Chivkeeb 26

Ixaj Nyob Hauv Tebchaws Nkelas

1Rov muaj dua kev tshaib nqhis nyob hauv lub tebchaws ntawd, ib yam li tiam uas thaum Anplahas tseem ua neej nyob. Ixaj thiajli mus cuag Anpimelej, uas yog cov Filixatees tus vajntxwv hauv lub nroog Nkelas. 2Tus TSWV tau los tshwm rau Ixaj pom thiab hais tias, “Koj tsis txhob mus rau tebchaws Iziv; nyob twjywm ntawm no, uas yog thaj chaw Kuv qhia rau koj nyob. 3Nyob ntawm no xwb, Kuv yuav nrognraim koj nyob thiab foom koobhmoov rau koj. Kuv yuav muab tagnrho ib cheebtsam ntawm no rau koj thiab koj cajces. Kuv yuav ncontsoov tej lus uas kuv cogtseg rau koj txiv Anplahas lawm. 4Kuv yuav pub kom koj muaj cajces coob npaum li tej hnubqub saum nruabntug, thiab kuv yuav muab tagnrho ib cheebtsam ntawm no pub rau lawv. Txhua haivneeg uas nyob hauv qabntuj no yuav tau txais koobhmoov los ntawm koj cajces. 5Kuv yuav foom koobhmoov rau koj, rauqhov Anplahas mloog Kuv lus, thiab coj rawsli Kuv tej kevcai thiab tej lus xaaj txhua lo.”

6Yogli ntawd, Ixaj thiaj nyob twjywm hauv lub nroog Nkelas. 7Thaum cov txivneej uas nyob hauv lub nroog ntawd nug txog nws tus pojniam, nws teb lawv hais tias Lenpekas yog nws tus muam xwb no. Nws tsis kam qhia hais tias Lenpekas yog nws tus pojniam, rauqhov nws ntshai nyobtsam cov txivneej uas nyob hauv lub nroog ntawd muab nws tua povtseg thiab yuav Lenpekas, vim Lenpekas zoonkauj heev. 8Thaum Ixaj nyob hauv lub nroog ntawd tau ntev loo, vajntxwv Anpimelej nyob hauv tsev xauj ntawm qhovrais pom Ixaj thiab Lenpekas nkawd tseem tabtom sibpuag. 9Anpimelej thiaj tso neeg mus nug Ixaj hais tias, “Lenpekas twb yog koj tus pojniam ntag los sav! Vim licas koj ho hais tias nws yog koj tus muam?”

Ixaj teb vajntxwv hais tias, “Yog kuv qhia tias nws yog kuv tus pojniam, ntshai tsam muaj neeg lam muab kuv tua povtseg thiab yuav Lenpekas.”

10Anpimelej hais tias, “Koj ua dabtsi li no rau peb? Yog muaj ib tug txivneej lam ciali mus nrog koj tus pojniam pw, ces koj yog tus uas coj txoj kev txhaum ntawd los rau peb.” 11Anpimelej thiaj ceebtoom rau sawvdaws hais tias: “Yog leejtwg lam ua limhiam rau tus txivneej no lossis nws tus pojniam, tus ntawd yuav raug muab tua kom tuag.”

12Ixaj cog qoobloo rau huv lub tebchaws ntawd, thiab xyoo ntawd nws sau tau qoob ntau tshaj cov noob uas nws cog lawm 100 npaug, rauqhov tus TSWV foom koobhmoov rau nws. 13Ixaj vammeej zujzus thiab dhau mus ua ib tug tibneeg npluanuj heev. 14Vim Ixaj muaj tej tsiajtxhu uas yog yaj thiab nyuj coob, thiab muaj tubtxib coob kawg li, thiaj ua rau cov neeg Filixatees khib heev. 15Lawv thiaj muab tej qhovdej uas nws txiv Anplahas cov tubtxib khawb thaum Anplahas tseem ua neej nyob txhub tag huv tibsi.

16Ces Anpimelej thiaj hais rau Ixaj tias, “Koj ciali khiav tawm hauv peb lub tebchaws no mus, rauqhov koj muaj hwjchim tshaj peb lawm.” 17Yogli ntawd, Ixaj thiaj khiav tawm hauv lub nroog ntawd thiab mus tsa tsevntaub nyob rau hauv lub Hav Nkelas; nws nyob qhov ntawd tau ib ntus. 18Nws thiajli rovqab khawb cov qhovdej uas thaum ub nws txiv Anplahas khawb cia lawm dua ib zaug ntxiv; rauqhov tomqab uas Anplahas tuag lawm, cov Filixatees tau tuaj muab tej qhovdej ntawd txhub tag lawm. Ixaj tau tis npe rau cov qhovdej no rawsli tej qub npe uas thaum ub nws txiv twb tis rau lawm.

