Yaxayas 41
41
Vajtswv Coglus Pab Cov Yixalayees
1Vajtswv hais tias,
“Tej tebchaws uas nyob deb, nej ciali nyob twjywm thiab mloog Kuv hais!
Nej ciali npaj mus hais nej li plaub hauv tsev tu plaub;
nej yuav muaj sijhawm hais nej zaj.
Cia peb uake mus txiavtxim seb leejtwg yog tus muaj cai.
2“Leejtwg mus zes tus uas muajyeej nyob tim sab hnubtuaj?#41:2: tus uas muajyeej nyob tim sab hnubtuaj Yog Xailas, uas yog cov Pawxias tus vajntxwv (saib 45:1).
thiab ua rau nws kovyeej txhua thaj chaw uas nws mus txog?
Leejtwg cia nws tua yeej tej vajntxwv thiab tej neeg?
Nws rab ntaj tua lawv ntog pawglug li tej hmoov av xwb.
Nws rab hneevnti ua rau lawv tawg khiav ri sua yam li cua ntsawj tej quavnyab.
3Nws raws lawv qab thiab taug kev mus ntxiv tsis raug xwmtxheej dabtsi,
nws taug ib txojkev uas nws txhais kotaw tsis tau taug dua.
4Leejtwg yog tus ua kom muaj tej xwm no tshwmsim tuaj?
Leejtwg yog tus uas teev caijnyoog keebkwm thaum ub los?
Kuv, uas yog tus TSWV, yog tus nyob thaum chivkeeb los,
thiab Kuv, yog tus uas yuav nyob thaum kawg.
5“Cov neeg uas nyob tej tebchaws deb twb pom tej uas Kuv tau ua tas los lawm;
lawv ntshai tsheehnyo.
Yogli ntawd lawv thiaj sibsau tuaj uake.
6Cov uas muaj txujtes zoo, lawv sibpab
thiab ib leeg txhawb ib leeg lub zog tias, ‘Yuavtsum khovkho!’
7Tus uas txua ntoo txhawb tus uas nchuav kub zog tias, ‘Zoo kawg li!’
Tus uas muab rauj ntaus tej mlom kom du ntauglees
txhawb tus uas muab ntsia los ntsia uake lub zog.
Lawv hais tias, ‘Ham tau zoo kawg li,’
thiab lawv muab ntsia hlau ntsia tus mlom ntawd rau ntawm nws qhov chaw ruaj heev.
8“Tiamsis Yixalayees, nej yog Kuv cov tubtxib,
nej yog haivneeg uas Kuv tau xaiv tseg,
yog Kuv tus phoojywg Anplahas li cajces. #2Xwm 20:7; Yakau 2:23
9Kuv coj nej tawm tim qabntuj kawg los,
Kuv hu nej tim plaub cegkaum ntuj uas deb kawg nkaus los,
thiab hais rau nej tias, ‘Nej yog Kuv cov tubtxib.’
Kuv twb xaiv nej lawm, thiab yuav tsis tso nej tseg ib zaug li.
10Tsis txhob ntshai, rauqhov Kuv yeej nrognraim nej!
Kuv yog nej tus Vajtswv, mas nej tsis txhob poobsiab!
Kuv yuav txhawb kom nej muajzog thiab pab nej;
Kuv sab tes xis uas muajyeej yuav puag rawv nej.
11“Cov neeg uas chim rau nej,
lawv yuav swb thiab raug txajmuag.
Cov neeg uas tawmtsam nej, yuav puastsuaj thiab tuag tas.
12Txawm nej mus nrhiav cov yeebncuab uas tawmtsam nej,
los nej yuav tsis ntsib.
Cov uas uarog rau nej
los yuav puastsuaj thiab tuag tas.
13Kuv yog tus TSWV, uas yog nej tus Vajtswv;
Kuv yeej tuav rawv nej sab tes xis thiab hais rau nej tias,
‘Tsis txhob ntshai, Kuv yuav pab nej.’ ”
14Tus TSWV hais tias,
“Cov Yixalayees, txawm yog nej zoo li tus nyuag cab liab uas me-me thiab tsis muajzog,
los nej tsis txhob ntshai; Kuv yuav pab nej.
Kuv yog cov Yixalayees tus Vajtswv uas dawbhuv,
Kuv yog tus yuav cawm nej.
15Kuv yuav ua kom nej zoo ib yam li daim txiag ntaus nplej
uas hniav tshiab thiab ntse.
Nej yuav ntaus tej roob thiab muab tsoo kom tawg;
tej ncov roob yuav raug tsoo ua hmoov av tas.
