Yauhas 10

Zaj Lus Pivtxwv Hais Txog Tus Tswv Yug Yaj

1Yexus hais tias, “Kuv qhia tseeb rau nej hais tias tus uas mus hauv lub nkuaj yaj, yog nws tsis mus ntawm lub rooj nkuag mus, tiamsis nws ciali nce lwmqhov mus xwb, tus ntawd yog tubsab tubnyiag. 2Tus uas mus ntawm rooj nkuag, tus ntawd thiaj yog tus tswv yug yaj. 3Tus uas zov qhovrooj yuav qhib rooj nkuag rau nws; thaum nws cuab nws pab yaj tej npe, pab yaj yuav paub nws lub suab thiab nws yuav coj lawv tawm mus. 4Thaum nws coj pab yaj tawm mus lawm, nws yuav ua lawv ntej, thiab lawv yuav raws nws qab, rauqhov lawv paub nws lub suab. 5Pab yaj yuav tsis raws lwmtus qab, tiamsis lawv yuav khiav tawm ntawm tus ntawd mus, rauqhov lawv tsis paub tus ntawd lub suab.”

6Yexus hais zaj lus pivtxwv no rau lawv, tiamsis lawv tsis totaub xyov yog Nws hais txog dabtsi.

Yexus Yog Tus Tswv Yug Yaj Zoo

7Yogli ntawd, Yexus thiaj rov hais rau lawv tias, “Kuv qhia tseeb rau nej hais tias, Kuv yog lub rooj nkuag yaj. 8Txhua tus uas los uantej Kuv, puavleej yog tubsab tubnyiag xwb, tiamsis pab yaj yeej tsis mloog lawv tej lus. 9Kuv yog lub rooj nkuag. Tus uas los ntawm Kuv mus, tus ntawd yuav dim; nws yuav mus-mus los-los thiab nrhiav tau zaub noj. 10Tubsab tuaj, ces yog tuaj nyiag, tuaj tua, thiab tuaj ua kom puastsuaj xwb. Tiamsis Kuv los, yog los kom nej tau txojsia, uas yog tau lub neej uas puvnpo.

11“Kuv yog tus tswv yug yaj uas zoo. Tus tswv yug yaj uas zoo yeej txaussiab hlo muab nws txojsia theej pab yaj. 12Tus uas raug luag ntiav, nws yeej tsis yog tus tswv yug yaj thiab pab yaj ntawd los yeej tsis yog nws li, thaum pom hma tuaj, nws yuav khiav thiab tso pab yaj tseg; hma yuav tom pab yaj thiab ua rau pab yaj khiav tawg uasab uasua tas. 13Nws khiav, vim yog luag ntiav nws zov pab yaj xwb, nws yeej tsis mobsiab txog pab yaj. 14-15Kuv yog tus tswv yug yaj uas zoo. Leejtxiv paub Kuv licas thiab Kuv paub Leejtxiv licas, ces Kuv paub Kuv pab yaj thiab lawv paub Kuv ib yam nkaus li ntawd. Kuv yeej txaussiab tuag theej lawv. 16Kuv muaj dua ib pab yaj uas tsis nyob hauv lub nkuaj no. Kuv yuavtsum mus coj kom tau lawv los; lawv yuav mloog Kuv lub suab, thiab tagnrho lawv sawvdaws yuav los#10:16: lawv sawvdaws yuav los; tej phau ntawv qub uas xuas tes sau, muaj lawv yuav ua. ua ib pab koom ib tug tswv xwb.

17“Leejtxiv hlub Kuv rauqhov Kuv txaussiab hlo tso Kuv txojsia tseg, kom Kuv thiaj tau Kuv txojsia ntawd rovqab los. 18Tsis muaj leejtwg yuav txeeb tau Kuv txojsia ntawm Kuv mus. Yeej yog Kuv txaussiab tso Kuv txojsia ntawd tseg xwb. Kuv muaj cai tso Kuv txojsia tseg thiab Kuv muaj cai muab Kuv txojsia rovqab los. No yog yam uas Kuv Txiv tau xaaj kom Kuv ua.”

19Vim tej lus uas Yexus hais no, thiaj ua rau cov Yudais rov tsis sibhaum dua. 20Muaj ntau leej hais tias, “Nws raug ib tug dab! Nws vwm lawm! Uacas nej tseem yuav mloog Nws tej lus ua dabtsi thiab?”

21Tiamsis muaj qeeleej hais tias, “Tus neeg uas raug dab yeej tsis txawj hais tej lus no! Dab yuav ua licas kho tau tus neeg uas digmuag kom pomkev?”

