Yelemis 2
2
Vajtswv Tsomkwm Cov Yixalayees
1Tus TSWV hais kom kuv 2coj cov lus no mus hais rau txhua tus uas nyob hauv lub nroog Yeluxalees:
“Kuv cimntsoov thaum koj tseem hluas koj ncajncees npaum licas;
thaum wb nyuamqhuav sibyuav koj hlub Kuv licas;
koj raws Kuv qab los hla tiaj suabpuam,
hla lub tebchaws uas tsis tau cog qoobloo li.
3Yixalayees, koj yog tus dawbhuv rau Kuv;
koj yog Kuv thawj co qoobloo.
Kuv tso kev txomnyem thiab kev puastsuaj
los rau txhua tus uas ua phem rau koj.
Kuv yog tus TSWV uas hais li ntawd.”
Yixalayees Cov Yawgkoob Tej Kev Txhaum
4Nej cov uas yog Yakhauj cajces, thiab yog txhua xeem hauv haivneeg Yixalayees, nej ciali mloog tus TSWV tej lus. 5Tus TSWV hais tias:
“Nej cov yawgkoob pom Kuv ua txhaum dabtsi?
Dabtsi ua rau lawv ciali khiav deb ntawm Kuv mus lawm?
Lawv mus pe tej mlom uas tsis muaj qabhau
thiaj ua rau lawv tsis muaj qabhau lawm.
6Txawm yog Kuv cawm lawv dim hauv tebchaws Iziv los
thiab coj lawv hla roob mojsab qhua:
uas yog tiaj zeb suabpuam thiab muaj qhov ntuj,
yog lub tebchaws qhuav thiab tsausntuj nti,
tsis muaj neeg nyob
thiab hla lub tebchaws ntawd li los
lawv yeej tsis quavntsej txog Kuv hlo li.
7Kuv coj lawv los nyob hauv lub tebchaws av zoo uas ua tau qoobloo,
kom lawv thiaj tau noj tej txivhmab txivntoo thiab txhua yam uas zoo.
Tiamsis lawv los ua rau Kuv lub tebchaws puas tag;
lawv ua tsis huv rau lub tebchaws uas Kuv tau muab rau lawv.
8Cov povthawj hlob yeej tsis nug hais tias, ‘Tus TSWV nyob qhovtwg lawm?’
Kuv cov povthawj hlob twb tsis paub Kuv lawm thiab.
Cov nomtswv ntxeevsiab tawmtsam Kuv;
cov xibhwb cev Vajtswv lus los tuav Npa-as lub npe cevlus;
thiab mus pe tej mlom uas tsis muajnqis hlo li.
Tus TSWV Kom Nws Haivneeg
9“Yogli ntawd, Kuv uas yog tus TSWV, yuav rov nrog Kuv haivneeg ua plaub.
Kuv yuav kom lawv cajces.
10Nej ciali mus rau sab hnubpoob tim lub povtxwv Xaipas,
thiab ciali txib neeg mus rau sab hnubtuaj tim lub tebchaws Kedas.
Nej yuav pom tias yeej tsis tau muaj tej xwm li no ib zaug li.
11Tsis tau muaj ib haivneeg twg uas ciali pauv lawv tej nyuag vajtswv,
txawm yog tej nyuag vajtswv ntawd twb tsis yog tus tseeb li los xij.
Tiamsis Kuv haivneeg muab Kuv pauv,
lawv muab tus Vajtswv uas ua rau lawv tau ntsejmuag,
mus pauv tej nyuag mlom uas ua tsis tau dabtsi rau lawv hlo li.
12Yogli ntawd, Kuv thiaj ua kom lub ntuj uazog koog ua rau txaus ntshai
thiab ua rau xav tsis thoob li,
13rauqhov Kuv haivneeg tau ua ob yam kev txhaum:
lawv tau tso Kuv,
uas yog lub qhovdej txhawv tseg,
thiab lawv ciali mus khawb dua ib co qhovdej,
uas yog cov qhovdej nribpleb, ua rau teev tsis tau dej hlo li.
