Yausuas 1
1
Vajtswv Hais Kom Yausuas Mus Tua Tebchaws Kana-as
1Thaum Mauxes uas yog tus TSWV tus tubtxib tuag lawm, tus TSWV hais rau Noos tus tub Yausuas uas pab Mauxes tias, 2“Kuv tus tubtxib Mauxes tuag lawm. Zaumno koj thiab cov Yixalayees ciali npaj hla dej Yauladees mus rau lub tebchaws uas Kuv yuav muab rau lawv. 3Kuv tau coglus tseg rau Mauxes lawm hais tias, txhua thaj av uas nej txhais kotaw mus tsuj, Kuv yuav muab rau nej. #2Kev 11:24-25 4Nej tus ciam yog txij ntua ntawm tiaj suabpuam uas nyob sab qabteb mus txog rau sab qaumteb ntawm Roob Lenpanoos; sab hnubtuaj yog txij ntua ntawm tus Dej Yufatis, tagnrho tebchaws Hitis mus ti nkaus rau Hiavtxwv Meditelanees uas nyob rau sab hnubpoob. 5Yausuas, yuav tsis muaj leejtwg tawmtsam yeej koj mus tag koj simneej. Kuv yuav nrognraim koj ib yam li Kuv nrog Mauxes. Kuv yuav nrognraim koj thiab yuav tsis tso koj tseg hlo li.#2Kev 31:6, 8; Henpl 13:5
6“Ciali ua siab tawv qhawv thiab tsis txhob ntshai, rauqhov koj yog tus yuav coj cov neeg no mus nyob hauv lub tebchaws uas Kuv tau coglus yuav muab rau lawv cov yawgkoob lawm. #2Kev 31:6, 7, 23 7Ciali ua siab tawv qhawv thiab tsis txhob ntshai kiag li; ncontsoov coj tagnrho tej Kevcai uas Kuv tus tubtxib Mauxes tau muab rau koj lawm. Tsis txhob tig ntawm txoj Kevcai no mus rau phab xis los yog phab laug, kom koj mus rau qhovtwg los koj thiaj yuav muaj kev vammeej. 8Tsis txhob cia phau ntawv Kevcai no nrug ntawm koj lub qhovncauj mus. Yuavtsum niajhnub niajhmo kawm thiab ua rawsli tej lus ntawd txhua lo, kom koj tes haujlwm thiaj yuav lojhlob thiab vammeej. 9Ncontsoov Kuv tej lus xaaj tias koj yuavtsum ua siab tawv qhawv thiab tsis txhob ntshai! Tsis txhob txhawj thiab tsis txhob poobsiab, rauqhov Kuv yog tus TSWV, uas yog koj tus Vajtswv, Kuv yuav nrognraim koj txhua qhov uas koj mus.”
Yausuas Hais Rau Cov Yixalayees
10Yausuas thiaj xaaj rau cov thawjcoj kom 11mus thoobplaws hauv lub yeej thiab hais rau cov pejxeem, “Ciali npaj zaub-mov kom txaus, rauqhov tshuav peb hnub saum no xwb nej yuav hla dej Yauladees mus rau hauv lub tebchaws uas tus TSWV uas yog nej tus Vajtswv yuav muab rau nej.”
12Yausuas hais rau xeem Lunpees, xeem Nkaj, thiab ibnrab xeem Manaxes hais tias, #Teev 32:28-32; 2Kev 3:18-20; Yaus 22:1-6 13“Nej yuavtsum ncontsoov tej lus uas tus TSWV tus tubtxib Mauxes tau qhia rau nej lawm hais tias, tus TSWV uas yog nej tus Vajtswv yuav muab lub tebchaws ntawm tus dej Yauladees sab hnubtuaj rau nej nyob. 14Cia nej pojniam menyuam thiab tej tsiajtxhu nyob ntawm no. Tiamsis nej cov tubrog, uas muaj cuabyeej tua rog, kom hla dej ua cov Yixalayees ntej mus pab lawv ntaus tebchaws, 15mus txog thaum lawv tua yeej thiab txeeb tau lub tebchaws ntawm tus dej Yauladees sab hnubpoob uas tus TSWV uas yog nej tus Vajtswv muab pub rau lawv tso. Thaum tus TSWV pub rau cov Yixalayees txhua xeem tau nyob kajsiab lug lawm, nej mamli rov los rau hauv nej lub tebchaws uas nyob ntawm tus dej Yauladees sab hnubtuaj, uas tus TSWV tus tubtxib Mauxes tau muab rau nej lawm.”
16Lawv teb Yausuas hais tias, “Peb yuav ua txhua yam rawsli koj hais thiab yuav mus rau txhua qhov uas koj xa peb mus. 17Peb yuav mloog koj lus ib yam li peb ibtxwm mloog Mauxes lus, thiab thov tus TSWV uas yog koj tus Vajtswv nrognraim koj ib yam li Nws tau nrognraim Mauxes! 18Yog leejtwg tawv nyom koj tej lus xaaj thiab tsis ua rawsli koj hais, tus ntawd yuav raug muab tua povtseg. Koj ciali ua siab tawv qhawv thiab tsis txhob ntshai kiag li!”
Currently Selected:
Yausuas 1: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