Cov Yudais Tsis Lees Paub Yexus

22Lub sijhawm ntawd yog caij ntuj no, yog lub caij ua kevcai nco txog hnub uas kho lub Tuamtsev hauv lub nroog Yeluxalees. 23Yexus tabtom ncig mus ncig los hauv Xalumoos lub qabkhav ntawm lub Tuamtsev, 24cov Yudais txawm sibsau tuaj vijvog Yexus thiab nug hais tias, “Koj tseem yuav cia peb nyob ua xyemxyav mus ntev npaum licas? Ciali qhia qhov tseeb rau peb seb, Koj puas yog tus Mexiyas tiag?”

25Yexus teb tias, “Kuv twb qhia rau nej lawm, tiamsis nej tsis kam ntseeg Kuv. Tej haujlwm uas Kuv Txiv kom Kuv ua, twb ua timkhawv qhia rau nej paub txog Kuv lawm; 26tiamsis nej tsis ntseeg, rauqhov nej tsis yog Kuv pab yaj. 27Kuv pab yaj yeej mloog Kuv lub suab; Kuv paub lawv, thiab lawv yeej raws Kuv qab. 28Kuv muab txojsia ntev dhawv mus ibtxhis rau lawv, lawv yuav tsis tuag ib zaug li. Yeej tsis muaj leejtwg uas yuav txeeb tau lawv tawm ntawm Kuv mus. 29Tej uas Kuv Txiv muab pub rau Kuv, loj dua txhua yam huv tibsi,#10:29: Tej uas Kuv Txiv muab pub rau Kuv, loj dua txhua yam huv tibsi; tej phau ntawv qub uas xuas tes sau, muaj Kuv Txiv, tus uas muab lawv pub rau Kuv, yog tus uas loj dua ntais huv tibsi. thiab tsis muaj leejtwg uas yuav txeeb tau lawv ntawm Leejtxiv txhais tes mus. 30Leejtxiv thiab Kuv yog tibtug.”

31Ces cov Yudais txawm rov khaws pobzeb yuav ntaus Yexus dua. 32Yexus hais rau lawv tias, “Kuv Txiv kom Kuv ua ntau yam haujlwm zoo rau nej pom; tej ntawd yam twg yog yam uas ua rau nej thiaj yuav muab pobzeb ntaus Kuv?”

33Lawv teb tias, “Qhov uas peb yuav muab pobzeb ntaus Koj, tsis yog vim tej haujlwm zoo uas Koj ua, tiamsis vim qhov uas Koj haislus saib tsis taus Vajtswv! Koj tsuas yog neeg xwb, tiamsis Koj khav hais tias Koj yog Vajtswv.”

34Yexus teb tias, “Twb muaj lus sau cia rau hauv nej txoj Kevcai lawm, Vajtswv hais tias, ‘Nej yog tej nyuag vajtswv.’ 35Peb paub tias tej uas Vajtswv Txojlus qhia yeej yog qhov tseeb mus tag ibtxhis li xwb; Vajtswv hu cov neeg ntawd hu ua tej nyuag vajtswv, lawv cov ntawd twb yog cov uas tau txais Nws Txojlus no ntag. 36Kuv twb yog tus uas Leejtxiv xaiv thiab txib los rau hauv ntiajteb no. Uacas nej tseem hais tias Kuv haislus saib tsis taus Vajtswv? Puas yog vim qhov uas Kuv hais tias Kuv yog Vajtswv Leejtub? 37Yog Kuv tsis ua tej haujlwm uas Kuv Txiv kom Kuv ua, ces nej kuj tsis txhob ntseeg Kuv kiag li. 38Tiamsis yog Kuv twb ua tej haujlwm ntawd lawm, txawm yog nej tsis ntseeg Kuv los xij, nej yuavtsum ntseeg tej haujlwm uas Kuv ua ntawd, kom nej thiaj yuav paub meej-meej tias Leejtxiv thiab Kuv koom ib txojsia.”

39Ces lawv txawm yuav rov ntes Yexus dua, tiamsis Yexus khiav dim ntawm lawv txhais tes mus lawm.

40Yexus txawm hla tus dej Yauladees mus rau tim qhov chaw uas Yauhas muab neeg ua kevcai rausdej thiab Nws nyob rau tid. 41Muaj neeg coob-coob tuaj cuag Nws, lawv hais tias, “Yauhas twb tsis tau ua ib yam txujci tseemceeb dabtsi li, tiamsis txhua yam uas Yauhas hais txog tus txivneej no puavleej muaj tseeb.” 42Cov neeg uas nyob rau ntawd muaj ntau leej los ntseeg Yexus.

Currently Selected:

Yauhas 10: MWW2022

Highlight

Copy