Henplais 12

Vajtswv Yog Peb Txiv

1Peb twb muaj cov timkhawv coob-coob nyob puagncig peb lawm, yogli ntawd, cia peb muab txhua yam uas thaiv peb kev thiab tej kev txhaum uas tuav peb ruaj-ruaj cia ntawd povtseg, thiab cia peb rausiab ntso rau txoj kev sibtw khiav uas tau kom tseg nyob tom peb hauvntej lawm. 2Cia peb tsa qhovmuag ntsiantsoov Yexus tus uas yog peb lub hauvpaus kev ntseeg thiab ua kom peb kev ntseeg tiav. Nws tiv kev txomnyem saum tus ntoo khaublig thiab raug kev txajmuag los tsis uacas vim Nws paub tias muaj txoj kev zoosiab nyob tos Nws lawm; nimno Nws twb mus nyob rau ntawm Vajtswv lub zwmtxwv sab xis lawm.

3Nej yuavtsum ncontsoov tej uas Nws tau tiv cov neeg txhaum txoj kev ua limhiam rau Nws, kom nej thiaj yuav tsis qaugzog thiab poobsiab. 4Nyob rau hauv nej txoj kev tawmtsam kev txhaum, nej tseem tsis tau tawmtsam mus txog qib uas ua rau ntshav nrog. 5Nej tsis ncoqab tej lus uas Vajtswv ntuas nej cov uas yog Nws li menyuam lawm lov? Nws hais tias:

“Kuv tus metub, thaum tus Tswv qhuabntuas koj, koj yuavtsum ua tibzoo mloog,

thiab tsis txhob qaugzog thaum Nws cem koj. #Yauj 5:17; Paj 3:11-12

6Rauqhov tus Tswv qhuabntuas txhua tus uas Nws hlub,

thiab nplawm txhua tus uas Nws coj los ua Nws tub.”

7Nej yuavtsum ua siabntev tiv vim tej ntawd yog kev qhuabntuas; Vajtswv qhuabntuas nej ib yam li nej yog Nws cov menyuam. Puas muaj ib tug menyuam twg uas nws txiv tsis tau qhuabntuas nws? 8Yog nej tsis raug qhuabntuas ib yam li nws qhuabntuas tagnrho nws cov menyuam, ces txhais tau hais tias nej yog menyuam tsaub xwb, nej tsis yog nws li menyuam tiag. 9Peb sawvdaws puavleej muaj txiv qhuabntuas peb, thiaj ua rau peb hwm lawv. Tshaj qhov ntawd, tsimnyog peb hajyam yuav mloog peb Txiv ntawm sab ntsujplig tej lus, peb thiaj yuav ciajsia!

10Peb txiv tsuas qhuabntuas peb ib nyuag ntu rawsli lawv pom tias tsimnyog xwb, tiamsis Vajtswv qhuabntuas peb kom muaj nujnqis rau peb, kom peb thiajli yuav muaj feem koom tau nrog Nws txoj kev dawbhuv. 11Lub sijhawm uas peb raug nplawm, yeej tsis yog kev zoosiab tsuas yog kev tusiab xwb; tiamsis tomqab ntawd tej lus qhuabntuas yuav coj txoj kev ncajncees thiab kev nyabxeeb los rau cov uas raug qhuabntuas.

Tej Lus Qhia Thiab Ceebtoom

12Yogli ntawd, nej ciali tsa nej ob txhais tes uas tsaug lawm thiab nej ob lub hauvcaug uas tsis muajzog lawm kom rov muajzog tuaj! #Yaxaya 35:3 13Nej yuavtsum taug tej kev ncaj xwb, kom txhais kotaw uas cegtawv lawm thiaj yuav tsis qis tiamsis yuav zoo. #Paj 4:26

14Nej yuavtsum ua tibzoo nrog txhua tus nyob sib haumxeeb, thiab nej yuavtsum xyaum ua nej lub neej kom dawbhuv, rauqhov tus uas tsis muaj kev dawbhuv, tus ntawd yeej yuav tsis pom tus Tswv. 15Nej yuavtsum ceevfaj tsis txhob pub ib tug twg plam Vajtswv txoj hmoovhlub. Tsis txhob pub ib tug twg dhau mus zooli tus cag nroj iab uas lojhlob tuaj ua rau ntau leej muaj teebmeem thiab ntsib kev puastsuaj. #2Kev 29:18 16Tsis txhob pub ib tug twg ua kev nkauj kev nraug lossis tsis paub hwm Vajtswv ib yam li Exaus uas nws muab nws lub npe tij pauv tib pluag mov noj xwb. #Chiv 25:29-34 17Nej twb paub lawm hais tias, tomqab ntawd Exaus xav tau nws txiv tej koobhmoov tiamsis tsis tau, rauqhov nws hloov tsis tau tej uas nws tau ua tas los lawm. Txawm yog nws quaj nrhiav#12:17: nrhiav lossis kom tau qhov koobhmoov. kuamuag si laim los yeej hloov tsis tau li lawm. #Chiv 27:30-40

