hlob tawm txog tim ntug dej lawm, dej txawm nphau nphwv los puv hav nkaus ib yam li qub.
19Hnub uas lawv hla tus dej Yauladees yog lub ib hlis ntuj hnub xiab kaum thiab lawv los tsuam yeej rau ntawm Nkilenkas, uas nyob ntawm lub nroog Yelikaus sab hnubtuaj. 20Yausuas txawm muab kaum-ob lub pobzeb uas lawv khaws hauv tus dej Yauladees los teeb rau ntawm thaj chaw ntawd. 21Yausuas hais rau cov Yixalayees tias, “Yav tomntej yog nej tej tubki nug nej hais tias, ‘Cov pobzeb no yog piv txog dabtsi?’ 22Nej yuav tau qhia rau nej cov tubki kom paub txog lub sijhawm uas cov Yixalayees tau taug kev qhuav qhawv hla hauv tus dej Yauladees los. 23Rauqhov tus TSWV uas yog nej tus Vajtswv, tau ua rau tus dej Yauladees qhuav rau nej mus ib yam li thaum ub Nws tau ua rau Hiavtxwv Liab nqhuab qhuav qhawv rau peb los. 24Vim muaj tej no, tej neeg uas nyob thoob ntiajteb thiaj yuav paub tias tus TSWV txhais tes yog txhais uas muaj hwjchim npaum licas, thiab nej thiaj yuav hwm tus TSWV uas yog nej tus Vajtswv mus ibtxhis li.”
Currently Selected:
Yausuas 4: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
