Yaxayas 44
44
Tus TSWV Tibleeg Thiaj Yog Vajtswv
1Tus TSWV hais tias,
“Cov Yixalayees, uas yog Kuv cov tubtxib,
Yakhauj cajces, haivneeg uas Kuv xaiv tseg lawm,
nimno nej ciali mloog Kuv hais!
2Kuv yog tus TSWV, tus uas tsim nej,
txij thaum nej yug los, Kuv yeej pab nej.
Yakhauj, Kuv tus tubtxib,
Yesuloos,#44:2: Yesuloos; lossis Yixalayees. uas Kuv tau xaiv tseg thiab Kuv hlub,
nej tsis txhob ntshai!
3“Kuv yuav tso dej los rau hauv lub tebchaws uas nqhis dej
thiab ua kom muaj dej ntws saum tej av qhuav.
Kuv yuav tso Kuv tus Ntsujplig los rau nej cov menyuam,
thiab foom koobhmoov rau nej tej cajces.
4Lawv yuav hlob mosnyoos li tej nroj uas muaj dej ywg,
zoo li tej lwgzaj uas tuaj ntawm ntug dej.
5“Tej neeg ib leeg yuav hais rau ib leeg tias, ‘Kuv yog tus TSWV li.’
Lawv yuav los kavxeem ua haivneeg Yixalayees.
Lawv nyias taug nyias sau tus TSWV lub npe rau ntawm nyias txhais npab
thiab hu lawv tuskheej hais tias lawv yog Vajtswv haivneeg.”
6Tus TSWV uas yog cov Yixalayees tus Vajntxwv thiab yog lawv tus Cawmseej,
tus TSWV uas muaj Hwjchim Loj Kawg Nkaus, hais li no:
“Kuv yog lub hauvpaus thiab yog lub ntsis;
tsis muaj lwmtus vajtswv li, tsuas yog Kuv tibleeg xwb. #Yaxaya 48:12; Tshwm 1:17; 2:8; 22:13
7Leejtwg muaj peevxwm ua tau li Kuv ua? Kom nws qhia los.
Leejtwg muaj peevxwm qhia tau txhua yam, pib thaum hauvpaus uas Kuv tsa Kuv haivneeg
mus txog thaum kawg rau peb mloog?#44:7: Nqe 7 no paub tsis meej tias lus Henplais yog txhais licas tiag.
8Kuv haivneeg, nej tsis txhob ntshai!
Nej twb paub tias txij puag thaum ub los txog nimno
Kuv twb qhia txog txhua yam uas yuav tshwmsim rau nej paub lawm
thiab nej yog Kuv cov timkhawv.
Puas muaj dua lwmtus vajtswv lawm?
Tseem muaj dua lwmtus vajtswv uas muaj hwjchim heev, uas Kuv tsis tau hnov dua thiab lov?”
Kev Pe Mlom Tsis Muajnqis
9Cov neeg uas puab mlom yeej tsis tseemceeb, thiab tej mlom uas lawv hwm ntawd yeej tsis muajnqis dabtsi. Cov neeg uas pe tej mlom no yog cov digmuag thiab tsis paub qabhau, lawv yuav raug kev txajmuag. 10Tus neeg ruam yog tus uas nchuav ib tug nyuag vajtswv lossis nchuav mlom los rau nws pe, vim tej ntawd yeej pab tsis tau nws dabtsi li. 11Txhua tus uas pe mlom yuav raug kev txajmuag. Cov neeg uas puab mlom puavleej yog neeg xwb, tiamsis lawv khav tias lawv muaj cuabkav txua tau ib tug vajtswv. Cia lawv los rau ntawm lub rooj txiavtxim, lawv yuav ntshai thiab yuav txajmuag heev.
12Tus uas ntaus hlau muab ib thooj hlau coj mus hlawv rau hauv lwjhlaus. Nws sab npab uas muajzog tuav rauj ntaus thooj hlau ua tau ib tug mlom. Thaum nws ua haujlwm nws txawj tshaib plab, nqhis dej, thiab sab.
13Tus txua ntoo muab thooj ntoo los ntsuas. Nws muab cwjmem suam thoobplaws, nws muab txaug los txaug thooj ntoo ntawd kom zoo li neeg tus yamntxwv uas zoonraug ntxiag, thiab coj mus teeb rau hauv nws lub tsev. 14Nws ntov tej ntoo ciab lossis xaiv tej ntoo qhib lossis ntoo npeb hauv havzoov los siv. Lossis nws cog yub ntoo thuv cia thiab tos nag los ywg kom tej yub ntawd hlob. 15Tus neeg ntawd muab ib tog ntoo los ua taws rauv thiab muab ib tog los txua ua mlom. Nws muab ib tog ua taws rauv rau nws nte thiab ci ncuav; dua li ntawd nws muab ib tog los txua ua ib tug mlom rau nws pehawm. 16Nws muab ibtxhia ua taws rauv; nws ci nqaij noj qhuas ntxhias thiab nws txaussiab heev. Nws tau tej taws ntawd nte sovso thiab nws hais tias, “Uacas yuav zoo thiab sov ualuaj! Tej ntoo no cig zoo kawg.” 17Tog ntoo uas seem, nws muab txua ua ib tug mlom, nws mus qhau cev rau thiab pehawm tus mlom ntawd. Nws thov tus mlom ntawd hais tias, “Koj yog kuv tus vajtswv, thov koj cawm kuv!”
