Yauhas 19

1Ces Philaj txawm coj Yexus mus rau cov tubrog nplawm. 2Cov tubrog muab pos kausntsaj qhaib ua ib lub kausmom looj Yexus taubhau; thiab muab ib lub tsho ntev tsamxem rau Nws hnav. 3Lawv los rau ntawm Nws thiab hais tias, “Thov kom cov Yudais tus vajntxwv muaj sia nyob ntev!” Thiab lawv xuas tawgncuav rau Nws ntsejmuag.

4Philaj rov tawm tuaj ib zaug ntxiv thiab hais rau cov neeg ntawd tias, “Nej saib maj, kuv yuav coj Nws tawm tuaj nraum no rau nej, kom nej pom tias kuv yeej tsis pom Nws tau ua ib qhov txhaum uas yuav txaus rautxim li.” 5Yogli ntawd, Yexus thiaj tawm los, Nws ntoo rawv lub kausmom pos thiab hnav lub tsho ntev tsamxem. Philaj hais rau lawv tias, “Nej saib! Tus txivneej uas kuv hais ntawd nyob ntawm no!”

6Thaum cov thawj povthawj hlob thiab cov tub ceevxwm pom Yexus, lawv qw nrov-nrov hais tias, “Muab Nws ntsia rau saum ntoo khaublig! Muab Nws ntsia rau saum ntoo khaublig!”

Philaj hais rau lawv tias, “Yogli ntawd ces nej ciali coj Nws mus thiab muab Nws ntsia rau saum ntoo khaublig. Ntawm kuv, kuv yeej tsis pom ib qho txhaum uas yuav txaus rautxim rau Nws li.”

7Cov Yudais teb Philaj hais tias, “Peb muaj ib txoj kevcai uas hais tias Nws yuavtsum tuag, rauqhov Nws khav hais tias Nws yog Vajtswv tus Tub.”

8Thaum Philaj hnov lawv hais li ntawd, ua rau Philaj yimhuab ntshai heev. 9Philaj rov mus hauv lub loog thiab nug Yexus hais tias, “Koj nyob qhovtwg tuaj?”

Tiamsis Yexus tsis teb ib los li. 10Philaj hais rau Yexus tias, “Koj txawm tsis teb kuv li lov? Koj puas paub tias kuv muaj hwjchim uas tso tau Koj, thiab muab Koj ntsia rau saum ntoo khaublig?”

11Yexus teb tias, “Koj yuav tsis muaj hwjchim loj dua Kuv, yog tias tsis yog Vajtswv muab rau koj. Yogli ntawd, tus uas ntes Kuv tuaj rau koj, tseem muaj txim loj dua koj thiab.”

12Thaum Philaj hnov li ntawd, nws yeej xav nrhiav ib txojkev tso kom tau Yexus. Tiamsis cov Yudais hais nrov-nrov tias, “Yog koj tseem muab Nws tso mus thiab, mas koj yeej tsis yog Xixas tus phoojywg ib zaug li! Tus uas khav hais tias nws yog vajntxwv, tus ntawd yeej yog tawmtsam Xixas xwb ntag!”

13Thaum Philaj hnov li ntawd, nws txawm coj Yexus tawm los rau sabnraud thiab nws mus nyob saum lub rooj txiavtxim, uas hu ua “Pua Pobzeb.” (Lub npe ntawd lus Henplais hu ua “Nkanpathas.”) 14Hnub ntawd kwvlam tavsu, yog hnub uas uantej hnub ua kevcai Hla Dhau. Philaj hais rau cov Yudais tias, “No yog nej tus vajntxwv!”

15Lawv qw nrov-nrov hais tias, “Muab Nws tua! Muab Nws tua! Muab Nws ntsia rau saum ntoo khaublig!”

Philaj thiaj nug lawv hais tias, “Nej xav kom kuv muab nej tus vajntxwv ntsia rau saum ntoo khaublig lov?”

Cov thawj povthawj hlob teb tias, “Peb tsis muaj lwmtus vajntxwv li, tsuas yog muaj Xixas xwb!”

