Yauhas 17

Yexus Thov Vajtswv Rau Nws Cov Thwjtim

1Tomqab uas Yexus hais li ntawd tas, Nws tsa qhovmuag ntsia saum ntuj thiab hais tias, “Leejtxiv, twb txog lub sijhawm lawm; thov Koj ua kom Koj Leejtub tau koobmeej, kom Leejtub thiaj yuav ua rau Koj tau koobmeej. 2Koj pub rau Leejtub ua tus uas muaj hwjchim loj dua tej neeg tagnrho, kom Leejtub thiaj pub tau txojsia ntev dhawv mus ibtxhis rau txhua tus uas Koj muab rau Nws lawm. 3Txojsia ntev dhawv mus ibtxhis yog qhov uas lawv paub Koj hais tias Koj tibleeg thiaj yog tus Vajtswv tseeb, thiab paub Yexus Khetos tus uas Koj txib los. 4Kuv ua rau Koj tau koobmeej hauv ntiajteb no; tes haujlwm uas Koj kom Kuv ua, Kuv twb ua tiav lawm. 5Txiv, nimno Kuv nyob ntawm Koj lub xubntiag, thov Koj ua rau Kuv tau koobmeej; uas yog koobmeej uas Kuv tau muaj nrog Koj uantej tsim lub ntiajteb no.

6“Kuv twb qhia Koj rau cov neeg uas Koj rho tawm hauv ntiajteb no los pub rau Kuv huv tibsi lawm. Lawv yog Koj tug, Koj muab lawv pub rau Kuv, thiab lawv ua rawsli Koj tej lus lawm. 7Nimno lawv paub tias ibpuas tsavyam uas Koj muab rau Kuv, puavleej yog los ntawm Koj los. 8Tej lus uas Koj hais rau Kuv, Kuv muab qhia rau lawv thiab lawv khaws nkaus tej lus ntawd cia lawm. Lawv paub tseeb hais tias Kuv los ntawm Koj los, thiab lawv ntseeg tias Koj yog tus txib Kuv los.

9“Kuv thov Koj pab lawv. Kuv tsis yog thov Koj pab neeg ntiajteb, tiamsis thov Koj pab rau cov uas Koj twb muab rau Kuv lawm, vim lawv yog Koj tug. 10Txhua yam uas Kuv muaj puavleej yog Koj tug, thiab txhua yam uas Koj muaj puavleej yog Kuv tug; thiab Kuv tej koobmeej puavleej yog los ntawm txhua yam ntawd. 11Nimno Kuv yuav rovqab los cuag Koj; Kuv yuav tsis nyob hauv lub ntiajteb no ntxiv lawm, tiamsis lawv tseem nyob hauv lub ntiajteb no. Leejtxiv tus uas dawbhuv! Thov Koj tsomkwm lawv hauv Koj lub npe uas muaj hwjchim,#17:11: Thov Koj tsomkwm lawv hauv Koj lub npe uas muaj hwjchim; tej phau ntawv qub uas xuas tes sau, muaj Thov Koj tsomkwm cov neeg uas Koj muab pub rau Kuv ntawm Koj lub npe uas muaj hwjchim. kom lawv thiaj yuav koom tau ib lub siab ib yam li Koj thiab Kuv koom ib lub siab. 12Thaum Kuv tseem nrog lawv nyob, Kuv yeej tsomkwm lawv hauv Koj lub npe uas muaj hwjchim,#17:12: Kuv yeej tsomkwm lawv hauv Koj lub npe uas muaj hwjchim; tej phau ntawv qub uas xuas tes sau, muaj Kuv tsomkwm cov neeg uas Koj muab rau Kuv hauv Koj lub npe uas muaj hwjchim. uas yog lub npe Koj muab rau Kuv. Kuv tsomkwm lawv, lawv tsis muaj ib tug ploj li, tshwj kiag tus uas yeej yuav raug puastsuaj, thiajli puastsuaj xwb, kom thiajli muaj rawsli tej lus uas tau sau tseg lawm. #Nnkauj 41:9; Yauh 13:18

13“Nimno Kuv tabtom yuav rovqab los cuag Koj, tiamsis Kuv hais tej no thaum Kuv tseem nyob hauv ntiajteb, kom lawv thiaj yuav muaj Kuv txoj kev kajsiab puvnpo nyob rau hauv lawv lub siab. 14Kuv twb muab Koj tej lus cob rau lawv lawm, neeg ntiajteb thiaj ntxub lawv, rauqhov lawv tsis yog neeg ntiajteb li, ib yam li Kuv tsis yog neeg ntiajteb li. 15Kuv tsis yog thov kom Koj coj lawv tawm hauv lub ntiajteb no mus, tiamsis Kuv thov Koj tsomkwm lawv kom dhau ntawm dab ntxwgnyoog. 16Lawv tsis yog neeg ntiajteb li, ib yam li Kuv tsis yog neeg ntiajteb li. 17Koj Txojlus yog lus tseeb; thov Koj ntxuav kom lawv dawbhuv los ntawm Koj txoj kev tseeb. 18Koj txib Kuv los rau hauv lub ntiajteb no licas, Kuv yuav txib lawv mus qhia neeg ntiajteb ib yam li ntawd. 19Vim lawv, Kuv thiaj ntxuav Kuv tuskheej, Kuv ua li ntawd, kom lawv thiaj ntxuav lawv tuskheej ib yam nkaus thiab.

20“Tsis yog Kuv thov Koj pab lawv cov no xwb, tiamsis Kuv thov Koj pab cov uas hnov tej lus uas lawv qhia thiab los ntseeg Kuv. 21Kuv thov kom lawv ua tau ib lub siab. Txiv 'e, thov cia lawv nyob hauv wb, ib yam li Koj nyob hauv Kuv thiab Kuv nyob hauv Koj. Thov kom lawv ua tau ib lub siab, kom neeg ntiajteb thiaj ntseeg tias Koj txib Kuv los. 22Kuv ua rau lawv tau koobmeej ib yam li Koj ua rau Kuv tau koobmeej, Kuv ua li ntawd kom lawv koom tau ib lub siab ib yam li wb koom ib lub siab. 23Kuv nyob hauv lawv thiab Koj nyob hauv Kuv. Thov kom lawv koom tau ib lub siab tiag-tiag, neeg ntiajteb thiaj paub tias Koj txib Kuv los, thiab paub tias Koj hlub lawv ib yam li Koj hlub Kuv.

24“Txiv 'e, Kuv nyob qhovtwg, Kuv xav kom cov neeg uas Koj muab pub rau Kuv lawm nrog Kuv nyob qhov ntawd, thiab kom lawv pom Kuv tus tshwjchim uas Koj pub rau Kuv, rauqhov Koj yeej hlub Kuv thaum tsis tau tsim lub ntiajteb los lawm.

25“Leejtxiv tus uas ncajncees, neeg ntiajteb tsis paub Koj, tiamsis Kuv paub Koj thiab cov neeg no puavleej paub tias Koj txib Kuv los. 26Kuv twb qhia Koj rau lawv paub lawm, thiab Kuv tseem yuav niajhnub qhia Koj rau lawv ntxiv, kom txoj kev hlub uas Koj muaj pub rau Kuv thiaj yuav nyob tau rau hauv lawv, thiab Kuv thiaj yuav nyob tau rau hauv lawv thiab.”

Currently Selected:

Yauhas 17: MWW2022

Highlight

Copy