Henplais 7

Mekhixedes Uas Yog Tus Povthawj Hlob

1Tus Mekhixedes no yog tus vajntxwv kav lub nroog Xalees thiab yog Vajtswv tus uas muaj Hwjchim Tshajplaws ib tug povthawj hlob. Nws tau ntsib Anplahas thaum Anplahas rov los tom tshavrog los, uas yog nws tau kovyeej plaub tug vajntxwv; Mekhixedes txawm ntsib nws thiab foom koobhmoov rau nws. #Chiv 14:17-20 2Anplahas tau muab ib feem kaum ntawm txhua yam uas nws txeeb tau los rau Mekhixedes. (Thawj lub ntsiablus ntawm Mekhixedes lub npe yog txhais hais tias, “Vajntxwv ntawm kev Ncajncees”; thiab vim nws yog tus vajntxwv kav lub nroog Xalees, nws lub npe kuj txhais tau hais tias, “Vajntxwv ntawm kev Thajyeeb” no thiab.) 3Yeej tsis muaj ntaub ntawv hais txog Mekhixedes niam thiab txiv lossis nws cajces; tsis muaj ntaub ntawv hais txog hnub uas nws yug lossis hnub uas nws tuag. Nws zoo ib yam li Vajtswv tus Tub; nws ua tus povthawj hlob mus ibtxhis li.

4Yogli ntawd, nej pom tias nws muaj hwjchim loj npaum licas diam. Anplahas uas yog peb tus yawgkoob uas muaj koob nto npe, nws tau muab ib feem kaum ntawm txhua yam uas nws txeeb tau hauv txoj kev sibntaus sibtua los rau Mekhixedes. 5Txoj Kevcai tau qhia kom Levis cajces uas ua povthawj hlob, yuavtsum sau ib feem kaum ntawm haivneeg Yixalayees, uas yog kiag lawv haivneeg los rau lawv; txawm lawv puavleej yog Anplahas cajces los xij. #Teev 18:21 6Mekhixedes tsis yog cajces los ntawm Levis, tiamsis nws txais Anplahas li ib feem kaum thiab foom koobhmoov rau Anplahas tus uas tau txais tej uas Vajtswv coglus tseg. 7Tsis tag yuav nug li, tus uas foom koobhmoov yeej muaj hwjchim loj dua tus uas tau txais koobhmoov.

8Nyob rau hauv Levis cov povthawj hlob, ib feem kaum yog sau los ntawm cov neeg uas txawj ploj txawj tuag, tiamsis rau Mekhixedes ces yog sau los ntawm tus uas tseem ciajsia, uas yog rawsli Vajtswv Txojlus tau hais tseg. 9Tejzaum yuav muaj tus uas hais tias, thaum Anplahas muab ib feem kaum rau Mekhixedes, ces Levis kuj muab lawm thiab. (Levis cajces yog cov uas sau sawvdaws ib feem kaum.) 10Rauqhov thaum Mekhixedes ntsib Anplahas, Levis tseem nyob hauv Anplahas tus uas yog nws tus yawgkoob tej rojntsha.

11Yog xeem Levis cov povthawj hlob twb ua tau tej haujlwm uas zoo kawg nkaus lawm, ces tsis tas yuav muaj dua ib tug povthawj hlob uas muaj yamntxwv zooli Mekhixedes los hloov cov povthawj hlob uas muaj yamntxwv zooli Aloos. (Qhov uas haivneeg Yixalayees tau txais txoj Kevcai twb yog los ntawm cov povthawj hlob uas yog xeem Levis ntag.) 12Rauqhov yog thaum twg uas cov povthawj hlob raug hloov lawm, ces txoj kevcai los yuavtsum raug hloov ib yam nkaus thiab. 13Peb tug Tswv, uas tej no tau hais txog, Nws yog lwm xeem, thiab xeem ntawd yeej tsis tau muaj ib tug tau los ua povthawj hlob kiag li. 14Sawvdaws puavleej paub zoo hais tias peb tus Tswv yog yug los ntawm xeem Yudas, thiab thaum Mauxes hais txog cov povthawj hlob, nws yeej tsis tau hais txog xeem no kiag li.