18Nej tsis tau mus txog lub Roob Xinais uas nej kov tau, muaj hluavtaws cig liabploog, tsaus huab thiab tsausntuj nti, muaj cuadaj cuadub, #Khiav 19:16-22; 20:18-21; 2Kev 4:11-12; 5:22-27 19muaj lub suab rajxyu nrov ntsoogqees, thiab muaj ib lub suab haislus nrov ntxhe ntws. Thaum cov neeg hnov lub suab ntawd lawv thov kom tsis txhob hais ib lolus ntxiv rau lawv li lawm, 20rauqhov lawv tsis xav hnov tej lus uas hais tias, “Txawm yog ib tug nyuag tsiaj tuaj chwv lub roob no xwb los yuavtsum muab pobzeb ntaus tus tsiaj ntawd kom tuag.” #Khiav 19:12-13 21Tej uas tshwmsim ntawm lub chaw ntawd mas txaus ntshai kawg nkaus li, Mauxes thiaj hais tias, “Kuv ntshai ua ibce tsheehnyo!” #2Kev 9:19

22Tiamsis nej tuaj txog lub roob Xi-oos, tuaj txog Vajtswv tus uas muaj sia nyob lub nroog, uas yog lub nroog Yeluxalees nyob saum ntuj ceebtsheej uas muaj cov timtswv nyob txog txhiab-txhiab leej. 23Nej tuaj txog rau ntawm Vajtswv cov tub hlob txoj kev sibsau uas lomzem; lawv cov ntawd yog cov uas muaj npe sau cia rau saum ntuj ceebtsheej. Nej tuaj cuag Vajtswv tus uas txiavtxim rau txhua haivneeg, thiab tuaj txog ntawm cov neeg ncajncees tej ntsujplig uas Vajtswv tau ua rau lawv ua tau neeg zoo kawg nkaus lawm. 24Nej tuaj cuag Yexus tus uas npaj txoj kevcai tshiab, thiab tuaj cuag Nws cov ntshav uas tau ntws los ywg sawvdaws; cov ntshav ntawd yog hais txog kev hlub uas zoo dua Anpees cov ntshav. #Chiv 4:10

25Yogli ntawd, nej yuavtsum ceevfaj nyobtsam nej ciali tsis mloog tus uas qhia nej. Cov neeg uas tsis kam mloog tus uas qhia txojlus tseeb hauv ntiajteb no, cov ntawd yeej tsis muaj ib tug dim li. Yogli ntawd, yog peb tsis mloog tus uas hais saum ntuj tuaj tej lus, peb hajyam yuav raug txim hnyav dua ntawd thiab! #Khiav 20:22 26Thaum ntawd Vajtswv lub suab ua rau lub ntiajteb uazog koog, tiamsis nimno Vajtswv coglus tseg hais tias, “Kuv tseem yuav ua kom lub ntiajteb no uazog koog ib zaug ntxiv, tsis yog lub ntiajteb xwb, tiamsis lub ntuj los ib yam nkaus thiab.” #Hakai 2:6 27Lolus “ib zaug ntxiv” qhia hais tias tej uas Vajtswv tsim yuav uazog koog thiab yuav raug muab tshem mus, kom tej uas tsis ua zog thiaj yuav nyob khovkho.

28Yogli ntawd, peb ciali ua Vajtswv tsaug, rauqhov peb tau lub tebchaws uas tsis txawj uazog koog. Peb yuavtsum ua Nws tsaug thiab pehawm Nws rawsli Nws lub siab nyiam, uas yog los ntawm txoj kev hwm thiab paub ntshai Nws; 29rauqhov peb tus Vajtswv yog cov nplaimtaws uas kub tau txhua yam yaj tag huv tibsi. #2Kev 4:24

Currently Selected:

Henplais 12: MWW2022

Highlight

Copy