Chivkeeb 22

Vajtswv Hais Kom Anplahas Muab Ixaj Fij

1Tau ib ntus tomqab no Vajtswv txawm sim Anplahas siab. Vajtswv hu Anplahas hais tias, “Anplahas!” Anplahas teb tias, “Kuv nyob ntawm no.”

2Vajtswv hais tias, “Ciali coj koj tibleeg tub Ixaj uas koj hlub tshajplaws, mus rau pem cheebtsam Mauliyas. Koj muab nws tua hlawv ua khoom fij pub rau Kuv saum lub roob uas Kuv yuav qhia rau koj.” #2Klt 3:1

3Hnub tomqab Anplahas thiaj sawvntxov los txiav taws yuav coj mus hlawv khoom fij; muab taws thiab tej khoom nog rau nws tus neesluav thauj, coj Ixaj thiab coj nws ob tug tubtxib nrog nws mus. Lawv txawm sawvkev mus rau pem qhov chaw uas Vajtswv tau qhia rau Anplahas lawm. 4Thaum lawv mus tau peb hnub ke lawm, Anplahas txawm tsa muag saib pom thaj chaw uas Vajtswv qhia rau nws tseem nyob deb. 5Nws txawm hais rau ob tug tubtxib hais tias, “Neb nrog tus neesluav nyob ntawm no. Kuv tus tub wb yuav mus pehawm Vajtswv nyob rau tid, thaum wb pehawm tag, wb mam rovqab los.”

6Anplahas muab cov taws uas yuav hlawv khoom fij rau Ixaj kwv, ces nws nqa ib rab riam thiab hluavtaws. Thaum nkawd tabtom taug kev mus, 7Ixaj txawm hais tias, “Txiv!”

Anplahas teb tias, “Koj hais dabtsi os metub?”

Ixaj nug hais tias, “Kuv pom koj twb muaj hluavtaws thiab muaj taws, tiamsis tus menyuam yaj uas yuav coj tuaj tua hlawv fij ntawd nyob qhovtwg?”

8Anplahas teb tias, “Metub 'e, Vajtswv yeej yuav npaj ib tug menyuam yaj los rau wb tua hlawv ua khoom fij xwb.” Ces nkawd ob txivtub txawm uake taug kev mus lawm.

9Thaum nkawd mus txog ntawm qhov chaw uas Vajtswv qhia rau Anplahas lawm, Anplahas thiaj teeb tau ib lub thaj thiab muab taws tib txeem npo rau saum lub thaj ntawd. Nws thiaj muab nws tus tub pav thiab coj mus tso rau saum lub thaj, uas yog saum cov taws. #Yakau 2:21 10Ces nws txawm nthos nkaus rab riam los yuav muab Ixaj tua. 11Tiamsis tus TSWV tus timtswv txawm hu tawg ntho saum ntuj tuaj rau nws hais tias, “Anplahas, Anplahas!”

Nws teb tias, “Kuv nyob ntawm no.”

12Tus timtswv hais tias, “Tsis txhob tua tus metub ko lossis tsis txhob ua ib yam dabtsi rau nws hlo li; nimno Kuv paub lawm hais tias koj hwm thiab mloog Vajtswv lus heev, rauqhov koj tsis khuvxim koj tibleeg tub, koj zoosiab hlo coj tuaj pub rau Kuv.”

13Anplahas tsa qhovmuag xam ib puagncig, nws txawm pom ib tug laug yaj kub daig ntawm ib tauv khaub. Nws thiaj mus muab los tua hlawv fij rau Vajtswv hloov nws tus tub chaw. #Henpl 11:17-19 14Anplahas thiaj tis npe rau qhov chaw ntawm hu ua, “Tus TSWV yog tus uas Npaj tseg.”#22:14: Npaj; lossis Pom. Txawm yog niajhnub nimno los neeg tseem hu hais tias, “Saum tus TSWV lub roob, Nws yog tus npaj tseg.”#22:14: npaj; lossis pom.

15Tus TSWV tus timtswv rov hu saum ntuj tuaj rau Anplahas ua zaum thib ob hais tias, 16“Kuv coglus los ntawm Kuv lub npe hais tias Kuv yuav foom koobhmoov nplua-mias rau koj, tus TSWV yog tus hais li no. Rauqhov koj tau ua rawsli Kuv hais thiab koj tsis khuvxim koj tibleeg tub uas koj muab fij rau Kuv.#Henpl 6:13-14 17Kuv thiaj coglus tseg rau koj hais tias Kuv yuav pub koj muaj cajces coob npaum li tej hnubqub saum nruabntug, lossis npaum li tej xuabzeb nram ntug hiavtxwv. Koj tej cajces yuav kovyeej lawv cov yeebncuab. #Henpl 11:12 18Vim koj mloog Kuv lus, txhua tsav tibneeg uas nyob hauv qabntuj no yuav tau txais koobhmoov los ntawm koj cajces.” #Teshl 3:25

19Anplahas thiaj rovqab los rau nram nws ob tug tubtxib, thiab lawv rov los rau nram Npe-awsenpas uas yog Anplahas qhov chaw nyob.

Nahaus Cov Xeebntxwv

20Tsis ntev los tomqab no muaj tibneeg mus qhia rau Anplahas hais tias Milekas yug tau yim leej menyuam rau nws tus kwv Nahaus. 21Uxes yog tus tub hlob, Npuxes yog tus kwv, Kemuyees uas yog Alas txiv, 22Khexes, Haxaus, Piledas, Yilafes, thiab Npethuyees. 23Npethuyees yog Lenpekas txiv. Milekas yug tau yim tus tub no rau Nahaus uas yog Anplahas tus kwv. 24Nahaus tus niamyau Le-umas, yug tau Tenpas, Nkahas, Tahas thiab Ma-akas.

Currently Selected:

Chivkeeb 22: MWW2022

Highlight

Copy