19Ixaj cov tubtxib mus khawb ib lub qhovdej hauv lub hav ntawd thiab txawm muaj dej txhawv tawm los. 20Ces cov tibneeg yug yaj uas nyob hauv lub nroog Nkelas txawm tuaj nrog Ixaj cov tibneeg yug yaj sibcav hais tias, “Cov dej no yog peb li.” Yogli ntawd, Ixaj thiaj muab lub qhovdej ntawd tis npe hu ua Exej, uas txhais hais tias “Sibcav.”

21Ixaj cov tubtxib rov khawb dua ib lub qhovdej, ces txawm rov muaj kev sibcav txog lub qhovdej ntawd dua thiab, yogli ntawd, nws thiaj muab lub qhovdej ntawd tis npe hu ua Xibnas, uas txhais hais tias “Yeebncuab.” 22Nws thiaj khiav tawm ntawm thaj chaw ntawd mus khawb dua ib lub qhovdej. Nyob qhov ntawd tsis muaj kev sibcav sibceg lawm, yogli ntawd, nws thiaj muab lub qhovdej ntawd tis npe hu ua Lehaunpauj, uas txhais hais tias “Muaj Av Dav.” Nws hais tias, “Nimno tus TSWV pub peb muaj av dav nyob hauv lub tebchaws no, mas peb yuav muaj kev vammeej nyob rau ntawm no lau.”

23Ixaj thiaj tawm ntawm qhov chaw ntawd thiab mus rau tom Npe-awsenpas. 24Hmo ntawd tus TSWV thiaj los tshwm rau nws pom thiab hais tias, “Kuv yog koj txiv Anplahas tus Vajtswv. Koj tsis txhob ntshai, rauqhov Kuv yeej nrognraim koj. Kuv yuav foom koobhmoov rau koj thiab pub rau koj muaj cajces coob rawsli Kuv tau coglus rau Kuv tus tubtxib Anplahas lawm.” 25Ixaj thiaj teeb tau ib lub thaj rau ntawd thiab pehawm tus TSWV. Ces nws txawm tsa nws lub tsevntaub nyob rau ntawd, thiab nws cov tubtxib rov khawb dua ib lub qhovdej.

Ixaj Thiab Anpimelej Sib Coglus

26Anpimelej coj Ahuxas uas yog nws tus tuavxam thiab Fikaus uas yog nws tus thawj tubrog nrog nws tuaj hauv Nkelas tuaj cuag Ixaj. #Chiv 21:22 27Ixaj thiaj nug hais tias, “Vim licas nimno nej thiaj tuaj cuag kuv? Yav nram ntej nej twb ntxub kuv kawg thiab twb ntiab kuv tawm hauv nej lub tebchaws lawm ne?”

28Lawv teb tias, “Nimno peb paub tias tus TSWV nrognraim koj, thiab peb xav tias tsimnyog peb yuavtsum tau los sibhais kom haum. Peb xav kom koj coglus rau peb 29hais tias koj yuav tsis ua phem rau peb, ib yam li peb tsis tau ua phem rau koj. Peb yeej ua zoo rau koj thiab tso koj mus kajsiab lug. Nimno peb pom meej-meej tias tus TSWV foom koobhmoov rau koj lawm.”

30Yogli ntawd, Ixaj thiaj npaj tau ib rooj mov rau lawv sawvdaws noj thiab haus uake. 31Tagkis sawvntxov lawv thiaj nyias lees nyias lus thiab ib leeg coglus rau ib leeg. Ces Ixaj thiaj xa lawv sawvkev mus tsev kajsiab lug lawm.

32Hnub ntawd Ixaj cov tubtxib thiaj los piav qhia rau nws txog lub qhovdej uas lawv tau mus khawb ntawd hais tias, “Peb twb mus nrhiav tau dej lawm!” 33Ixaj thiaj tis npe rau lub qhovdej ntawd hu ua Sinpas, uas txhais hais tias “Coglus.” Vimli ntawd thiaj ua rau lub nroog Npe-awsenpas#26:33: Npe-awsenpas: Lub npe no lus Henplais txhais tias “Lub Qhovdej Coglus” lossis “Lub Qhovdej Xya” (saib 21:31.) tau lub npe no.

Exaus Ob Tug Pojniam Uas Yog Tibneeg Txawv Tebchaws

34Thaum uas Exaus hnubnyoog muaj plaubcaug xyoo, nws yuav tau cov neeg Hitis ob tug ntxhais los ua pojniam, Yudis uas yog Npe-elis tus ntxhais, thiab Npasemas uas yog Eloos tus ntxhais. 35Ob tug nyab no ua rau Ixaj thiab Lenpekas ua neej lwjsiab kawg li.

Currently Selected:

Chivkeeb 26: MWW2022

Highlight

Copy