Yauhas 12

Muab Roj Tswqab Hliv Rau Yexus Nyob Hauv Lub Zos Npethanis

(Mathais 26:6-13; Malakaus 14:3-9)

1Rau hnub uantej uas txog hnub ua kevcai Hla Dhau, Yexus mus rau hauv lub zos Npethanis, uas yog Laxalus tus uas Yexus tau tsa sawv hauv qhovtuag rovqab los lub zos. 2Lawv npaj ib pluag hmo rau Yexus noj nyob rau qhov ntawd, Mathas ua tus txhab zaub-mov; Laxalus kuj yog ib tug uas nrog Yexus nyob uake ntawm lub rooj mov ntawd thiab. 3Ces Malis txawm muab tau ib hwj roj tswqab kim heev uas yog muab nroj naludas ua, los hliv rau Yexus ob txhais kotaw, thiab muab nws cov plaubhau los so. Cov roj ntawd tswqab thoobplaws hauv tsev.

4Yexus ib tug thwjtim, uas yog Yudas Ixakali-aus, tus uas yuav ntxeevsiab rau Yexus, txawm hais tias, 5“Uacas tsis muab hwj roj tswqab no coj mus muag 300 lub npib nyiaj,#12:5: npib nyiaj: saib 6:7. thiab muab cov nyiaj ntawd coj mus pub rau cov neeg pluag?” 6Yudas hais li ntawd, tsis yog vim nws hlub tshua txog cov neeg pluag, tiamsis vim nws yog tubsab. Nws yog tus ceev lub hnab nyiaj thiab nws pheej qee coj mus siv.

7Tiamsis Yexus hais tias, “Cia nws ua nws! Cia nws khaws tej uas nws muaj no tseg rau hnub uas log Kuv. 8Yeej yuav muaj cov neeg pluag nrog nej nyob mus li, tiamsis Kuv yuav tsis nrog nej nyob mus li.” #2Kev 5:11

Cov Yudais Nrhiav Kev Yuav Tua Laxalus

9Cov Yudais muaj ntau leej hnov tias Yexus nyob hauv lub zos Npethanis, yogli ntawd, lawv thiaj mus rau hauv, tsis yog lawv xav pom Yexus xwb tiamsis lawv xav pom Laxalus tus uas Yexus tau tsa sawv hauv qhovtuag rovqab los thiab. 10Vimli ntawd, cov thawj povthawj hlob thiaj nrhiav kev yuav muab Laxalus tua thiab, 11vim zaj uas Yexus tsa Laxalus sawv ntawd, ua rau cov Yudais coob leej ciali tso lawv tseg thiab los ntseeg Yexus lawm.

Yexus Mus Hauv Yeluxalees Yam Muajyeej

(Mathais 21:1-11; Malakaus 11:1-11; Lukas 19:28-40)

12Hnub tomqab cov neeg coob-coob uas tuaj ua kevcai Hla Dhau hnov tias Yexus tabtom tuaj rau hauv lub nroog Yeluxalees. 13Yogli ntawd, lawv thiaj nqa tej nplooj toovlaj mus tostxais Yexus thiab lawv qw nrov-nrov hais tias, “Hauxanas!#12:13: Hauxanas yog lolus Alamej uas txhais hais tias “thov cawm peb!” Nyob rau Yexus tiam, lolus no siv tau rau kev qhuas Vajtswv. Thov Vajtswv foom koobhmoov rau tus uas los hauv tus Tswv lub npe los! Thov Vajtswv foom koobhmoov rau cov Yixalayees tus vajntxwv!” #Nnkauj 118:25-26

14Yexus pom ib tug nees thiab Nws caij tus nees ntawd, rawsli Vajtswv Txojlus tau sau tseg lawm hais tias,

15“Lub nroog Xi-oos leej ntxhais 'e, koj tsis txhob ntshai!

Koj saib maj, koj tus Vajntxwv

tabtom caij tus menyuam nees los cuag koj.” #Xekhali 9:9

16Lub sijhawm ntawd Yexus cov thwjtim tseem tsis tau totaub li; tiamsis thaum Vajtswv tsa Yexus sawv hauv qhovtuag rovqab los tau tshwjchim lawm, lawv mam nco tau hais tias Vajtswv Txojlus tau hais li ntawd txog Yexus thiab tej uas lawv tau ua los lawm yog ua rau Yexus ntag.