16Ces thaum kawg, Philaj thiajli muab Yexus cob rau lawv coj mus ntsia rau saum ntoo khaublig.

Yexus Raug Ntsia Rau Saum Ntoo Khaublig

(Mathais 27:32-44; Malakaus 15:21-32; Lukas 23:26-43)

Yogli ntawd, cov tubrog thiajli coj Yexus tawm mus; 17Yexus kwv Nws tus ntoo khaublig tawm mus txog ntawm qhov chaw uas hu ua “Pobtxha Taubhau.” (Lus Henplais hu ua “Khaulakhauthas.”) 18Nyob qhov ntawd, lawv muab Yexus ntsia rau saum ntoo khaublig; lawv kuj muab ob tug txivneej tuaj ntsia rau saum ntoo khaublig thiab; ib leeg nyob ib sab thiab Yexus nyob nruabnrab. 19Philaj sau ib cov lus ntsia rau saum tus ntoo khaublig, nyeem hais tias: “Yexus neeg Naxalev, uas yog cov Yudais tus Vajntxwv.” 20Cov Yudais coob leej yeej tau nyeem daim ntawv ntawd, rauqhov thaj chaw uas muab Yexus ntsia rau ntawd nyob tsis deb ntawm lub nroog. Daim ntawv ntawd tau muab sau ua lus Henplais, lus Latees, thiab lus Kilis. 21Cov thawj povthawj hlob hais rau Philaj tias, “Tsis txhob sau hais tias, ‘Cov Yudais tus Vajntxwv,’ tiamsis sau hais tias, ‘Tus txivneej no hais tias, Kuv yog cov Yudais tus Vajntxwv.’ ”

22Philaj teb tias, “Kuv sau licas, yuav li ntawd xwb.”

23Tomqab uas cov tubrog muab Yexus ntsia rau saum ntoo khaublig lawm, lawv muab Yexus tej ristsho los faib ua plaub feem, ib leeg yuav ib feem. Lawv tseem muab Yexus lub tsho ntev sabhauv lawm thiab, lub tsho ntev ntawd yeej ntos thoobplaws tsis muaj kab leejleeg li. 24Cov tubrog sibtham hais tias, “Peb tsis txhob muab lub tsho no dua, tiamsis cia peb muab twv seb leejtwg tau.” Tej uas lawv ua no, muaj tiav rawsli Vajtswv Txojlus uas hais tias:

“Lawv muab Kuv tej ristsho sibfaib rau lawv,

thiab twv seb leejtwg tau Kuv lub tsho ntev.”

Yogli, cov tubrog yeej tau ua li ntawd tiag. #Nnkauj 22:18

25Thaum ntawd Yexus niam, Yexus niam tus niamhluas, Malis uas yog Kelupas tus pojniam, thiab Malis Madalas, lawv sawv ze ntawm Yexus tus ntoo khaublig. 26Thaum Yexus pom Nws niam thiab tus thwjtim uas Nws hlub sawv uake ze ntawd, Yexus hais rau Nws niam tias, “Tus ntawm ko yog koj tus tub.”

27Yexus hais rau tus thwjtim ntawd tias, “Tus ntawm ko yog koj niam.” Txij thaum ntawd los, tus thwjtim ntawd txawm coj Yexus niam mus nrog nws nyob lawm.

Yexus Txoj Kev Tuag

(Mathais 27:45-56; Malakaus 15:33-41; Lukas 23:44-49)

28Yexus paub tias zaumno txhua yam tiav tas lawm, thiab qhov uas yuav ua kom Vajtswv Txojlus tiav, Nws thiaj hais tias, “Kuv nqhis dej.” #Nnkauj 69:21; 22:15

29Nyob rau ntawd muaj ib taig cawv txivhmab qaub, lawv txawm muab ib lub xwbkuab los raus cov cawv txivhmab qaub ntawd thiab muab chob rau ntawm ib tug pas uas yog ntoo hixauv, thiab muab cev mus rau ntawm Yexus qhovncauj. 30Thaum Yexus haus cov cawv txivhmab qaub ntawd tas, Nws hais tias, “Tiav lawm lau!”

