Yakaunpaus 2

Ceebtoom Txog Kev Xaiv Ntsejmuag

1Cov kwvtij, nej yog cov uas ntseeg peb tus Tswv Yexus Khetos, tus Tswv uas muaj tshwjchim, nej tsis txhob xaiv leejtwg ntsejmuag li. 2Pivxam hais tias muaj ib tug npluanuj uas coj nplhaib nyiaj nplhaib kub thiab hnav tsoostsho zoo-zoo, thiab ho muaj ib tug txomnyem hnav tsoostsho khaub-khaubhlab tuaj rau ntawm nej lub tsev sablaj. 3Yog nej saib taus tus uas hnav tsoostsho zoo-zoo, thiab hais rau nws tias, “Koj los zaum ntawm lub rooj zoo-zoo no,” tiamsis nej hais rau tus uas txomnyem tias, “Koj sawv ntawm ko lossis los zaum hauv av ntawm peb kotaw no,” 4qhov ntawd twb yog nej cais thiab xaiv neeg ntsejmuag rawsli nej lub siabphem xav lawm puas yog?

5Cov kwvtij uas kuv hlub, nej ciali mloog kuv hais! Puas yog Vajtswv twb xaiv cov neeg pluag hauv ntiajteb no los ua cov npluanuj rau sab kev ntseeg thiab los ua Vajtswv haivneeg rawsli Vajtswv tau coglus tseg lawm hais tias tus uas hlub Vajtswv, nws yuav tau txais Vajtswv lub Tebchaws? 6Tiamsis nej saib tsis taus cov neeg pluag! Leejtwg yog cov uas caijtsuj thiab cab nej mus nce tsev txiavtxim? Twb yog cov neeg npluanuj ntag los sav! 7Lawv ntag lau yog cov uas thuam lub npe zoo kawg nkaus uas Vajtswv muab rau nej.

8Yog nej yeej ua tau rawsli txoj kevcai tseemceeb uas sau cia rau hauv Vajtswv Txojlus hais tias, “Koj yuavtsum hlub koj tus kwvtij zejzog ib yam li koj hlub koj tuskheej,” thiaj yog nej ua zoo tiag. #Levi 19:18 9Tiamsis yog nej xaiv neeg ntsejmuag, ces yog nej ua txhaum, thiab txoj Kevcai los yeej yuav rautxim rau nej li nej yog neeg ua txhaum kevcai. 10Tus uas tsis ua rawsli txoj kevcai ib nqe xwb, ces yeej yog nws ua txhaum txhua nqe huv tibsi. 11Rauqhov Vajtswv tus uas hais tias, “Tsis txhob deev luag pojniam luag txiv,” Nws hais ntxiv hais tias “Tsis txhob tua neeg.” Ces txawm yog nej tsis tau deev luag pojniam luag txiv los yog nej tua neeg, ces yeej yog nej ua txhaum kevcai lawm. #Khiav 20:14; 2Kev 5:18; Khiav 20:13; 2Kev 5:17

12Yogli ntawd, nej yuavtsum haislus thiab ua nej lub neej zooli cov neeg uas yuav raug txiavtxim los ntawm txojcai uas muab kev ywjpheej rau nej. 13Rauqhov hnub uas Vajtswv txiavtxim, Nws yuav tsis tabncuab tus uas tsis muaj kev tabncuab lwmtus, tiamsis Nws yuav tsis txiavtxim rau tus uas muaj kev tabncuab lwmtus.

Kev Ntseeg Thiab Tes Haujlwm

14Cov kwvtij, yog muaj ib tug hais tias, nws muaj kev ntseeg tiamsis nws tsis ua rawsli qhov uas nws ntseeg ntawd, yuav muaj qabhau dabtsi? Txoj kev ntseeg ntawd puas yuav pab tau kom nws dim? 15Yog nej pom ib cov kwvtij, tsis hais pojniam lossis txivneej, lawv tsis muaj noj tsis muaj hnav, 16nej hais rau lawv tias, “Thov Vajtswv foom koobhmoov rau nej kom muaj noj muaj hnav sovso,” tiamsis nej tsis muab ib yam dabtsi rau lawv li, qhov uas nej hais li ntawd yuav muaj qabhau dabtsi? 17Ib yam nkaus li ntawd: txoj kev ntseeg uas tsis muaj ib yam haujlwm tshwm li, ces yog txoj kev ntseeg uas twb tuag lawm.

18Tejzaum yuav muaj ib tug hais tias, “Koj muaj kev ntseeg, tiamsis kuv yog tus uas muaj kev ua haujlwm.” Kuv yuav teb tus ntawd hais tias, “Koj sim qhia koj txoj kev ntseeg uas tsis ua haujlwm rau kuv seb zoo licas? Kuv mamli qhia kuv txoj kev ntseeg los ntawm kuv tes haujlwm rau koj.”

19Koj ntseeg tias yeej muaj tibtug Vajtswv xwb; kuj yog qhov zoo! Dab los kuj ntseeg ib yam nkaus li ntawd, thiab dab ntshai Vajtswv ua ibce tsheehnyo. 20Tus neeg ruam, koj puas xav paub tias txoj kev ntseeg uas tsis ua haujlwm yeej tsis muaj qabhau dabtsi li?#2:20: tsis muaj qabhau dabtsi li; tej phau ntawv qub uas xuas tes sau, muaj tuag lawm.

21Peb yawgkoob Anplahas ua licas es nws thiaj ua tau haum Vajtswv siab? Qhov uas nws ua yog nws muab nws tus tub Ixaj tso rau saum lub thaj thiab muab tua fij rau Vajtswv ntag. #Chiv 22:1-14 22Koj tsis pom lov? Anplahas txoj kev ntseeg thiab nws tes haujlwm mus uake ibtxig. Nws tes haujlwm tau ua rau nws txoj kev ntseeg tiav. 23Tej no yeej muaj rawsli Vajtswv Txojlus sau tseg lawm hais tias, “Anplahas ntseeg Vajtswv, Vajtswv thiajli suav hais tias Anplahas yog neeg ncajncees.” Thiab Vajtswv thiaj hais tias, Anplahas yog Nws tus kwvluag. #Chiv 15:6; 2Xwm 20:7; Yaxaya 41:8 24Yogli ntawd, nej thiaj pom tias tus uas raug suav hais tias ncajncees yog vim nws tes haujlwm, tsis yog vim nws txoj kev ntseeg nkaus xwb.

25Ib yam li tus niamntiav uas hu ua Lahaj, nws tes haujlwm raug suav hais tias ncajncees, vim nws tostxais ob tug txivneej uas tuaj soj tebchaws mus so hauv nws tsev thiab qhia kom nkawd khiav lwm txojkev mus. #Yaus 2:1-21

26Lub cev uas tsis muaj ntsujplig yog lub cev uas tuag lawm, ib yam li ntawd, txoj kev ntseeg uas tsis ua haujlwm yog txoj kev ntseeg uas tuag lawm thiab.

Currently Selected:

Yakaunpaus 2: MWW2022

Highlight

Copy