Yauhas 20

Yexus Sawv Hauv Qhovtuag Rov Los

(Mathais 28:1-20; Malakaus 16:1-8; Lukas 24:1-12)

1Hnubkaj#20:1: Hnubkaj yog hnub ib. thaum kajntug txoog uas tseem tsis tau pomkev pestsawg, Malis Madalas mus tom lub qhovntxa thiab pom daim lagzeb uas npog lub rooj ntxas twb muab rho rau ib sab lawm. 2Malis txawm khiav rovqab los cuag Ximoos Petus thiab tus thwjtim uas Yexus hlub, thiab hais rau nkawd tias, “Lawv twb muab tus Tswv nqa tawm hauv lub qhovntxa lawm, peb tsis paub xyov lawv coj Nws mus tso rau qhovtwg lawm!”

3Petus thiab tus thwjtim ntawd txawm mus rau tom lub qhovntxa. 4Nkawd khiav mus tiamsis tus thwjtim ntawd khiav ceev dua Petus, nws thiaj xub mus txog ntawm lub qhovntxa. 5Nws khoov ntshis mus xauj thiab pom daim ntaub mag nyob hauv, tiamsis nws tsis nkag mus rau hauv. 6Thaum Ximoos Petus raws qab mus txog, nws txawm nkag plaws mus saib hauv lub qhovntxa. Nws pom daim ntaub mag hle ua ib pawg rau hauv, 7thiab nws pom txoj phuam uas qhwv Yexus taubhau tais nyob rau ibcag, tsis nyob nrog daim ntaub mag uas qhwv Yexus lub cev. 8Thaum ntawd tus thwjtim uas xub mus txog ntawm lub qhovntxa kuj nkag rau hauv thiab, nws tau pom thiab ntseeg. ( 9Nkawd tseem tsis tau totaub Vajtswv Txojlus uas hais tias, Yexus yuav sawv hauv qhovtuag rovqab los.) 10Ces nkawd txawm rovqab mus tsev lawm.

Yexus Tshwm Rau Malis Madalas Pom

(Mathais 28:9-10; Malakaus 16:9-11)

11Malis tseem sawv quaj ntawm lub qhovntxa sabnraud. Thaum nws tseem quaj-quaj, nws txawm khoov ntshis xauj hauv lub qhovntxa; 12nws pom ob tug timtswv ceebtsheej hnav ristsho dawbpaug zaum ntawm qhov chaw uas tso Yexus lub cev rau, ib tug nyob pem taubhau thiab ib tug nyob nram kotaw. 13Nkawd nug Malis hais tias, “Uacas koj quaj?”

Malis teb nkawd hais tias, “Lawv tau muab kuv tus Tswv nqa tawm mus lawm, thiab kuv tsis paub xyov lawv muab Nws coj mus tso rau qhovtwg li lawm!”

14Thaum ntawd nws tig hlo los pom Yexus sawvntsug nyob ntawd, tiamsis nws tsis paub tias yog Yexus. 15Yexus nug Malis hais tias, “Uacas koj quaj? Koj tabtom tuaj nrhiav leejtwg?”

Malis xav tias tus txivneej no yog tus uas tu lub vaj ntawd, nws thiaj nug hais tias, “Tus tswv, yog koj muab Nws coj mus tso rau qhovtwg lawm, thov koj qhia rau kuv, kuv yuav mus muab Nws lub cev.”

16Yexus hais rau Malis tias, “Malis 'e!”

Malis tig hlo mus rau ntawm Yexus, thiab ua lus Henplais hais tias, “Lanpaunis!” (Lolus no txhais hais tias, “Xibhwb.”)

17Yexus hais rau Malis tias, “Tsis txhob tuav Kuv, rauqhov Kuv tseem tsis tau rov mus cuag Kuv Txiv. Koj ciali mus hais rau Kuv cov kwvtij tias, Kuv yuav rov mus cuag tus uas yog Kuv Txiv thiab yog nej Txiv, nws yog Kuv tus Vajtswv thiab yog nej tus Vajtswv.”

