Yakaunpaus 4

Kev Nrog Lub Ntiajteb Ua Phoojywg

1Dabtsi ua rau nej sibntaus sibtua thiab sibcav sibceg? Tsis yog tej kev ntshaw uas nyob hauv nej lub siab ua rau nej ua li ntawd lov? 2Nej xav tau yam ub yam no, tiamsis tsis tau, nej txawm yuav muab luag tua povtseg. Nej ntshaw luag tug, tiamsis tsis tau, nej txawm sibcav sibceg thiab sibntaus sibtua. Nej tsis muaj, vim nej tsis thov Vajtswv. 3Thaum nej thov, nej tsis tau txais, vim nej muaj ib pluajsiab phem; tej uas nej thov ntawd, nej yuav coj mus siv rawsli nej lub siab nyiam xwb.

4Cov neeg siab tsis ncaj, nej tsis paub lov tus uas nrog ntiajteb ua phoojywg, tus ntawd yog ua yeebncuab rau Vajtswv? Yog leejtwg xav ua lub ntiajteb no li phoojywg, tus ntawd yuav dhau mus ua Vajtswv li yeebncuab. 5Nej xav tias qhov uas Vajtswv Txojlus hais tias, “Tus ntsujplig uas Vajtswv muab tso rau hauv peb khib peb kawg li,”#4:5: Tus ntsujplig uas Vajtswv muab tso rau hauv peb khib peb kawg li; lossis Vajtswv khib txog tus ntsujplig uas Nws tau muab tso rau hauv peb kawg li. txawm tsis muaj qabhau no lov? 6Tiamsis txoj hmoovhlub uas Vajtswv pub rau peb yimhuab ntau dua. Rauqhov Vajtswv Txojlus hais tias, “Vajtswv tawmtsam tus uas khavtheeb, tiamsis Nws pub txoj hmoovhlub rau tus uas txo hwjchim.” #Paj 3:34 (LXX)

7Yogli ntawd, nej ciali mloog Vajtswv lus. Nej ciali tawmtsam dab ntxwgnyoog, nws thiaj yuav khiav ntawm nej mus. 8Nej ciali los nyob ze rau ntawm Vajtswv, Vajtswv thiaj yuav los nyob ze rau ntawm nej. Cov neeg txhaum, nej ciali ntxuav nej tej tes kom huv. Cov neeg uas ua ob lub siab, nej ciali ntxuav nej lub siab kom dawbhuv. 9Nej yuavtsum nyuajsiab, quajntsuag thiab tsa suab quaj. Hloov nej lub suab luag mus ua lub suab quaj, hloov kev zoosiab mus ua kev ntxhovsiab. 10Nej ciali txo nej lub hwjchim tabmeeg Vajtswv, Vajtswv thiaj yuav tsa nej rau qhov chaw siab.

Ceebtoom Txog Kev Txiavtxim Rau Lwmtus

11Cov kwvtij, nej ib tug tsis txhob haislus saib tsis taus ib tug. Tus uas haislus saib tsis taus nws kwv nws tij lossis txiavtxim rau nws tej kwvtij yog nws saib tsis taus txoj Kevcai. Tus uas thuam txoj Kevcai, tus ntawd yeej tsis coj rawsli txoj Kevcai. Nws tseem yog tus uas thuam txoj Kevcai ntawd xwb. 12Vajtswv tibleeg thiaj yog tus uas muab txoj kevcai rau peb coj thiab yog tus uas txiavtxim. Nws tibleeg thiaj yog tus uas muaj peevxwm cawm tau kom dim thiab ua tau kom puastsuaj. Nej xav tias nej yog leejtwg nej thiaj yuav txiavtxim rau lwmtus?

Ceebtoom Txog Kev Khavtheeb

13Ciali mloog kuv hais, nej cov uas hais tias, “Hnubno lossis tagkis peb yuav mus rau lub nroog no lossis lub nroog tod, yuav mus nyob hauv ib xyoos ua lagluam kom tau nyiaj ntau-ntau.” 14Tiamsis nej twb tsis paub tias xyov tagkis nej txojsia yuav zoo licas. Nej txojsia zooli tej huab uas nyob ibpliag xwb ces twb yaj tag lawm. 15Nej tsis txhob hais li ntawd, tsimnyog nej yuavtsum hais tias, “Yog haum Vajtswv siab, peb tseem yuav muaj txojsia thiab yuav ua yam ub yam no.” 16Tiamsis nimno nej muabhlob thiab khavtheeb. Tej ntawd puavleej txhaum huv tibsi.

17Yogli ntawd, tus uas paub tias nws yuavtsum ua qhov zoo tiamsis tsis ua, tus ntawd muaj txim.

Currently Selected:

Yakaunpaus 4: MWW2022

Highlight

Copy