Henplais 2

Txoj Kev Cawmdim Uas Loj Heev

1Yogli ntawd, peb yuavtsum hajyam mobsiab khaws txojlus tseeb uas peb tau hnov los lawm cia kom zoo, kom peb thiajli yuav tsis txav deb zujzus ntawm txojlus ntawd mus. 2Txojlus uas cov timtswv ceebtsheej tau qhia los lawm puavleej yog lus tseeb, txhua tus uas hla txojlus ntawd thiab tsis ua rawsli txojlus ntawd qhia, twb tau txais txoj kev rautxim uas tsimnyog lawm. 3Yogli ntawd, yog peb ciali lasmees txog txoj kev dim txim uas tseemceeb ntawd, peb yuav ua licas khiav dim ntawm txoj kev rautxim tau? Tus Tswv yog tus uas xub qhia txoj kev dim txim no ntag, thiab cov uas hnov Nws qhia, lawv yeej ua timkhawv qhia rau peb hais tias yeej muaj tseeb li ntawd tiag. 4Tiblub sijhawm ntawd, Vajtswv tseem ua ntau yam txujci loj thiab tseemceeb ntxiv rau lawv; thiab tseem pub Vaj Ntsujplig tus Dawbhuv rau sawvdaws rawsli Vajtswv pomzoo pub.

Tus Uas Coj Peb Mus Rau Txoj Kev Cawmdim

5Vajtswv tsis tau tsa cov timtswv ceebtsheej ua cov kav lub ntiajteb tshiab uas yuav los tomntej no, uas yog lub ntiajteb uas peb tabtom hais txog. 6Tiamsis nyob rau hauv Vajtswv tej Lus muaj ib qho tau ua timkhawv hais tias:

“Au Vajtswv, noobneej yog dabtsi, es Koj ho xam txog lawv?

Lawv yog noobneej xwb, uacas Koj ho yuav tsomkwm lawv? #Nnkauj 8:4-6

7Koj tsim lawv yau dua cov timtswv ceebtsheej ib nyuag ntu;

Koj pub lawv muaj tshwjchim thiab tau ntsejmuag#2:7: Ntau phau ntawv qub uas xuas tes sau, ntxiv hais tias Koj cia lawv ua tus kav txhua yam uas Koj tsim (saib Nnkauj 8:6).

8thiab muab txhua yam tso rau nws ua tus kav.”

Qhov uas hais tias Vajtswv muab txhua yam tso rau hauv lawv qab xibtaws ntawd, yog Vajtswv qhia tseeb tias, tsis muaj ib yam dabtsi uas tsis yog lawv ua tus kav. Txawm li ntawd los, nimno peb tseem tsis tau pom tias txhua yam yog lawv ua tus kav. 9Tiamsis peb pom tias Vajtswv cia rau Yexus yau dua cov timtswv ceebtsheej ib nyuag ntu, kom los ntawm Vajtswv txoj hmoovhlub, Nws thiaj tau tuag theej txhua tus. Nimno peb pom Nws muaj tus tshwjchim uas ci ntsa-iab thiab tau koobmeej los ua Nws li mom kub, vim Nws raug txoj kev tuag. 10Qhov uas Vajtswv yuav coj Nws cov menyuam ntau leej los rau hauv tus tshwjchim uas ci ntsa-iab ntawd, yeej yog kawg li lawm, vim Nws yog tus uas tsim txhua yam thiab txhua yam ntawd yog tsim los rau Nws; Vajtswv yog tus uas ua rau Yexus zoo kawg nkaus los ntawm qhov uas Yexus raug kev txomnyem, vim Yexus yog tus uas coj lawv los rau ntawm txoj kev cawmdim.

11Yexus yog tus ntxuav neeg lub txim kom lawv dawbhuv, Nws thiab cov neeg uas tau raug ntxuav lawm puavleej yog tibleeg txiv yug xwb. Vimli ntawd, Yexus thiaj tsis txajmuag hu hais tias lawv yog Nws cov kwvtij. 12Nws hais rau Vajtswv hais tias,

“Kuv yuav qhia Koj lub npe rau Kuv cov kwvtij mloog;

Kuv yuav hunkauj qhuas Koj tabmeeg cov ntseeg.” #Nnkauj 22:22

13Nws hais ntxiv hais tias, “Kuv yuav tsosiab rau Vajtswv.” Thiab Nws hais ntxiv hais tias, “Kuv nyob ntawm no, nrog rau cov menyuam uas Vajtswv tau muab pub rau Kuv.” #Yaxaya 8:17; Yaxaya 8:18

14Vim cov menyuam puavleej yog neeg muaj roj muaj ntshav, yogli ntawd, Yexus thiaj los yug ua neeg muaj roj muaj ntshav ib yam li lawv. Nws ua li ntawd, kom los ntawm Nws txoj kev tuag Nws thiaj rhuav tau dab ntxwgnyoog, tus uas muaj hwjchim kovyeej txoj kev tuag kom puastsuaj mus, 15thiab tso tau cov neeg uas ibtxwm ntshai kev ploj kev tuag kom lawv dim. 16Peb twb pom meej-meej lawm hais tias, tsis yog Nws los pab cov timtswv ceebtsheej, tiamsis yog los pab Anplahas cajces. 17Vimli no, Yexus thiaj yuavtsum los ua neeg zoo ib yam li Nws cov kwvtij, kom Nws thiaj yuav tau ua lawv tus Tuam Povthawj Hlob uas ncajncees thiab muaj lub siab tabncuab nyob rau hauv txoj kev ua Vajtswv tes haujlwm; kom Vajtswv thiaj yuav zam tau neeg lub txim. 18Nimno Yexus muaj cuabkav pab tau cov neeg uas raug kev simsiab, vim Nws twb raug kev simsiab thiab kev tsimtxom los lawm.

Currently Selected:

Henplais 2: MWW2022

Highlight

Copy