Yaxayas 38

Vajntxwv Hexekiyas Mob Thiab Rov Zoo

(2 Vajntxwv 20:1-11; 2 Xwmtxheej Vajntxwv 32:24-26)

1Thaum ntawd Vajntxwv Hexekiyas mob hnyav heev, yuavluag tuag. Ces Yaxayas uas yog tus xibhwb cev Vajtswv lus, uas yog Amoj tus tub, txawm tuaj saib nws thiab hais rau nws tias, “Tus TSWV hais tias koj ciali npaj txhua yam kom txhij rau lub tsev, rauqhov koj yuav tsis zoo. Koj yeej yuav tuag xwb.”

2Ces Hexekiyas txawm tig ntsejmuag rau tim phabntsa thiab thov hais tias, 3“Tus TSWV, thov Koj nco tias kuv yeej ibtxwm ncajncees rau Koj, ua Koj tes haujlwm kawg siab kawg ntsws, thiab ua rawsli Koj lub siab nyiam xwb.” Ces nws txawm quaj tusiab heev.

4Ces tus TSWV hais rau Yaxayas tias, 5“Koj ciali rov mus cuag Hexekiyas thiab hais rau nws tias, ‘Kuv yog tus TSWV, uas yog koj yawgkoob Daviv tus Vajtswv, Kuv twb hnov koj tej lus thov thiab pom koj tej kuamuag lawm; Kuv yuav ntxiv hnubnyoog rau koj ua neej nyob kaum-tsib xyoos ntxiv. 6Kuv yuav cawm koj thiab lub nroog Yeluxalees kom dim ntawm cov Axilias tus huabtais txhais tes, thiab Kuv tseem yuav tivthaiv lub nroog no mus.’ ”

7Yaxayas hais tias, “Tus TSWV yuav muab ib yam los ua lub cim qhia rau koj tias Nws yuav ua rawsli Nws tej lus cogtseg. 8Nyob rau ntawm tus ntaiv uas Vajntxwv Ahaj ua, tus TSWV yuav muab tus duab hnub thim rovqab kaum theem qib ntai.” Ces tus duab hnub txawm thim rovqab kaum theem qib ntai.#38:8: qib ntai… kaum theem qib ntai; lossis muab lub ntsuas hnub… tig kaum theem rovqab (saib 2 Vajntxwv 20:9-11).

9Tomqab Vajntxwv Hexekiyas zoo nws tus mob lawm, nws sau zaj nkauj no:

10Kuv xav tias thaum kuv ua neej txog nrab lawm

Kuv yuav tau mus rau hauv tubtuag teb,

Kuv yuav tsis muaj sia nyob ntxiv li lawm.

11Kuv xav tias kuv yuav tsis pom tus TSWV

Lossis pom cov neeg uas tseem muaj sia nyob

Rau hauv lub ntiajteb no ib zaug li lawm.

12Kuv txojsia twb raug muab txiav tu thiab tub kawg lawm,

Zoo yam li lub tsevntaub uas twb muab rhuav tas,

Zoo yam li tej ntaub uas twb muab txiab txiav tu lawm.

Kuv xav tias Vajtswv twb rho kuv txojsia lawm.#38:12: Kuv xav tias… kuv txojsia lawm; paub tsis meej tias lus Henplais yog txhais licas tiag txog qhov no.

13Kuv quaj ib hmos kajntug vim kuv tus mob,

Zoo yam li tsov ntxhuav muab kuv tej txha lov tag,

Kuv xav tias Vajtswv twb rho kuv txojsia lawm.#38:13: Nqe 13 no paub tsis meej tias lus Henplais yog txhais licas tiag.

14Kuv lub suab nrov me-me thiab tsis muajzog kiag li,

Kuv ntsaj li tus nquab ntsaj.

Kuv qhib tsis taus kuv ob lub qhovmuag saib saum ntuj.

Tus TSWV, kuv nyuajsiab heev, thov pab kuv!

15Kuv yuav hais licas? Tus TSWV yog tus ua tej no.

Kuv nyuajsiab heev, kuv pw tsis tsaugzog li.#38:15: Ib phau ntawv qub-qub thaum ub sau hais tias kuv pw tsis tsaugzog li; paub tsis meej tias lolus Henplais yog txhais licas tiag txog qhov no.

16Tus TSWV, neeg muaj txojsia twb yog vim muaj tej no; thiab kuv muaj txojsia, twb yog vim muaj tej no ntag.

Thov Koj kho kuv tus mob kom zoo, kom kuv muaj sia nyob.#38:16: Nqe 15 thiab 16 no paub tsis meej tias lus Henplais yog txhais licas tiag.

17Kuv tej kev nyuajsiab yuav hloov mus ua kev kajsiab.

Koj cawm#38:17: Tej cov ntawv qub-qub thaum ub sau hais tias cawm; phau lus Henplais hais tias hlub. kuv txojsia dim ntawm lub qhov uas yog kev puastsuaj los;

Koj zam tagnrho kuv tej kev txhaum.

18Tsis muaj ib tug uas nyob hauv tubtuag teb yuav txawj qhuas Koj;

Cov tuag lawm yeej tsis txawj tsosiab rau Koj txoj kev ncajncees.

19Tsuas yog cov uas muaj sia nyob thiaj qhuas Koj

Li hnubno uas kuv qhuas Koj xwb.

Tej niam tej txiv qhia lawv cov menyuam tias Koj yog tus ncajncees.

20Tus TSWV, Koj tau kho kuv tus mob zoo lawm.

Peb yuav ntaus nkauj nogncas thiab hunkauj qhuas Koj,

Yuav hunkauj qhuas Koj hauv Koj lub Tuamtsev mus tas simneej.

21Ces Yaxayas hais rau vajntxwv cov tubtxib tias, “Nej muab txiv ncuavpias tsoo qhwv lub rwj, ces nws yeej yuav zoo xwb.” 22Vajntxwv Hexekiyas nug hais tias, “Dabtsi uas ua lub cim qhia tias kuv yuav mus tau rau hauv tus TSWV lub Tuamtsev?”#38:22: Nqe 21-22 no, muaj tej phau muab tso tomqab nqe 6.

Currently Selected:

Yaxayas 38: MWW2022

Highlight

Copy