Cov Yixalayees Tsis Mlooglus
14“Yixalayees tsis yog ib tug qhev;
nws tsis tau yug los ua qhev.
Vim licas nws cov yeebncuab thiaj pheej nrhiav kev muab nws tua?
15Lawv nyoojlaws rau nws yam nkaus li tsov ntxhuav;
lawv ua rau nws lub tebchaws ciaj quavpoj tag,
thiab nws tej moos puastsuaj tag nphobxuav cia.
16Cov tibneeg uas nyob hauv Meefis thiab Tapahes
tau muab nws lub taubhau tsoo tawg lawm.
17Yixalayees, koj mus lob tej no los rau koj!
Koj tau muab Kuv, uas yog tus TSWV thiab yog koj tus Vajtswv, tsotseg,
thaum Kuv tseem tabtom coj koj kev.
18Qhov uas koj mus haus dej hauv tus Dej Nais
uas nyob hauv tebchaws Iziv, yuav ua rau koj tau dabtsi?
Qhov uas koj mus haus dej hauv tus Dej Yufatis
uas nyob hauv tebchaws Axilias, yuav ua rau koj tau dabtsi?
19Koj tej kev phem kev qias yuav rautxim rau koj,
thiab qhov uas koj tso Kuv tseg, yuav ua rau koj poob ntsejmuag.
Koj yuav paub tias qhov uas koj tso Kuv, uas yog tus TSWV
thiab yog koj tus Vajtswv tseg, thiab tsis hwm Kuv ntawd,
phem thiab iabsiab npaum licas.
Kuv, uas yog tus TSWV uas kav ibpuas tsavyam thiab muaj Hwjchim Loj Kawg Nkaus, yog tus hais li ntawd.”
Cov Yixalayees Tsis Kam Pehawm Tus TSWV
20Tus TSWV uas kav ibpuas tsavyam hais tias,
“Yixalayees, ntau xyoo los lawm, koj tsis kam cia Kuv ua tus kav koj;
koj tsis kam ua li Kuv hais thiab tsis kam pehawm Kuv.
Tiamsis nyob rau saum txhua lub roob siab
thiab nyob hauvqab txhua tsob ntoo ntsuab,
koj ua zoo li tus niamntiav uas mus pehawm tej mlom.
21Kuv cog koj cia ib yam li cog
lub noob txivhmab uas zoo tshajplaws.
Tiamsis vim licas koj ciali mus txia ua tsob txivhmab qus
uas lwj thiab tsis muajnqis lawm?
22Txawm yog koj muab tej tshuaj uas muajzog kawg li los ntxuav
los Kuv tseem pom koj qhov ceb, uas yog koj lub txim.
23Koj yuav ua licas hais tau tias koj tsis tau ua rau koj lub cev tsis huv,
thiab yeej tsis tau pe tus mlom Npa-as li?
Koj sim xav seb, koj tau ua txhaum licas nram kwjha lawm;
ciali lees paub tej uas koj tau ua tag los ntawd.
Koj zoo ib yam li tus maum ntxhuav qus uas tshov
nyob tsis tsheej chaw,
24khiav rag rhi rau tom tiaj suabpuam.#2:24: Nqe no sau hais tias khiav rag rhi rau tom tiaj suabpuam; phau lus Henplais hais tias tus neesluav qus uas ibtxwm nyob tom tiaj suabpuam.
Thaum txog caij tshov lawm, leejtwg thiaj muaj cuabkav tswj tau nws?
Thaum ntawd tus txiv ntxhuav uas xav tshov nws yeej nrhiav nws yoojyim heev;
vim tus maum ntxhuav yeej ibtxwm ua li ntawd thaum lub caij tshov.
