Yaxayas 46
46
1No yog qhov kawg rau cov Npanpiloos tej nyuag vajtswv lawm!
Yav tas los neeg tuaj pe tus mlom Npees thiab tus mlom Nenpaus,
tiamsis nimno luag muab rau tsiaj thauj,
tej mlom ntawd tsuas ua lub nra hnyav rau tej tsiaj lawm xwb.
2Ob tug mlom ntawd yeej cawm tsis tau lawv li;
thiaj raug luag muab nqa mus lawm.
Npanpiloos ob tug mlom ntawd thiaj los xaus li ntawd lawm!
3“Yakhauj cajces, cov uas yog haivneeg Yixalayees uas tseem tshuav nyob,
nej ciali mloog Kuv hais.
Kuv yeej tsomkwm thiab tu nej txij thaum nej yug los lawm.
4Kuv yog nej tus Vajtswv, thiab Kuv yuav tu nej
mus txog thaum nej laus thiab plaubhau dawbpaug.
Kuv yog tus tsim nej thiab yuav tu nej;
Kuv yuav pab nej thiab cawm nej.
5“Nej yuav muab Kuv piv rau leejtwg?
Puas muaj lwmtus zoo li Kuv?
6Neeg qhib lawv tej hnab thiab rho lawv tej kub los;
muab tej nyiaj los luj saum rab teev.
Lawv ntiav ib tug txawj nchuav kub tuaj nchuav ib tug mlom;
ces lawv mus txhoscaug thiab pehawm tus mlom ntawd.
7Lawv tsaws tus mlom ntawd rau saum xubpwg thiab kwv mus;
lawv coj mus txawb rau ib qhov chaw thiab cia nyob rau ntawd,
tus mlom ntawd mus tsis tau qhovtwg li.
Txawm yog muaj neeg thov nws los nws yeej tsis paub teb,
lossis nws cawm tsis tau leejtwg dim ntawm txoj kev puastsuaj li.
8“Nej cov neeg uas ntxeevsiab, nej yuavtsum ncontsoov tej no,
tsis txhob hnovqab thiab khaws nkaus cia rau nruabsiab.
9Ncontsoov tej xwmtxheej uas tau tshwmsim thaum ub los lawm;
Kuv tibleeg xwb thiaj yog Vajtswv;
yeej tsis muaj lwmtus zoo li Kuv.
10Thaum chivkeeb Kuv twb qhia txog qhov uas thaum kawg yuav zoo licas lawm;
yav tas los Kuv twb qhia tias yuav muaj dabtsi tshwmsim.
Tej uas Kuv npaj lawm, Kuv yeej yuav ua kom tiav,
thiab Kuv yuav ua txhua yam rawsli Kuv lub siab nyiam.
11Kuv hu ib tug neeg tuaj tim hnubtuaj tuaj;#46:11: ib tug neeg tuaj tim hnubtuaj tuaj: Saib 41:2.
Nws yuav ya qis-qis li tus liaj tuaj
thiab ua kom Kuv tes haujlwm tiav.
Kuv tau hais licas lawm, Kuv yuav ua li ntawd,
thiab Kuv tau npajsiab licas lawm, Kuv yuav ua li ntawd.
12“Cov neeg tawv ncauj, cov uas tseem nyob deb ntawm Kuv txoj kev dawbhuv,
nej ciali mloog Kuv hais!
13Kuv tabtom coj txoj kev dawbhuv los ze nej,
twb nyob tsis deb lawm.
Thiab Kuv txoj kev cawmdim yuav tsis muab ncua tseg;
Kuv yuav cawm lub nroog Yeluxalees
thiab yuav coj lub koobmeej zoo los rau cov Yixalayees.”
Currently Selected:
Yaxayas 46: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