Ces Nws txawm nyo hau ntshis thiab tusiav nrho lawm.

Muab Hmuv Nkaug Yexus Sab Tav

31Cov Yudais tej nomtswv mus thov Philaj kom tsocai rau lawv muab cov neeg uas ntsia saum ntoo khaublig ntawd tsoo ceg kom lov thiab muab lawv lub cev txo saum ntoo khaublig los. Lawv ua li no rauqhov hnub ntawd yog hnub Npaj ua kevcai; cov Yudais tsis xav cia cov neeg tuag nyob saum ntoo khaublig rau hnub Xanpataus, rauqhov hnub Xanpataus yog hnub uas tseemceeb heev. 32Yogli ntawd, cov tubrog txawm mus muab ob tug uas lawv muab ntsia rau saum ntoo khaublig nrog Yexus ntawd tsoo ceg kom lov; lawv xub tsoo ib tug uantej, lawv mamli tsoo ib tug tomqab. 33Tiamsis thaum lawv mus txog ntawm Yexus, lawv pom tias Nws twb tuag lawm, lawv thiaj tsis tsoo Nws ob txhais ceg.

34Txawm li ntawd los muaj ib tug tubrog muab nws rab hmuv nkaug Yexus sab tav to ntshua, ua rau ntshav thiab dej ciali los si laim tamsim ntawd. ( 35Tus uas pom zaj no, nws tau ua timkhawv qhia rau sawvdaws kom nej thiaj yuav ntseeg.#19:35: ntseeg; tej phau ntawv qub uas xuas tes sau, muaj ntseeg tas mus li. Tej uas nws hais yeej muaj tseeb, thiab nws yeej paub tias nws hais qhov tseeb xwb.) 36Qhov no muaj rawsli Vajtswv Txojlus uas hais tias, “Nws tej txha yeej tsis muaj ib ya yuav lov li.” #Khiav 12:46; Teev 9:12; Nnkauj 34:20 37Thiab Vajtswv Txojlus muaj dua ib nqe hais tias, “Yuav muaj neeg ntsiantsoov tus uas lawv xuas hmuv nkaug.” #Xekhali 12:10; Tshwm 1:7

Faus Yexus

(Mathais 27:57-61; Malakaus 15:42-47; Lukas 23:50-56)

38Tomqab ntawd, Yauxej uas yog neeg Alimathias, tau mus thov kom Philaj muab Yexus lub cev rau nws. (Yauxej yog Yexus ib tug thwjtim thiab, tiamsis nws tsis qhia rau leejtwg paub, rauqhov nws ntshai cov Yudais.) Philaj txawm tsocai, ces Yauxej thiaj mus muab Yexus lub cev txo thiab coj mus lawm. #Yauh 3:1-2 39Nikaudemaus tus uas tau mus cuag Yexus ib zaug thaum hmontuj, nrog Yauxej mus; nws nqa ib cov roj ntoos tswqab uas yog muab maules thiab alaus sibtov uake, uas hnyav kwvlam li 30 tawm kilus. 40Nkawd muab Yexus lub cev txo los, muab cov tshuaj tswqab pleev thiab muab ib chaws ntaub mag qhwv Yexus lub cev rawsli cov Yudais txoj kevcai log tuag uas lawv ibtxwm ua. 41Muaj ib lub vaj nyob ntawm qhov chaw uas lawv muab Yexus ntsia rau saum ntoo khaublig. Nyob hauv lub vaj ntawd muaj ib lub qhovntxa tshiab uas tseem tsis tau muaj leejtwg muab neeg tuag log rau hauv dua li. 42Vim hnub ntawd yog hnub uas uantej hnub Xanpataus thiab vim lub qhovntxa ntawd nyob ze, lawv thiaj coj Yexus lub cev mus tso rau ntawd.

Currently Selected:

Yauhas 19: MWW2022

Highlight

Copy