18Cov neeg ntawd ruam kawg li, lawv tsis paub tias lawv ua dabtsi. Lawv qi lawv lub qhovmuag lawv thiaj tsis pom, thiab lawv kaw lawv lub hlwb lawv thiaj tsis totaub. 19Tus uas txua mlom twb ras tsis txog tias, “Kuv muab ibnrab ntawm tog ntoo ntawd los ua taws rauv. Kuv ci ncuav thiab ci nqaij saum cov ncaig los noj. Tog ntoo uas seem, kuv muab txua ua ib tug mlom, thiab kuv tseem mus pe tog ntoo ntawd thiab!”
20Qhov uas nws pe mlom ntawd ces cuag li#44:20: Qhov uas nws pe mlom ntawd ces cuag li lossis Qhov zoo tshaj rau nws ces kawg. noj tshauv ntag. Nws lub siab ruam coj nws mus yuamkev. Nws tsis kam lees tias tus mlom uas nws tuav rawv ntawm tes ntawd yeej tsis yog vajtswv hlo li.
Tus TSWV Yog Tus Tsim Thiab Yog Tus Cawmseej
21Tus TSWV hais tias,
“Yixalayees, ncontsoov tej no;
ncontsoov tias nej yog Kuv cov tubtxib.
Kuv tsim nej los ua Kuv cov tubtxib,
mas Kuv yuav tsis hnovqab nej li.
22Kuv tau muab nej tej kev txhaum tshem mus li tauv huab,
thiab tshem nej lub txim li tauv huab pw hav thaum sawvntxov.
Nej ciali rov los cuag Kuv; Kuv thiaj yog tus uas txhiv nej.”
23Lub ntuj, ciali hunkauj zoosiab
rau tej uas tus TSWV tau ua tiav lawm!
Nruab tivtxwv ciali tsa suab qw nrov-nrov!
Tej roob siab, tej havzoov, thiab txhua tus ntoo, ciali hunkauj zoosiab,
rauqhov tus TSWV tau cawm haivneeg Yixalayees dim,
thiab Nws tus tshwjchim uas ci ntsa-iab nyob rau hauv Yeluxalees.
24“Kuv yog tus TSWV, uas yog nej tus Cawmseej;
Kuv yog tus tsim nej.
Kuv yog tus TSWV, uas tsim ibpuas tsavyam.
Kuv tibleeg yog tus nthuav lub ntuj;
thaum Kuv tsim lub ntiajteb, yeej tsis muaj leejtwg pab Kuv li.
25Kuv ua kom cov neeg saib hmoov tej lus tsis tseeb,
thiab muab cov neeg uas txawj saib hnub saib hli tej lus rhuav kom tsis tshwmsim rawsli lawv hais.
Kuv ua kom cov neeg ntse tej lus tsis muaj kuab,
thiab ua kom lawv pom tias lawv tej kev txawjntse tsis muaj qabhau dabtsi. #1Klt 1:20
26Tiamsis thaum Kuv tus tubtxib qhia tej uas yuav tshwmsim los,
thiab thaum Kuv txib Kuv tus tubtxib mus qhia tej uas Kuv yuav ua,
Kuv yuav ua kom tej ntawd tshwmsim rawsli tau npaj tseg.
Kuv qhia lub nroog Yeluxalees tias yuav rovqab muaj neeg los nyob rau hauv,
thiab qhia cov Yudais tej nroog tias lawv yuav rov raug txhimkho dua tshiab.
Kuv yuav tsa lawv tej nroog uas raug puastsuaj lawm sawv rov los.
27Kuv xaaj tiblos xwb dej hiavtxwv yuav nqhuab tas huv tibsi.
28Kuv hais rau Xailas tias, ‘Koj yog Kuv tus tub yug yaj,
koj yuav ua haujlwm kom tiav rawsli Kuv lub siab nyiam;
koj yuav xaaj kom rov txhimkho lub nroog Yeluxalees dua tshiab,
thiab kom rov pua lub tuamtsev dua tshiab.’ ” #2Xwm 36:23; Exek 1:2
Currently Selected:
Yaxayas 44: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
