Yausuas 10
10
Lub Hnub Nres
1Adauni-xedej, uas ua vajntxwv kav lub nroog Yeluxalees#10:1: Yeluxalees: Thaum lub sijhawm ntawd tseem yog lub nroog Yenpus. hnov tias Yausuas mus tua tau lub nroog A-is, muab rhuav puastsuaj tag, thiab muab tus vajntxwv uas kav lub nroog ntawd tua tuag ib yam li tau ua rau lub nroog Yelikaus thiab tus vajntxwv uas kav lub nroog ntawd. Thiab nws tseem hnov tias cov Nkinpe-oos nrog cov Yixalayees cog phoojywg thiab nrog lawv nyob lawm. 2Cov neeg uas nyob hauv lub nroog Yeluxalees ntshai heev, rauqhov lub nroog Nkinpe-oos kuj loj ib yam li tej nroog uas muaj vajntxwv; thiab tseem loj dua lub nroog A-is, thiab lawv tej tubrog muaj peevxwm heev. 3Yogli ntawd, Vajntxwv Adauni-xedej thiajli tso neeg mus hais rau Vajntxwv Hauhas uas kav lub nroog Henploos, Vajntxwv Pilas uas kav lub nroog Yamus, Vajntxwv Yafias uas kav lub nroog Lakhis, thiab Vajntxwv Denpis uas kav lub nroog Enkiloos hais tias, 4“Thov nej tuaj pab kuv tua lub nroog Nkinpe-oos, rauqhov cov neeg uas nyob hauv lub nroog ntawd mus nrog Yausuas thiab cov Yixalayees cog phoojywg lawm.” 5Cov Amaules tsib tug vajntxwv, xwsli tus uas kav lub nroog Yeluxalees, lub nroog Henploos, lub nroog Yamus, lub nroog Lakhis, thiab lub nroog Enkiloos, thiaj koomtes tuaj tua lub nroog Nkinpe-oos.
6Cov Nkinpe-oos thiaj tso neeg tuaj cuag Yausuas hauv lub yeej uas nyob ntawm Nkilenkas hais tias, “Thov koj tsis txhob tso peb tseg! Thov koj ciali tuaj cawm peb thiab tuaj pab peb! Rauqhov cov Amaules cov vajntxwv uas nyob saum tej laj roob tau koom uake tuaj tua peb lawm!”
7Yogli ntawd Yausuas thiab tagnrho nws cov tubrog thiab cov tubrog uas ua tau tshajplaws thiaj sawvkev hauv Nkilenkas mus. 8Tus TSWV hais rau Yausuas tias, “Koj tsis txhob ntshai lawv hlo li. Kuv twb muab lawv cob rau koj txhais tes lawm. Yuav tsis muaj leejtwg tawmtsam yeej koj.” 9Yausuas thiab nws pab tubrog tawm hauv Nkilenkas maub ib hmo mus txog ntua lub nroog Nkinpe-oos, thiab lawv ciali tua thaum cov Amaules tsis faj li. 10Tus TSWV ua rau cov Amaules ceeb thaum uas lawv pom cov Yixalayees. Cov Yixalayees tua cov Amaules tuag coob heev rau hauv lub nroog Nkinpe-oos thiab caum lawv khiav hla lub dawm Npes Hauloos mus txog ntua lub nroog Axekas thiab lub nroog Makedas. 11Thaum cov Amaules khiav cov Yixalayees hla lub dawm ntawd mus, tus TSWV tso tej lawg uas loj heev saum ntuj los ntaus lawv mus ti nkaus lub nroog Axekas. Cov uas raug lawg ntaus tseem tuag coob tshaj cov uas raug cov Yixalayees tua.
12Hnub uas tus TSWV pab cov Yixalayees kovyeej cov Amaules ntawd, Yausuas hais rau tus TSWV tabmeeg cov Yixalayees tias,
“Lub hnub, ciali nres rau saum lub nroog Nkinpe-oos;
Lub hli, ciali nres rau saum lub Hav Aiyaloos.”
