Yausuas 11
11
Yausuas Tua Yeej Yanpees Thiab Cov Tuaj Nws Tog
1Thaum Vajntxwv Yanpees uas kav lub nroog Haxaus hnov txog cov Yixalayees tej kev muajyeej ntawd, nws txawm xa xov mus rau Vajntxwv Yaunpas uas kav lub nroog Madoos, tus vajntxwv uas kav lub nroog Siloos, thiab tus vajntxwv uas kav lub nroog Akesas, 2cov vajntxwv uas nyob saum roob sab qaumteb, nyob hauv lub Hav Yauladees ntawm Hiavtxwv Kalilais sab qabteb, nyob ntawm taw roob, thiab nyob ntawm ntug hiavtxwv ze lub nroog Daus. 3Nws kuj tau hais mus rau cov Kana-as uas nyob raws ob sab ntug dej Yauladees, cov Amaules, cov Hitis, cov Pelixes, cov Yenpus uas nyob saum roob, thiab cov Hivis uas nyob ntawm taw roob Hawmoos hauv tebchaws Mixepas huv tibsi. 4Lawv coj tagnrho lawv cov tubrog tuaj, coob npaum li tej xuabzeb nram ntug hiavtxwv. Lawv muaj nees thiab tsheb nees ntau kawg li. 5Tagnrho cov vajntxwv no sibsau uake tuaj tsuam yeej rau ntawm ntug Dej Meloos tua cov Yixalayees.
6Tus TSWV hais rau Yausuas tias, “Tsis txhob ntshai lawv. Tagkis tav lub caij no, Kuv yuav muab lawv tua kom tuag tas huv tibsi pub rau cov Yixalayees. Koj ciali muab lawv tej nees txo leeg raws thiab hlawv lawv tej tsheb nees.” 7Yausuas thiab nws cov tubrog thiaj txeem mus tua lawv cov yeebncuab ntawm tus Dej Meloos thaum lawv tsis ras li. 8Tus TSWV twb muab cov yeebncuab cob rau cov Yixalayees tes lawm; lawv thiaj caum cov yeebncuab tua mus txog ntawm Milefus Ma-ees thiab Xidoos uas nyob sab qaumteb, thiab mus txog rau ntawm lub Hav Mixepas uas nyob sab hnubtuaj. Lawv sibtua mus txog thaum cov yeebncuab tuag tsis seem ib tug li. 9Yausuas ua rau cov yeebncuab rawsli tus TSWV tau xaaj rau nws lawm, uas yog muab lawv tej nees txo leeg raws thiab hlawv lawv tej tsheb nees.
10Yausuas rov los txeeb tau lub nroog Haxaus thiab muab tus vajntxwv uas kav lub nroog ntawd tua. (Thaum ntawd lub nroog Haxaus muaj hwjchim tshaj lwm lub nroog hauv lub tebchaws ntawd.) 11Lawv muab txhua tus uas nyob hauv lub nroog ntawd tua tuag tas tsis tseg ib tug li, thiab muab lub nroog hlawv.
12Yausuas tua yeej cov vajntxwv, txeeb tau lawv tej nroog, thiab muab txhua tus neeg tua tuag huv tibsi, rawsli tus TSWV tus tubtxib Mauxes, tau xaaj tseg lawm. 13Tiamsis cov Yixalayees tsis hlawv tej nroog uas nyob saum tej povroob, tsuas yog Yausuas muab tiblub nroog Haxaus hlawv xwb. 14Cov Yixalayees nqa tej khoom muajnqis thiab coj tej tsiajtxhu hauv lub nroog ntawd mus ua lawv tug. Tiamsis lawv muab cov neeg tua tuag tas tsis tseg ib tug li. 15Tus TSWV twb xaaj rau Nws tus tubtxib Mauxes, Mauxes thiaj xaaj rau Yausuas, thiab Yausuas ua rawsli tej lus ntawd. Yausuas ua txhua yam rawsli tus TSWV xaaj tseg.
Tej Cheebtsam Uas Yausuas Txeeb Tau
16Yausuas txeeb tau tagnrho lub tebchaws, uas yog tej laj roob thiab taw roob, tsis hais qabteb thiab qaumteb, tagnrho cheebtsam Nkausees, cheebtsam mojsab qhua uas nyob sab qabteb, thiab tagnrho lub Hav Yauladees. 17-18Cheebtsam sab qabteb txij ntua ntawm lub Roob Halaj uas ze rau ntawm Edoos, thiab sab qaumteb mus txog ntua Npa-as-nkas, hauv lub Hav Lenpanoos uas nyob sab qabteb ntawm lub Roob Hawmoos. Yausuas uarog nrog cov vajntxwv uas kav tej cheebtsam ntawd tau ntev loo, tiamsis nws puavleej ntes tau lawv thiab muab lawv tua povtseg huv tibsi lawm. 19Tsuas yog tshuav lub nroog Nkinpe-oos uas cov Hivis ibtxhia nyob rau hauv thiab tau nrog cov Yixalayees cog phoojywg lawm thiaj tsis raug tua xwb. Dua li lwm lub nroog puavleej yog lawv ntaus rog tau xwb. 20Tus TSWV ua kom lawv muaj lub siab tawv uarog nrog cov Yixalayees, kom lawv thiajli raug kev puastsuaj tag huv tibsi, uas yeej tsis muaj kev tabncuab hlo li. Tej no yog tej uas tus TSWV tau xaaj rau Mauxes lawm. #2Kev 7:16
21Lub sijhawm ntawd Yausuas mus tua thiab rhuav cov neeg Anaj uas loj thiab siab heev uas nyob saum tej povroob hauv lub nroog Henploos, lub nroog Denpis, lub nroog Anas, thiab tagnrho saum tej laj roob uas cov Yudais thiab cov Yixalayees nyob. Yausuas tua lawv thiab rhuav lawv tej nroog puastsuaj tag huv tibsi. 22Tsis tshuav cov neeg Anaj ib tug seem nyob hauv cov Yixalayees lub tebchaws li; tsuas tshuav tus puav nyob hauv Nkaxas, Nkaj, thiab Asedaus xwb.
23Yausuas txeeb tau tagnrho lub tebchaws rawsli tus TSWV tau xaaj tseg rau Mauxes lawm. Yausuas muab lub tebchaws faib rau cov Yixalayees txhua xeem, nyias nyob muaj nyias ciam av.
Yogli ntawd, cov Yixalayees thiaj tau so tsis uarog lawm.
Currently Selected:
Yausuas 11: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
