Yaxayas 63

Vajtswv Kovyeej Txhua Haivneeg

1Tus uas tuaj hauv lub nroog Npauxelas, uas nyob hauv tebchaws Edoos tuaj, yog leejtwg? Tus uas hnav cev tsoostsho liab zoo kawg nkaus, uas taug kev#63:1: Tej cov ntawv qub-qub thaum ub sau hais tias taug kev; phau lus Henplais hais tias taw hau ntsoov. nrog lub hwjchim khovkho tuaj ntawd yog leejtwg?

“Twb yog Kuv, uas yog tus TSWV, tus uas muaj hwjchim cawm tau neeg, tabtom tuaj qhia txog Kuv txoj kev muajyeej.”

2Vim licas Koj cev tsoostsho yuav liab ualuaj, zoo li tus txivneej uas tsuj txivhmab ua cawv cev tsoostsho?

3Tus TSWV teb tias, “Kuv tau tsuj txhua haivneeg ib yam li tsuj txivhmab, mas tsis muaj leejtwg tuaj pab Kuv li. Kuv chim Kuv thiaj tsuj lawv, thiaj ua rau lawv tej ntshav txaws lo Kuv cev tsoostsho tas. #Tshwm 14:20; 19:15; Tshwm 19:13 4Twb txog lub sijhawm uas Kuv cawm Kuv haivneeg; thiab rautxim rau lawv cov yeebncuab lawm. 5Kuv tsa qhovmuag saib, tiamsis tsis muaj leejtwg pab Kuv, mas Kuv xav tsis thoob li. Yogli ntawd, Kuv lub hwjchim thiaj ua rau Kuv kovyeej, thiab Kuv txoj kev npautaws txhawb tau Kuv tus zog. #Yaxaya 59:16 6Vim Kuv txoj kev npautaws, Kuv thiaj tsuj txhua haivneeg ua rau lawv puasntsoog tas, thiab muab lawv cov ntshav hliv rau hauv av.” #Yaxaya 34:5-17; Yelemi 49:7-22; Exek 25:12-14; 35:1-15; Amaus 1:11-12; Aunpa 1-14; Mlakis 1:2-5

Tus TSWV Ua Zoo Rau Cov Yixalayees

7Kuv yuav qhia tus TSWV txoj kev hlub uas tsis paub kawg;

kuv qhuas Nws txog txhua yam uas Nws tau ua rau peb.

Nws tau foom koobhmoov nplua-mias rau cov neeg Yixalayees,

rauqhov Nws muaj txoj kev tabncuab thiab kev hlub uas ruaj-khov.

8Tus TSWV hais tias, “Lawv yog Kuv haivneeg; lawv yuav tsis dag Kuv.” Yogli ntawd, Nws thiaj cawm lawv 9dim ntawm lawv tej kev txomnyem. Tsis yog ib tug timtswv, tiamsis tus TSWV yog tus los cawm lawv ntag.#63:9: Tsis yog… cawm lawv ntag; phau los Henplais tias Nws tus timtswv yog tus los cawm lawv. Vim Nws txoj kev hlub thiab kev tabncuab, Nws thiaj tso lawv dim. Nws yeej ibtxwm tsomkwm lawv thaum ub los, 10tiamsis lawv tau ntxeevsiab rau Nws thiab tau ua rau Nws tus Ntsujplig Dawbhuv tusiab. Yogli ntawd tus TSWV thiaj dhau los ua lawv tus yeebncuab thiab tawmtsam lawv.

11Tiamsis lawv#63:11: Nqe no sau hais tias lawv; phau lus Henplais hais tias Nws. rov nco txog txheej thaum ub, tiam uas tus TSWV tus tubtxib Mauxes nyob, lawv thiaj nug hais tias, “Nimno tus TSWV uas cawm Nws haivneeg cov thawjcoj uas hla hiavtxwv nyob qhovtwg lawm? Tus TSWV uas pub Nws tus Ntsujplig rau Mauxes nyob qhovtwg? 12Tus TSWV uas tau siv Mauxes ua tej txujci tseemceeb los ntawm Nws lub hwjchim, uas tau muab hiavtxwv faib rau ob sab, ua kev rau Nws haivneeg taug, ua rau Nws tau ntsejmuag mus ibtxhis, nyob qhovtwg lawm?” #Khiav 14:21

13Vim tus TSWV coj lawv kev los, lawv kotaw muab nplua ib yam li tej nees qus, mas lawv tsis ntog li. 14Tus TSWV coj Nws haivneeg mus so ib yam li luag coj tej tsiaj mus rau lub hav uas muaj zaub mosnyoos. Nws coj Nws haivneeg kev, ua rau Nws lub npe muaj koobmeej.

Cov Yixalayees Tej Lus Thov

15Tus TSWV, thov saib saum ntuj, uas yog Koj qhov chaw nyob dawbhuv uas muaj Koj tus tshwjchim ci ntsa-iab, los rau peb. Koj txoj kev txhawjxeeb txog peb nyob qhovtwg lawm? Koj lub hwjchim nyob qhovtwg lawm? Koj txoj kev hlub thiab kev tabncuab nyob qhovtwg? Thov tsis txhob tso peb tseg. 16Koj thiaj yog peb Txiv. Txawm yog peb yawgkoob Anplahas thiab Yakhauj nkawd tsis lees paub peb los, Koj, uas yog tus TSWV, tus uas yog peb Txiv, yog tus uas ibtxwm cawm peb. 17Vim licas Koj cia peb yuamkev tsis taug Koj txojkev? Vim licas Koj ua rau peb tawv ncauj ualuaj, peb thiaj tsis hwm Koj? Thov Koj rov los, vim peb yog Koj cov tubtxib thiab ibtxwm yog Koj haivneeg.

18Peb yog Koj haivneeg uas dawbhuv, peb tau raug yeebncuab muab raws tawm mus ib ntus, thiab lawv tau muab Koj lub chaw uas dawbhuv ua puastsuaj tag.#63:18: Nqe 18 no paub tsis meej tias lus Henplais yog txhais licas tiag. 19Koj ua rau peb yam li Koj yeej tsis tau kav peb dua, thiab yam li peb yeej tsis yog Koj haivneeg hlo li.

Currently Selected:

Yaxayas 63: MWW2022

Highlight

Copy