Yausuas 2
2
1Tomqab ntawd, Yausuas tau tso ob tug neeg soj tebchaws tawm hauv lawv lub yeej ntawm Akaxias mus soj lub nroog Yelikaus hauv tebchaws Kana-as. Thaum nkawd mus txog hauv lub nroog lawm, nkawd mus so hauv ib tug niamntiav uas npe hu ua Lahaj lub tsev. #Henpl 11:31; Yakau 2:25 2Tus vajntxwv uas kav lub nroog Yelikaus hnov tias hmo ntawd muaj cov neeg Yixalayees tau tuaj rau hauv nroog lawm, uas yog tuaj soj tebchaws. 3Yogli ntawd, vajntxwv thiaj tso neeg mus hais rau Lahaj tias, “Koj ciali coj ob tug txivneej uas tuaj rau hauv koj tsev tawm los, rauqhov nkawd yog tuaj soj peb lub tebchaws.”
4-6Lahaj teb tias, “Muaj ob tug txivneej tau los rau hauv kuv tsev no tiag, tiamsis kuv tsis paub tias xyov nkawd tuaj qhovtwg tuaj. Thaum tsausntuj zuag uantej tsis tau kaw lub roojloog, nkawd twb tawm mus lawm. Kuv tsis paub xyov nkawd yuav mus rau qhovtwg, tiamsis yog nej majnroos caum, nej yeej yuav caum cuag xwb.” (Tiamsis Lahaj twb coj ob tug neeg soj tebchaws ntawd mus zais rau hauvqab cov maj uas nws muab ziab rau saum rutsev, txheej tsev lastshav lawm.) 7Thaum vajntxwv cov neeg ntawd tawm mus dhau lawm, luag txawm muab lub roojloog kaw. Lawv mus nrhiav ob tug txivneej uas soj tebchaws ntawd ti nkaus nram ntug dej Yauladees ntu uas neeg pheej hla mus-los.
8Hmo ntawd uantej thaum ob tug txivneej soj tebchaws tsis tau pw, Lahaj nce mus rau saum rutsev, txheej tsev lastshav, 9thiab hais rau nkawd tias, “Kuv paub tias tus TSWV twb muab lub tebchaws no rau nej lawm. Txhua tus uas nyob hauv lub tebchaws no ntshai nej kawg li. 10Peb hnov tias thaum nej tawm hauv tebchaws Iziv los, tus TSWV tau ua rau Hiavtxwv Liab nqhuab qhuav qhawv rau nej mus; thiab peb tseem hnov txog qhov uas nej muab Xihoos thiab Aus, uas yog cov Amaules ob tug vajntxwv uas nyob ntawm ntug dej Yauladees sab hnubtuaj, tua povtseg lawm. #Khiav 14:21; Teev 21:21-35 11Thaum peb hnov txog tej no, peb ntshai kawg li; peb txhua tus qaugzog tag vim nej. Tus TSWV uas yog nej tus Vajtswv, yog tus Vajtswv uas kav saum ntuj thiab hauv ntiajteb no. 12Zaumno thov neb coglus ntawm Vajtswv rau kuv hais tias, neb yuav ua zoo rau kuv thiab kuv tsev neeg ib yam li kuv tau ua zoo rau neb lawm; thiab thov neb qhia ib qho cim ua timkhawv rau kuv, kom kuv thiaj yuav ntseeg tau neb. 13Thov neb coglus rau kuv hais tias neb yuav tseg kuv niam kuv txiv, kuv cov nus, kuv cov vivncaus, thiab tagnrho lawv tsev neeg! Tsis txhob cia luag muab peb tua!”
14Ob tug txivneej ntawd teb rau Lahaj tias, “Yog wb tsis ua rawsli wb hais, thov kom Vajtswv rho wb txojsia!#2:14: Yog wb … txojsia; lossis Yog koj tsomkwm wb, wb yuav tsomkwm koj thiab. Yog koj txhob qhia tej uas wb ua no rau leejtwg paub li, wb thov coglus rau koj hais tias, thaum tus TSWV muab lub tebchaws no rau peb lawm, peb yuav ua zoo rau nej.”
15Lahaj lub tsev yog ua npuab nkaus tus ntsayeej uas thaiv lub nroog, yogli ntawd nws txawm muab hlua dauv ntawm qhovrais raws tus ntsayeej sabnraud rau nkawd nqis mus. 16Nws hais rau nkawd tias, “Neb ciali khiav mus rau pem tej roob kom cov neeg uas tuaj nrhiav neb thiaj tsis pom. Neb yuavtsum nkaum peb hnub rau ped kom lawv rov los tag tso, neb yuav mus qhovtwg los neb mamli mus.”
17Ob tug txivneej ntawd hais rau Lahaj tias, “Wb yuav ua rawsli uas koj kom wb coglus rau koj. 18Koj yuavtsum ua li no. Thaum peb tuaj tua nej lub tebchaws, koj muab ib pluaj ntaub liab khi rau ntawm lub qhovrais uas koj dauv hlua rau wb nqis. Koj coj koj niam koj txiv, koj cov nus, thiab tagnrho koj tej txheebze tuaj nyob hauv koj tsev. 19Yog leejtwg tawm hauv koj tsev mus rau sabnraud, es raug tua tuag ces yog tim nws xwb, peb yuav tsis nrog paub; tiamsis yog cov uas nyob hauv koj tsev raug tua tuag, peb yuav ris lub txim ntawd. 20Tiamsis yog tias koj qhia tej uas wb ua no rau ib tug neeg twg paub, ces wb yuav tsis ua rawsli tej lus uas koj kom wb coglus rau koj.” 21Lahaj kuj pomzoo ua li ntawd thiab, nws thiaj xa nkawd mus. Thaum nkawd mus lawm, nws txawm muab ib pluaj ntaub liab khi rau ntawm qhovrais.
22Nkawd txawm khiav mus nkaum pem roob; mas vajntxwv cov neeg mus nrhiav nkawd rau txhua qhov tau peb hnub los nrhiav tsis tau li, ces lawv thiaj rov mus rau hauv Yelikaus lawm. 23Tomqab ntawd nkawd mamli nqis saum roob los hla tus dej Yauladees mus cuag Yausuas. Nkawd piav tej xwm ntawd huv tibsi rau Yausuas mloog, 24thiab nkawd hais ntxiv tias, “Wb paub tseeb hais tias tus TSWV twb muab tagnrho lub tebchaws no rau peb lawm; tej neeg uas nyob hauv lub nroog ntawd puavleej ntshai peb kawg li.”
Currently Selected:
Yausuas 2: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