17Cov neeg uas nrog Yexus uake thaum Yexus tsa Laxalus sawv hauv qhovtuag thiab hu Laxalus tawm hauv qhovntxa los, lawv twb mus piav tej ntawd rau sawvdaws mloog lawm. 18Yogli ntawd, thiaj muaj neeg coob-coob tuaj tos Yexus, rauqhov lawv hnov tias Nws ua tau qhov txujci tseemceeb ntawd. 19Ces cov Falixais txawm sibtham zomzaws hais tias, “Nej pom lawm lov, hais tias peb ua tsis tau dabtsi kiag li! Nej saib maj, tas teb tas chaw puavleej raws Nws qab tas lawm lau!”

Qeetus Neeg Kilis Nrhiav Yexus

20Ntawm cov neeg uas tau mus pehawm Vajtswv rau lub sijhawm ua kevcai hauv lub nroog Yeluxalees ntawd, muaj ibtxhia yog cov neeg Kilis. 21Lawv mus cuag Filiv (nws tuaj hauv lub zos Npexaidas pem lub xeev Kalilais tuaj) thiab hais tias, “Tus tswv, peb xav ntsib Yexus.”

22Filiv mus hais rau Asnrus, ces nkawd txawm mus hais rau Yexus. 23Yexus teb tias, “Nimno twb txog lub sijhawm uas Neeg Leejtub yuav tau txais tshwjchim lawm. 24Kuv qhia tseeb rau nej hais tias, yog lub noob nplej tsis poob rau hauv av thiab tsis lwj mus, nws yuav nyob ua ib lub noob xwb. Tiamsis yog lwj mus lawm, nws yuav tawgpaj txitxiv ntau. 25Tus uas hlub nws txojsia, tus ntawd yuav plam txojsia; tus uas ntxub nws txojsia hauv lub ntiajteb no, nws yuav ceev tau txojsia ntawd mus ibtxhis. #Math 10:39; 16:25; Malak 8:35; Lukas 9:24; 17:33 26Tus uas xav ua Kuv tus tubtxib, tus ntawd yuavtsum nrog Kuv mus, kom Kuv nyob qhovtwg, Kuv tus tubtxib thiaj yuav nrog Kuv nyob qhov ntawd. Kuv Txiv yuav cia tus uas ua Kuv li tubtxib tau ntsejmuag.

Yexus Hais Txog Nws Txoj Kev Tuag

27“Nimno Kuv nyuajsiab kawg li, Kuv yuav hais licas thiaj zoo? Kuv yuav hais tias, ‘Txiv, thov tsis txhob cia lub sijhawm no los raug Kuv no lov’? Tiamsis twb yog vim qhov ntawd ntag Kuv thiajli los, kom Kuv thiaj yuav tau raug txoj kev txomnyem ntawd. 28Txiv, thov kom Koj lub npe tau koobmeej!”

Ces muaj ib lub suab hais saum ntuj tuaj tias, “Kuv twb tau koobmeej lawm, tseem yuav tau txais ntxiv thiab.”

29Cov neeg coob-coob uas sawv ntawd kuj hnov lub suab no, muaj qeeleej hais tias yog xob nroo, tiamsis muaj qeeleej hais tias, “Yog ib tug timtswv ceebtsheej nrog Nws tham!”

30Tiamsis Yexus hais tias, “Lub suab ntawd tsis yog hais rau Kuv, tiamsis yog hais rau nej. 31Nimno twb txog lub sijhawm uas txiavtxim rau lub ntiajteb no lawm; nimno tus uas kav lub ntiajteb no yuav raug muab ntiab tawm mus. 32Thaum uas Kuv raug tsa sawv hauv lub ntiajteb no lawm, Kuv yuav coj txhua haivneeg los cuag Kuv.” ( 33Yexus hais li ntawd, twb yog Nws qhia hais tias Nws yuav tuag txomnyem licas.)