13Lub hnub txawm nres thiab lub hli txawm ciali tsis txav mus txog thaum cov Yixalayees kovyeej lawv cov yeebncuab. Zaj no tau muab sau tseg rau hauv Yasas Phau Ntawv. Lub hnub nres rau saum nruabntug tsis poob tau ib hnub nkaus. #2Xamu 1:18 14Tsis hais uantej ntawd lossis txij thaum ntawd los, yeej tsis tau muaj ib zaug uas tus TSWV yuav mloog neeg lus li hnub ntawd, vim yog tus TSWV tuaj cov Yixalayees tog ntaus rog!
15Tomqab ntawd, Yausuas thiab nws cov tubrog thiaj rov los rau hauv lub yeej uas nyob hauv Nkilenkas lawm.
Yausuas Ntes Tau Cov Amaules 5 Tus Vajntxwv
16Cov Amaules tsib tug vajntxwv tau khiav mus nkaum rau hauv lub qhovtsua Makedas. 17Muaj neeg mus pom lawv thiab tau los hais qhia rau Yausuas tias lawv khiav mus nkaum hauv lub qhovtsua Makedas. 18Yausuas hais tias, “Ciali dov ib co pobzeb loj-loj los txhaws lub qhovtsua, thiab tso neeg zov ntawm roojqho. 19Tiamsis nej tsis txhob ciali nyob ntawd xwb, nej yuavtsum caum cov yeebncuab mus thiab tuaj tomqab tua lawv; tsis txhob pub kom lawv khiav dim rov mus rau hauv lawv tej nroog li! Tus TSWV uas yog nej tus Vajtswv twb pub nej kovyeej lawv lawm.”
20Yausuas thiab cov Yixalayees thiaj tua cov yeebncuab tuag tas huvsi, tsuas yog muaj tus puav thiaj khiav mus nkaum rau ntawm tej ntsayeej uas thaiv lawv lub nroog, thiaj tsis raug tua. 21Yausuas cov tubrog tau rov los cuag nws hauv lub yeej Makedas, txhua tus puavleej nyob txhij-txhua.
Tsis muaj leejtwg yuav muaj cuabkav cem lossis tawmtsam cov Yixalayees li.
22Yausuas hais rau nws cov tubrog tias, “Nej ciali qhib lub qhovtsua thiab coj tsib tug vajntxwv ntawd los cuag kuv.” 23Lawv thiaj mus qhib lub qhovtsua thiab coj tsib tug vajntxwv uas kav lub nroog Yeluxalees, Henploos, Yamus, Lakhis, thiab Enkiloos, tawm hauv qhovtsua 24los cuag Yausuas. Yausuas thiaj hu tagnrho cov tubrog Yixalayees los cuag nws, thiab xaaj kom cov thawj tubrog uas tau nrog nws mus ntaus rog kom los xuas kotaw tsuj cov vajntxwv ntawd cajdab. Ces lawv txawm ua rawsli Yausuas hais. 25Yausuas hais rau cov thawj tubrog tias, “Nej tsis txhob ntshai lossis qaugzog. Nej ciali ua siab tawv qhawv thiab tsosiab rau tus TSWV, rauqhov Nws yeej yuav ua li no rau nej cov yeebncuab txhua tus.”
26Yausuas muab tsib tug vajntxwv ntawd tua thiab coj mus dai rau ntawm tsib tug ntoo ib hnub tsausntuj. 27Thaum lub hnub poobqho lawm, Yausuas thiaj xaaj kom cov tubrog mus muab cov vajntxwv ntawd txo thiab coj mus pov rau hauv lub qhovtsua uas lawv tau khiav mus nkaum. Lawv tau muab ib co pobzeb loj-loj los txhaws lub qhovtsua. Niajhnub no tej pobzeb ntawd tseem nyob.
