Yakaunpaus 1

1Kuv yog Yakaunpaus uas yog Vajtswv thiab tus Tswv Yexus Khetos ib tug tubtxib: #Math 13:55; Malak 6:3; Teshl 15:13; Kalat 1:19

Kuv xa lolus nojqab nyobzoo tuaj rau Vajtswv haivneeg kaum-ob xeem uas khiav uasab uasua mus thoobplaws qhov txhia chaw hauv qabntuj no.

Kev Ntseeg Thiab Tswvyim

2Cov kwvtij, thaum nej raug ntau yam kev nyuajsiab, ciali suav hais tias tej ntawd yog koobhmoov zoo kawg. 3Rauqhov nej paub tias thaum nej txoj kev ntseeg kovyeej tej kev simsiab, yuav ua rau nej muaj peevxwm tiv taus. 4Nej yuavtsum ua siabntev mus li tsis txhob tsotseg, nej thiajli ua tau neeg zoo kawg nkaus, tsis muaj ib yam uas yuav tuncua li. 5Tiamsis yog nej leejtwg tuncua tswvyim, kom nws ciali thov ntawm Vajtswv, Vajtswv yuav pub rau nws, rauqhov Vajtswv yog tus muaj siabdawb siabzoo thiab pub ibpuas tsavyam rau sawvdaws. 6Tiamsis thaum nej thov, nej yuavtsum ntseeg tsis txhob ua xyemxyav. Tus uas ua xyemxyav, tus ntawd zoo ib yam li tej dej hiavtxwv uas cua ntsawj ntas mus ntas los. 7Tus uas zooli ntawd, nws tsis txhob xav tias nws yuav tau txais ib yam dabtsi los ntawm Vajtswv, 8rauqhov nws ua ob lub siab, yuav ua yam twg los ua tsis tsheej li.

Tus Pluag Thiab Tus Npluanuj

9Tus ntseeg uas pluag, nws yuavtsum zoosiab thaum Vajtswv tsa nws lub neej, 10thiab tus ntseeg uas npluanuj, nws yuavtsum zoosiab thaum Vajtswv txo nws lub neej. Rauqhov tus uas npluanuj yuav ploj mus ib yam li tej pajntoos. 11Vim thaum lub hnub tuaj tshavntuj yuav kub tej pajntoos, ua rau ntsws thiab zeeg tag, thiab nws txoj kev zoonkauj yuav ploj mus. Tibyam nkaus li ntawd, tus uas npluanuj yuav ploj mus thaum nws tabtom ua nws tes haujlwm fabfo. #Yaxaya 40:6-7 (LXX)

Kev Dag-Ntxias Thiab Kev Simsiab

12Tus uas ua siabntev tiv taus tej kev simsiab, tus ntawd yuav tau nyob kajsiab lug, rauqhov thaum nws tiv dhau tej kev simsiab lawm, nws yuav tau txais lub kausmom txojsia uas Vajtswv twb coglus tseg lawm hais tias Nws yuav muab rau tus uas hlub Nws. 13Yog leejtwg raug kev simsiab, tus ntawd tsis txhob hais tias, “Vajtswv tabtom sim kuv siab.” Rauqhov kev phem yeej sim tsis tau Vajtswv, thiab Vajtswv yeej tsis sim leejtwg siab. 14Tiamsis tus uas raug simsiab, yeej yog nws lub siab uas nyiam ua phem coj thiab rub nws mus ua. 15Thaum nws lub siab xeeb tau txoj kev phem lawm, ces nws txawm yug tau kev txhaum, thaum txoj kev txhaum ntawd loj txaus lawm, ces nws coj mus rau kev tuag.

16Cov kwvtij uas kuv hlub, nej tsis txhob cia leejtwg ntxias tau nej yuamkev. 17Txhua yam uas zoo thiab txhua yam koobhmoov uas zoo kawg nkaus yog los saum ntuj thiab los ntawm Vajtswv tus tsim lub hnub, lub hli, thiab tej hnubqub. Lub hnub thiab lub hli yeej ua rau lub ntiajteb txawj kaj txawj tsaus, tiamsis Vajtswv yeej zooli qub. 18Vajtswv lub homphiaj yog Nws xaiv peb los ua Nws cov menyuam los ntawm Nws txojlus tseeb, kom peb tau los ua tus thawj ntawm ibpuas tsavyam uas Vajtswv tsim.

Mlooglus Thiab Ua Haujlwm

19Cov kwvtij uas kuv hlub, nej yuavtsum ncontsoov li no: txhua tus yuavtsum maj mloog, tiamsis tsis txhob maj hais, thiab tsis txhob maj npautaws. 20Rauqhov neeg txoj kev npautaws yeej ua tsis tau kom Vajtswv txoj kev ncajncees tshwm tau tuaj. 21Yogli ntawd, nej yuavtsum tso nej tej kev phem kev qias txhua yam povtseg. Nej ciali txaussiab hlo khaws nkaus Vajtswv tej lus uas Nws muab cog rau hauv nej lub siab lawm cia. Tej lus ntawd muaj peevxwm pab tau kom nej dim.

22Nej yuavtsum ua rawsli Vajtswv Txojlus tiag-tiag, tsis txhob yog lam mloog xwb es yus rov dag yus tuskheej. 23Tus uas mloog Vajtswv Txojlus tag lawm tiamsis tsis ua rawsli tej lus ntawd, tus ntawd zoo ib yam li tus uas saib nws lub ntsejmuag hauv daim iav. 24Thaum nws saib tag thiab tawm mus lawm, nws twb tsis nco hais tias nws lub ntsejmuag zoo licas. 25Tiamsis tus uas ceevfaj ua tibzoo saib rawsli txoj kevcai zoo kawg nkaus uas pab tau neeg muaj kev ywjpheej, thiab nyob ruaj-khov rau hauv txoj kevcai ntawd, tus ntawd tsis yog tus uas mloog tas ces txawm tsis ncoqab lawm, tiamsis nws yeej coj thiab ua rawsli ntag, Vajtswv yuav foom koobhmoov rau yam uas nws ua.

26Tus uas xav tias nws coj tau Vajtswv txoj kevcai nruj lawm, tiamsis nws ceev tsis tau nws tus nplaig, ces yog nws rov dag nws tuskheej xwb; qhov uas nws coj nruj li ntawd yeej tsis muajnqis rau nws li. 27Txoj kevcai uas Vajtswv tus uas yog peb Leejtxiv suav hais tias yog txoj dawbhuv thiab tseeb yog li no: nej yuavtsum pab cov pojntsuam thiab cov menyuam ntsuag uas raug kev txomnyem thiab ceev nej tuskheej kom dhau ntawm ntiajteb tej kev phem kev qias.

Currently Selected:

Yakaunpaus 1: MWW2022

Highlight

Copy