Ib Tug Povthawj Hlob Uas Zooli Mekhixedes

15Zaj no hajyam ua rau sawvdaws paub meej ntxiv; tau muaj dua ib tug povthawj hlob tshwmsim los uas zooli Mekhixedes. 16Nws tau peemtsheej los ua ib tug povthawj hlob, tsis yog los ntawm tej kevcai tiamsis yog los ntawm lub hwjchim muaj txojsia uas tsis muaj leejtwg rhuav tau. 17Rauqhov Vajtswv Txojlus tau ua timkhawv hais tias, “Koj yuav ua ib tug povthawj hlob mus ibtxhis ib yam li Mekhixedes.”#7:17: ib yam li Mekhixedes (saib 5:6). #Nnkauj 110:4 18Yogli ntawd, thiaj muab txoj kevcai qub tsotseg, rauqhov txoj kevcai ntawd ua tsis tau haujlwm thiab siv tsis tau. 19Mauxes txoj Kevcai yeej ua tsis tau kom ib yam twg zoo kawg nkaus. Nimno peb muaj ib qho chaw ciasiab uas zoo dua qhov ntawd los ntxiv, thiajli ua rau peb los nyob ze tau rau ntawm Vajtswv.

20Dua li ntawd, yog tseem muaj Vajtswv tej lus cogtseg. Thaum lwmtus raug tsa los ua povthawj hlob yeej tsis muaj tej lus cogtseg ntawd li. 21Tiamsis thaum Yexus los ua tus povthawj hlob, Vajtswv coglus tseg rau Nws hais tias:

“Tus Tswv coglus tseg hais tias,

‘Koj yuav ua ib tug povthawj hlob mus ibtxhis li.’ ” #Nnkauj 110:4

22Qhov txawv no, thiaj ua rau Yexus hais tau hais tias txoj kevcai tshiab zoo dua txoj qub.

23Muaj ib qhov uas txawv yog li no: xeem Levis muaj coob leej ua povthawj hlob ib tiam dhau ib tiam, vim muaj kev tuag los tivthaiv thiaj ua rau lawv ua tsis tau haujlwm mus ibtxhis. 24Tiamsis Yexus muaj sia nyob mus ibtxhis li, thiab Nws tes haujlwm ua povthawj hlob tsis poob mus rau lwmtus ua. 25Vimli ntawd, tsis hais nimno lossis mus ibtxhis, Nws muaj cuabkav pab tau cov neeg los cuag Vajtswv uas yog los ntawm Nws mus, rauqhov Nws muaj txojsia nyob mus ibtxhis thiab thov Vajtswv pab lawv.

26Yexus yog tus Tuam Povthawj Hlob uas pab tau tej uas peb cheemtsum. Nws yog tus uas dawbhuv; Nws yeej tsis tau ua txhaum lossis yeej tsis muaj ib qho kev txhaum nyob rau hauv Nws kiag li. Nws tau raug muab cais tawm ntawm cov neeg txhaum thiab tau raug tsa nyob rau lub chaw samxeeb saum ntuj ceebtsheej. 27Nws tsis zooli lwmtus tuam povthawj hlob; Nws tsis tag yuav niajhnub tua tsiaj theej Nws lub txhoj uantej es mamli theej sawvdaws lub. Nws theej tibzaug xwb, ces yeej theej tau mus ibtxhis li lawm, uas yog thaum Nws muab Nws tuskheej theej sawvdaws. #Levi 9:7 28Mauxes txoj Kevcai tsa cov neeg uas zoo tsis txaus los ua cov povthawj hlob, tiamsis tej lus uas Vajtswv cogtseg tomqab txoj Kevcai, tau tsa Leejtub ua tus uas zoo kawg nkaus mus ibtxhis li.

Currently Selected:

Henplais 7: MWW2022

Highlight

Copy