18Yogli ntawd, Malis Madalas thiaj rovqab mus qhia rau cov thwjtim hais tias, “Kuv twb pom tus Tswv lawm”; thiab nws qhia lawv hais tias Yexus tau qhia tej ntawd rau nws.

Yexus Los Tshwm Rau Nws Cov Thwjtim Pom

(Mathais 28:16-20; Malakaus 16:14-18; Lukas 24:36-49)

19Hnubkaj thaum tsausntuj, cov thwjtim sibsau uake rau hauv ib lub tsev thiab liaj qhovrooj khovkho, rauqhov lawv ntshai cov Yudais tej nomtswv. Thaum ntawd, Yexus txawm los sawv nruabnrab hauv lawv thiab hais rau lawv tias, “Thov kom nej muaj kev nyabxeeb!” 20Thaum Yexus hais li ntawd tas, Nws cev Nws ob txhais tes thiab thws Nws sab tav rau lawv saib. Thaum cov thwjtim pom tus Tswv lawm, lawv zoosiab kawg li. 21Yexus rov hais rau lawv dua tias, “Thov kom nej tau zoo nyob kajsiab lug! Leejtxiv txib Kuv los licas, Kuv yuav txib nej mus li ntawd.” 22Ces Nws txawm tshuab pa rau lawv thiab hais tias, “Nej ciali txais yuav Vaj Ntsujplig tus Dawbhuv. 23Yog nej zamtxim rau leejtwg, Vajtswv yuav zamtxim rau tus ntawd; yog nej tsis zamtxim rau leejtwg, Vajtswv yuav tsis zam rau tus ntawd thiab.” #Math 16:19; 18:18

Yexus Thiab Thaumas

24Thaumas (tus uas muaj dua ib lub npe hu ua Ntxaib) yog ib tug ntawm kaum-ob tug thwjtim, nws tsis tau nrog cov thwjtim nyob uake thaum Yexus los tshwm rau lawv pom. 25Cov thwjtim qhia rau Thaumas hais tias, “Peb twb pom tus Tswv lawm!”

Thaumas hais rau lawv tias, “Yog kuv tsis pom cov qhov ntsia hlau ntawm Nws xibteg, thiab tsis tau muab kuv tus ntivtes lij cov qhov ntsia hlau thiab yog kuv tsis tau xuas lub qhov uas lawv nkaug Nws sab tav, mas kuv yeej tsis ntseeg li.”

26Tau ib lub limtiam tomqab Yexus cov thwjtim rov tuaj sibsau rau hauv tsev dua, zaum no Thaumas nrog lawv nyob. Lawv liaj qhovrooj khovkho, tiamsis Yexus ciali los sawv nruabnrab hauv lawv thiab hais tias, “Thov kom nej tau zoo nyob kajsiab lug!” 27Ces Yexus hais rau Thaumas tias, “Koj ciali cev koj tus ntivtes los rau ntawm no thiab los saib Kuv ob txhais tes. Cev koj txhais tes los xuas lub qhov ntawm kuv sab tav. Tsis txhob ua xyemxyav, ciali ntseeg!”

28Thaumas teb Yexus hais tias, “Kuv tus Tswv thiab kuv tus Vajtswv!”

29Yexus hais rau nws tias, “Koj ntseeg vim koj pom Kuv lawm puas yog? Tus uas tsis tau pom Kuv tiamsis nws twb ntseeg lawm, tus ntawd muaj kev kajsiab kawg nkaus!”

Lub Homphiaj Ntawm Phau Ntawv No

30Yexus tau ua ntau yam txujci tseemceeb rau Nws cov thwjtim pom, uas tsis tau muab sau cia rau hauv phau ntawv no. 31Tiamsis tej uas sau cia rau hauv phau ntawv no yog sau los qhia kom nej ntseeg#20:31: ntseeg; tej phau ntawv qub uas xuas tes sau, muaj rausiab ntseeg mus li. hais tias, Yexus yog tus Mexiyas uas yog Vajtswv tus Tub, los ntawm qhov uas nej ntseeg Nws, nej yuav tau txojsia.

Currently Selected:

Yauhas 20: MWW2022

Highlight

Copy