Yausuas Txeeb Tau Amaules Tej Nroog
28Hnub ntawd Yausuas tau mus tua thiab txeeb tau lub nroog Makedas, nws ntes tau lawv tus vajntxwv. Nws muab tus vajntxwv thiab cov pejxeem tua tuag tas tsis tseg ib tug li. Nws ua rau Makedas tus vajntxwv ib yam li nws tau ua rau lub nroog Yelikaus tus vajntxwv thiab.
29Tomqab ntawd, Yausuas thiab nws cov tubrog tawm hauv lub nroog Makedas mus tua lub nroog Linas. 30Tus TSWV pub cov Yixalayees kovyeej lub nroog thiab tus vajntxwv hauv lub nroog ntawd. Lawv tua txhua tus thiab yeej tsis tseg ib tug li. Lawv ua rau tus vajntxwv ntawd ib yam li lawv tau ua rau lub nroog Yelikaus tus vajntxwv thiab.
31Tomqab ntawd, Yausuas thiab nws cov tubrog tawm hauv lub nroog Linas mus vij thiab tua lub nroog Lakhis. 32Hnub thib ob, tus TSWV pub rau cov Yixalayees kovyeej lub nroog Lakhis. Lawv ua rau lub nroog no ib yam li lawv ua rau lub nroog Linas, uas yog tua txhua tus thiab yeej tsis tseg ib tug li. 33Vajntxwv Haulas uas kav lub nroog Nkexaws tau tuaj pab lub nroog Lakhis, tiamsis Yausuas lawv tau tua nws thiab nws cov tubrog tuag tag tsis tseg ib tug li.
34Tomqab ntawd, Yausuas thiab nws cov tubrog tawm hauv lub nroog Lakhis mus vij thiab tua lub nroog Enkiloos. 35Hnub uas lawv txeeb tau lub nroog ntawd, lawv tua cov neeg hauv tuag tag tsis tseg ib tug ib yam li lawv ua rau lub nroog Lakhis thiab.
36Tomqab ntawd Yausuas thiab nws cov tubrog tawm hauv Enkiloos nce tej laj roob mus tua lub nroog Henploos, 37thiab txeeb tau lub nroog ntawd. Lawv tua tus vajntxwv thiab cov pejxeem tuag tag ib yam li lawv ua rau cov moos uas nyob ibncig ntawd. Yausuas lawv ua rau lub nroog thiab cov neeg puastsuaj tag ib yam li lawv ua rau lub moos Enkiloos, uas yeej tsis tseg ib tug li.
38Ces Yausuas thiab nws cov tubrog tig rov los tua lub moos Denpis. 39Nws txeeb tau lub nroog nrog rau tus vajntxwv thiab cov moos uas nyob ibncig ntawd. Lawv muab txhua tus tua tag huv tibsi. Yausuas ua rau lub nroog Denpis tus vajntxwv ib yam li nws tau ua rau lub moos Henploos thiab lub nroog Linas thiab nws tus vajntxwv lawm.
40Yausuas tua yeej thoobplaws lub tebchaws. Nws tua yeej tus vajntxwv uas nyob saum laj roob, nyob zaj ntav toj sab hnubtuaj, nyob zaj taw roob sab hnubpoob, thiab zaj mojsab sab qabteb. Nws tua txhua tus tsis tseg ib tug li. Nov yog qhov uas tus TSWV uas yog cov Yixalayees tus Vajtswv tau xaaj tseg lawm. 41Yausuas tua yeej txij ntua ntawm Kades Npane-as uas nyob sab qabteb mus rau Nkaxas uas nyob ze ntug hiavtxwv, thiab tau tagnrho cheebtsam Nkausees mus txog ntua Nkinpe-oos uas nyob sab qaumteb. 42Yausuas ua tibzaug tua yeej cov vajntxwv no thiab lawv tej nroog, rauqhov tus TSWV uas yog cov Yixalayees tus Vajtswv yog tus tua pub rau cov Yixalayees. 43Tomqab ntawd, Yausuas thiab nws cov tubrog thiaj rov los rau hauv lub yeej uas nyob ntawm Nkilenkas.
Currently Selected:
Yausuas 10: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
