Yauhas 21

Yexus Los Tshwm Rau Xya Leej Thwjtim Pom

1Dhau ntawd, Yexus rov los tshwm rau Nws cov thwjtim pom nram ntug Hiavtxwv Tinpelias#21:1: Hiavtxwv Tinpelias kuj yog Hiavtxwv Kalilais thiab. Zaj no yog tshwmsim li no. 2Ximoos Petus, Thaumas (tus uas muaj dua ib lub npe hu ua Ntxaib), Nathana-ees (tus uas nyob hauv lub zos Kanas xeev Kalilais), Xenpedais ob tug tub, nrog rau Yexus ob tug thwjtim, lawv tuaj nyob uake. 3Ximoos Petus hais rau lawv tias, “Kuv yuav mus ntaus ntses.”

Lawv hais rau Petus tias, “Peb yuav nrog koj mus thiab.” Yogli ntawd, lawv txawm nce rau hauv nkoj, tiamsis hmo ntawd lawv ntaus ib hmos tsis tau ib tug ntses li. #Lukas 5:5 4Thaum lub hnub pib tawm tuaj, Yexus los sawv tim ntug dej, tiamsis cov thwjtim tsis paub tias yog Yexus. 5Yexus nug lawv hais tias, “Cov menyuam, nej ntaus puas tau ntses li os?”

Lawv teb tias, “Tsis tau ib tug kiag li.”

6Yexus hais rau lawv tias, “Ciali muab nej lub vas ntaus mus rau sab xis ntawm nej lub nkoj, nej thiaj yuav tau ntses.” Yogli ntawd, lawv thiaj muab lub vas ntaus mus rau hauv thiab mag ntses ntau kawg li, ua rau lawv rub tsis taus lub vas los rau saum nkoj li. #Lukas 5:6

7Tus thwjtim uas Yexus hlub hais rau Petus tias, “Tus uas nyuamqhuav haislus rau peb no yog peb tus Tswv ntag los sav!” Thaum Petus hnov dheev hais tias yog tus Tswv, nws txawm muab nws lub tsho ntev los hnav (rauqhov nws muab hle lawm) ces nws txawm dhia rau hauv dej. 8Cov thwjtim uas tseem nyob hauv lub nkoj thiaj nquam lub nkoj thiab rub lub vas uas mag ntses puvnkaus ntawd los rau tim ntug, rauqhov lawv nyob tsis deb ntawm ntug dej kwvlam li 100 mev xwb. 9Thaum lawv mus txog rau tim ntug, lawv pom ib cub thee cig-cig uas twb muaj ntses thiab ncuav ci nyob rau saud lawm. 10Yexus hais rau lawv tias, “Nqa tus puav ntses uas nej nyuamqhuav ntaus tau los ntawm no seb.”

11Ximoos Petus nce rau hauv lub nkoj thiab rub lub vas uas mag tau ntses puvnkaus ntawd los rau tim ntug. Cov ntses ntawd yog tib cov ntses loj xwb, tagnrho muaj 153 tug; txawm yog mag tau ntses ntau npaum li ntawd los lub vas yeej tsis ntuag ib qho li. 12Yexus hais rau lawv tias, “Nej ciali los noj tshais.” Cov thwjtim yeej tsis muaj ib tug uas yuav muaj cuabkav nug Yexus hais tias, “Koj yog leejtwg?” rauqhov lawv twb paub lawm hais tias Nws yog lawv tus Tswv. 13Yogli ntawd, Yexus txawm mus muab ncuav thiab muab ntses los faib rau lawv noj.

14No yog zaum thib peb uas Yexus tau los tshwm rau cov thwjtim pom, tomqab uas Nws sawv hauv qhovtuag rovqab los lawm.

Yexus Thiab Petus

15Thaum lawv noj tshais tas lawm, Yexus hais rau Ximoos Petus tias, “Ximoos Yauhas tus tub, koj hlub Kuv tshaj lawv cov no lov?”

Ximoos teb Yexus hais tias, “Yog lau, tus Tswv, Koj yeej paub tias kuv hlub Koj.”

Yexus hais rau nws tias, “Ciali yug Kuv cov menyuam yaj nawb.” 16Yexus rov hais dua zaum thib ob hais tias, “Ximoos Yauhas tus tub, koj puas hlub Kuv?”

Ximoos teb Yexus hais tias, “Tus Tswv, Koj yeej paub tias kuv hlub Koj.”

Yexus hais rau nws tias, “Ciali saib Kuv pab yaj nawb.” 17Yexus rov hais dua zaug thib peb hais tias, “Ximoos Yauhas tus tub, koj puas hlub Kuv?”

Petus nyuajsiab heev rauqhov Yexus nug nws txog peb zaug hais tias, “Koj puas hlub Kuv?” Petus thiaj hais rau Yexus tias, “Tus Tswv, Koj yeej paub ibpuas tsavyam huv tibsi; Koj paub tias kuv yeej hlub Koj!”

Yexus hais rau Petus tias, “Ciali yug Kuv pab yaj nawb. 18Kuv qhia tseeb rau koj hais tias, thaum koj tseem hluas koj xav mus qhovtwg, koj ciali tu cev zoj zeeg mus xwb. Tiamsis thaum koj laus lawm, koj yuav xyab tes rau luag khi, muaj neeg yuav kho khaubncaws rau koj hnav thiab luag yuav coj koj mus rau qhov chaw uas koj tsis xav mus.” 19(Yexus hais li no yog Nws qhia txog Petus txoj kev tuag uas yuav ua rau Vajtswv tau koobmeej.) Ces Yexus hais rau Petus tias, “Ciali nrog Kuv mus!”

Yexus Thiab Tus Thwjtim Uas Nws Hlub

20Petus tig los pom tus thwjtim uas Yexus hlub nyob tom nkawd qab; nws yog tus uas txeev zaum pheeb rau ntawm Yexus thaum lawv noj hmo thiab nug hais tias, “Tus Tswv, leejtwg yog tus uas yuav ntxeevsiab rau Koj?” #Yauh 13:25 21Thaum Petus pom tus thwjtim ntawd, nws txawm nug Yexus hais tias, “Tus Tswv, ua li tus txivneej no ne, yuav ua licas?”

22Yexus teb Petus hais tias, “Yog Kuv xav cia nws nyob mus txog hnub uas Kuv rovqab los, los yuav txog koj nkig dabtsi? Koj ciali nrog Kuv mus!”

23Zaj no nrov-ncha mus thoobplaws rau tej kwvtij sawvdaws hais tias, tus thwjtim ntawd yuav tsis tuag. Tiamsis Yexus tsis tau hais tias, tus thwjtim ntawd yuav tsis tuag; Nws tsuas hais tias, “Yog Kuv xav cia nws nyob mus txog hnub uas Kuv rovqab los, los yuav txog koj nkig dabtsi?” no xwb.

24Tus thwjtim ntawd ntag yog tus uas ua timkhawv txog tej no, thiab muab tej no sau tseg cia rau hauv ntawv; thiab peb paub tias tej lus uas nws hais no yog lus tseeb xwb.

Lus Xaus

25Tseem muaj ntau yam uas Yexus tau ua tas los lawm. Yog yuav muab tej ntawd sau tagnrho cia rau hauv ntawv, kuv xav tias lub ntiajteb no yuav tsis muaj chaw txaus ntim tej ntawv ntawd.

Currently Selected:

Yauhas 21: MWW2022

Highlight

Copy