25Yixalayees, koj tsis txhob khiav ua kotaw to tag,
lossis ua qa qhuav tas mus
nrhiav dua lwmtus tej nyuag vajtswv.
Tiamsis koj tseem hais tias, ‘Kuv tsis rovqab los lawm.
Kuv yeej nyiam lwm haivneeg tej nyuag vajtswv,
thiab yuav nrog lawv mus.’ ”
Cov Yixalayees Tsimnyog Raug Txim
26Tus TSWV hais tias, “Tus tubsab uas luag ntes tau, nws poob ntsejmuag licas, ces tagnrho nej cov neeg Yixalayees nej cov vajntxwv thiab cov nomtswv, nej cov povthawj hlob thiab cov xibhwb cev Vajtswv lus yuav poob ntsejmuag ib yam nkaus li ntawd. 27Nej cov uas hais tias tsob ntoo yog nej txiv thiab lub pobzeb yog nej niam, nej txhua tus yuav poob ntsejmuag heev. Tej no yeej yuav tshwmsim rauqhov nej tau tig ntawm Kuv mus thiab tsis tig rov los rau ntawm Kuv lawm. Tiamsis thaum nej raug kev txomnyem nej tseem tsa ncauj thov kom Kuv los cuag nej thiab pab nej!
28“Tej nyuag vajtswv uas nej puab rau nej ntawd nyob qhovtwg? Thaum nej raug kev txomnyem, ciali kom lawv los pab nej, seb lawv puas pab tau! Cov Yudais, nej muaj tus nyuag vajtswv ntau npaum nkaus li nej tej nroog! 29Nej yws Kuv ua dabtsi? Vim licas nej ntxeevsiab rau Kuv? 30Kuv rautxim rau nej los nej tsis zeem; nej yeej tsis cia Kuv qhuabntuas nej li. Nej muab nej cov xibhwb cev Vajtswv lus tua povtseg yam li tus tsov ntxhuav tom tsiaj ntag. 31Cov Yixalayees, nej ciali tig pobntseg mloog Kuv hais. Kuv zoo yam li lub tiaj suabpuam thiab lub tebchaws uas tsausntuj nti rau nej no lov? Vim licas nej thiaj hais tias nej yuav ua rawsli nej siab nyiam, thiab nej yuav tsis rov los cuag Kuv li lawm? 32Tus hluasnkauj yeej tsis hnovqab nws tej saw nyiaj saw kub, lossis tus nkaujnyab yeej tsis hnovqab nws cev zam uas hnav txis tshoob. Tiamsis Kuv haivneeg tau hnovqab Kuv los ntev heev suav tsis txheeb lawm. 33Nej txawj ntxias kom lwmtus nyiam nej. Txawm yog tej pojniam uas ua phem tshaj los tseem tau tuaj kawm ntawm nej. 34Nej tej tsoostsho tsuas cov tibneeg txomnyem thiab cov tibneeg uas tsis muaj txim tej ntshav, tsis yog tsuas tubsab tej ntshav.
“Twb muaj tej no los 35nej tseem hais tias, ‘Kuv tsis muaj txim; tus TSWV yeej yuav tsis chim rau kuv.’ Tiamsis Kuv uas yog tus TSWV, yuav rautxim rau nej vim nej tsis lees tias nej tau ua txhaum. 36Vim licas nej yuav saib nej tsis muajnqis los ntawm qhov uas nej ciali tig mus cuag luag lwm haivneeg tej nyuag vajtswv? Cov Iziv yuav ua rau nej tusiab nrho ib yam li cov Axilias tau ua rau nej lawm. 37Nej yuav tso Iziv tseg, yuav txajmuag thiab tsa tsis taus taubhau. Kuv, uas yog tus TSWV, tau tsis lees paub tej neeg uas nej tsosiab rau, lawv yuav tsis pab nej li.”
Currently Selected:
Yelemis 2: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