16Nej yuav ntxuaj lawv rau saum nruabntug,
mas cua yuav muab lawv ntsawj ya mus,
thiab cuadaj cuadub yuav muab lawv ntsawj ya rau ub rau no.
Tiamsis nej yuav zoosiab heev, rauqhov Kuv yog nej tus Vajtswv;
nej yuav qhuas Kuv, uas yog cov Yixalayees tus Vajtswv uas dawbhuv.
17“Thaum Kuv haivneeg uas pluag thiab txomnyem tuaj nrhiav dej haus,
thaum lawv nqhis dej ua rau qa qhuav tas lawm,
thaum ntawd Kuv, uas yog tus TSWV yuav teb lawv tej lus thov;
Kuv, uas yog cov Yixalayees tus Vajtswv, yuav tsis tso lawv tseg ib zaug li.
18Kuv yuav ua kom muaj dej txhawv saum tej roob qhua,
thiab ua kom dej txhawv ntws nto hauv tej hav.
Kuv yuav ua kom tej tiaj suabpuam muaj pas dej txhua qhov
thiab ua kom muaj dej txhawv hauv tej av qhuav los.
19Kuv yuav ua kom ntoo thuv, ntoo kubtwg, ntoo tswqab, thiab ntoo-roj,
tuaj taus saum tej mojsab qhua.
Kuv yuav ua kom tiaj suabpuam ciaj zoov nujtxeeg,
ntoo thuv, ntoo ciab, thiab ntoo thwjsuab yuav puv lub zoov ntawd.
20Neeg yuav pom thiab paub tias
Kuv, uas yog tus TSWV, yog tus ua tej no.
Lawv thiaj yuav paub tias
haivneeg Yixalayees tus Vajtswv dawbhuv yog tus uas ua kom muaj tej no.”
Tus TSWV Thuam Tej Nyuag Vajtswv Cuav
21Tus TSWV, uas yog cov Yixalayees tus Vajntxwv hais tias,
“Ciali coj nej tej nyuag vajtswv tuaj hais nej rooj plaub.
Coj nej lub tswvyim sibcav uas zoo tshajplaws nrog nej tuaj!
22Nej ciali tuaj thiab qhia seb yuav muaj dabtsi tshwmsim tuaj,
kom peb thiaj paub tias thaum twg tej ntawd yuav tshwmsim.
Qhia tej xwmtxheej thaum ub rau peb seb yog dabtsi,
thiab qhia seb lub ntsiab ntawm tej ntawd yog dabtsi.
23Qhia rau peb seb yav tomntej no yuav muaj dabtsi tshwmsim los,
kom peb thiaj paub tias nej yog tej nyuag vajtswv tiag!
ua tej yam zoo lossis tej yam phem
kom peb ntshai thiab yoob tag huvsi!
24Nej thiab tej uas nej ua yeej tsis tseemceeb dabtsi;
cov neeg uas pehawm nej mas vuabtsuab kawg li.
25“Kuv twb xaiv ib tug neeg uas nyob sab hnubtuaj#41:25: ib tug neeg uas nyob sab hnubtuaj Saib 41:2. tseg lawm;
Kuv yuav coj nws pem sab qaumteb tuaj tua nej.
Nws yuav tsuj cov nomtswv cuag li lawv yog tej av nkos,
zoo li tus puab laujkaub tsuj tej av nplaum.
26Nej leejtwg tau qhia hais tias tej no yuav tshwmsim los
kom peb thiaj hais tau tias nws qhia yog lawm?
Nej yeej tsis muaj ib tug uas tau hais txog zaj no li;
thiab yeej tsis muaj ib tug twg uas hnov nej hais txog zaj no li!
27Kuv, uas yog tus TSWV, yog tus uas xub qhia txoj xov zoo rau lub nroog Xi-oos;
Kuv txib ib tug mus rau lub nroog Yeluxalees kom mus hais tias,
‘Nej cov pejxeem tabtom los lawm! Lawv tabtom los tsev!’#41:27: Nqe 27 no paub tsis meej tias lus Henplais yog txhais licas tiag.
28Thaum Kuv saib cov mlom ntawd,
lawv yeej tsis muaj ib lolus hais li;
yeej tsis muaj ib tug uas yuav teb tau tej lus uas Kuv nug hlo li.
29Saib maj, tagnrho cov ntawd yeej tsis muaj qabhau kiag li;
lawv yeej ua tsis tau ib yam dabtsi li,
cov mlom ntawd tsis muajzog thiab tsis muaj hwjchim dabtsi kiag li.”
Currently Selected:
Yaxayas 41: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
