Yakaunpaus 5

Ceebtoom Rau Cov Neeg Npluanuj

1Nej cov uas yog neeg npluanuj, ua tibzoo mloog kuv hais! Nej ciali quaj thiab nyiav, rauqhov kev txomnyem twb yuav los raug nej. 2Tej uas nej muaj twb po tag, thiab nej tej tsoostsho ntsaum kabrwg twb noj tag lawm. 3Nej tej nyiaj tej kub twb xeb tag lawm. Tej xeb ntawd yuav ua timkhawv tawmtsam nej, thiab yuav noj nej cev nqaij ib yam li hluavtaws kub. Nej tau khaws nyiaj cia rau lub sijhawm kawg no. #Math 6:19 4Saib maj, tej nqizog uas nej tsis kam them rau cov neeg uas nej ntiav ua liaj ua teb tabtom tsa suab quaj tawmtsam nej. Cov neeg uas nej ntiav hlais nplej, lub suab quaj twb nrov mus txog tus Tswv uas muaj Hwjchim Loj Kawg Nkaus lub pobntseg lawm. #2Kev 24:14-15 5Nej lub neej hauv ntiajteb no puvnpo kev noj kev haus thiab kev lomzem. Nej txav kom nej rog cia rau hnub uas muab tua noj. 6Nej tau rautxim thiab tua tus neeg dawbhuv uas nws yeej tawmtsam tsis tau nej li.#5:6: nws yeej tawmtsam tsis tau nej li; lossis Vajtswv yuav tsis tawmtsam nej thiab no lov?

Ua Siabntev Thiab Thov Vajtswv

7Cov kwvtij, nej yuavtsum ua siabntev mus txog hnub uas peb tus Tswv rov los. Nej saib tus neeg ua liaj ua teb, nws ua siabntev tos lub caij cog qoobloo thiab ua siabntev tos nag ntuj tshiab thiab nag ntuj tsaug. 8Nej yuavtsum ua lub siabntev ib yam li ntawd. Nej tsis txhob txhawj, rauqhov twb yuav txog hnub uas tus Tswv rov los.

9Cov kwvtij, nej ib tug tsis txhob yws ib tug, tus Tswv thiaj tsis txiavtxim rau nej. Tus Txiavtxim twb nyob ze thiab npaj txhij yuav tshwm los lawm. 10Cov kwvtij, nej yuav tau ncontsoov cov xibhwb cev Vajtswv lus uas tau hais los ntawm tus Tswv lub npe. Xyaum raws tus qauv uas ua siabntev thiab tiv kev txomnyem. 11Nej twb paub lawm hais tias cov neeg uas ua siabntev tiv tej kev tsimtxom, peb hu lawv ua cov uas tau koobhmoov. Nej twb hnov txog Yauj txoj kev ua siabntev, thiab nej twb paub lawm hais tias thaum kawg tus Tswv npaj txhua yam rov rau Yauj. Rauqhov tus Tswv yog tus puvnpo txoj kev tabncuab thiab kev hlub. #Yauj 1:21-22; 2:10; Nnkauj 103:8

12Cov kwvtij, qhov uas tseemceeb dua txhua yam huv tibsi yog li no: Thaum nej coglus rau ib yam dabtsi, nej tsis txhob twv ntuj twv teb lossis twv txog ib yam dabtsi kiag li. Yam uas yog nej ciali hais tias “Yog,” yam uas tsis yog, nej ciali hais tias “Tsis yog,” nej thiajli tsis poob rau kev txiavtxim. #Math 5:34-37

13Nej leejtwg raug kev txomnyem? Tus ntawd ciali thov Vajtswv. Nej leejtwg muaj kev zoosiab? Tus ntawd ciali hunkauj qhuas Vajtswv. #Paj 27:1 14Nej leejtwg muaj mob? Tus ntawd ciali hu cov txwjlaug uas saib pawg ntseeg tuaj thov Vajtswv pab nws thiab muab roj pleev nws hauv tus Tswv lub npe. #Malak 6:13 15Txoj kev thov Vajtswv los ntawm kev ntseeg, yuav kho kom tau tus uas muaj mob ntawd zoo; tus Tswv yuav ntxiv siav ntxiv zog rau nws. Yog nws tau ua txhaum, tus Tswv yuav zamtxim rau nws.

16Yogli ntawd, nej ib tug yuavtsum lees kev txhaum rau ib tug thiab ib tug thov Vajtswv pab rau ib tug kom nej tej mob thiajli zoo. Tus neeg ncajncees tej lus thov mas muajzog heev. 17Eliyas yog ib tug neeg zooli peb xwb, nws kubsiab lug thov kom Vajtswv tsis txhob tso nag los, ces nag txawm tsis los rau hauv lub ntiajteb tau peb xyoos thiab rau lub hlis. #1Vaj 17:1; 18:1 18Tomqab ntawd nws rov thov Vajtswv dua, ces roojntug txawm qhib thiab tso nag los rau hauv lub ntiajteb no, txhua yam qoobloo thiaj tuaj taus. #1Vaj 18:42-45

19Kuv cov kwvtij, yog nej ib tug twg yuamkev tsis ua rawsli Vajtswv Txojlus tseeb lawm, thiab muaj ib tug mus coj tau nws rovqab los, 20ces nej ncontsoov tias tus uas coj tau tus ua txhaum ntawd rovqab los yog nws pab tau tus ua txhaum ntawd tus ntsujplig#5:20: tus ua txhaum ntawd tus ntsujplig; lossis nws tus ntsujplig. dim txoj kev tuag thiab dim ntawm ntau lub txim. #Paj 10:12; 1Pet 4:8

Currently Selected:

Yakaunpaus 5: MWW2022

Highlight

Copy