34Cov neeg coob-coob ntawd teb tias, “Peb txoj Kevcai qhia rau peb hais tias, tus Mexiyas yuav nyob mus ibtxhis li. Uacas Koj ho hais tias, luag yuav muab Neeg Leejtub dai? Neeg Leejtub yog leejtwg?” #Nnkauj 110:4; Yaxaya 9:7; Exek 37:25; Dani 7:14

35Yexus teb tias, “Qhov kaj tseem yuav nrog nej nyob ib nyuag ntu ntxiv. Thaum uas tseem pomkev, nej ciali rausiab ntso taug kev mus, nyobtsam tsaus nej ntuj; rauqhov tus neeg uas maub hmontuj, nws yeej tsis paub tias nws tabtom mus qhovtwg. 36Yogli ntawd, thaum tseem muaj qhov kaj, nej ciali ntseeg qhov kaj, kom nej thiaj yuav tau ua cov neeg uas nyob hauv qhov kaj.”

Cov Yudais Txoj Kev Tsis Ntseeg

Tomqab Yexus hais li ntawd tas, Nws txawm khiav mus nraim cev kom lawv tsis pom Nws. 37Txawm yog Nws tau ua ntau yam txujci tseemceeb no rau lawv pom los lawv tseem tsis ntseeg Nws li thiab, 38tej no thiaj muaj tiav rawsli Yaxayas, uas yog tus xibhwb cev Vajtswv lus tau hais tseg hais tias:

“Tus Tswv, leejtwg thiaj yuav ntseeg tej lus uas peb qhia?

Tus Tswv ua Nws lub hwjchim rau leejtwg pom?” #Yaxaya 53:1

39Twb yog vimli ntawd, lawv thiaj tsis muaj cuabkav ntseeg, rauqhov Yaxayas hais ntxiv tias,

40“Vajtswv ua rau lawv digmuag

thiab ua rau lawv lub siab ruam,

kom lawv tej qhovmuag tsis pomkev

thiab lawv lub siab tsis totaub;

Vajtswv hais tias, yog tsis ua li ntawd lawv yuav tsis tig los cuag Kuv

kom Kuv kho lawv.” #Yaxaya 6:10

41Yaxayas hais li ntawd, rauqhov nws twb pom Yexus tus tshwjchim thiab yog nws hais txog Yexus zaj ntag.

42Txawm yogli ntawd los cov Yudais tej nomtswv kuj muaj ntau leej ntseeg Yexus; tiamsis vim lawv ntshai cov Falixais, lawv thiaj tsis qhia hais tias lawv ntseeg Yexus rau sawvdaws paub, kom lawv thiaj tsis raug ntiab tawm hauv lub tsev sablaj mus. 43Lawv ntshaw kom neeg qhuas lawv heev dua li ntshaw kom Vajtswv qhuas lawv.

Yexus Cov Lus Yog Txoj Kev Txiavtxim

44Yexus hais nrov-nrov rau sawvdaws tias, “Tus uas ntseeg Kuv, tsis yog nws ntseeg Kuv tibleeg xwb, tiamsis yog nws ntseeg tus uas txib Kuv los. 45Tus uas pom Kuv, tus ntawd yeej pom tus uas txib Kuv los thiab. 46Kuv yog qhov kaj uas los rau lub ntiajteb pomkev, kom txhua tus uas ntseeg Kuv thiaj yuav tsis nyob hauv qhov tsausntuj ntxiv lawm.

47“Tus uas hnov Kuv tej lus tiamsis tsis ua rawsli tej lus ntawd, Kuv yuav tsis rautxim rau tus ntawd. Kuv tsis yog los rautxim rau neeg ntiajteb, tiamsis yog Kuv los cawm neeg ntiajteb. 48Muaj ib tug uas yuav rautxim rau tus uas tsis lees paub Kuv thiab tsis mloog Kuv tej lus. Thaum txog hnub kawg, tej lus uas Kuv qhia lawm yuav ua tus txiavtxim rau tus ntawd! 49Rauqhov Kuv tsis muaj cai yuav hais ib yam dabtsi rawsli Kuv lub siab xav, tiamsis tsuas yog hais rawsli Leejtxiv uas txib Kuv los ua tus xaaj kom Kuv hais xwb. 50Kuv paub tias Nws tej lus qhia ntawd yuav ua rau neeg muaj txojsia nyob mus ibtxhis. Yogli ntawd, tej lus uas Kuv hais, puavleej yog Leejtxiv kom rau Kuv hais xwb.”

Currently Selected:

Yauhas 12: MWW2022

Highlight

Copy