Chivkeeb 21

Yug Ixaj

1Tus TSWV tau foom koobhmoov rau Xalas rawsli tej lus uas Nws tau cogtseg lawm, 2Xalas thiaj xeebtub thiab yug tau ib tug tub rau Anplahas thaum uas Anplahas twb laus lawm. Tus tub no yug rawsli lub caij uas Vajtswv teem tseg cia lawm. #Henpl 11:11 3Anplahas thiaj tis tus tub ntawd lub npe hu ua Ixaj, 4ces thaum Ixaj hnubnyoog muaj yim hnub, Anplahas thiaj muab nws ua kevcai txiav tawv, rawsli Vajtswv tau xaaj tseg lawm. #Chiv 17:12; Teshl 7:8 5Anplahas hnubnyoog muaj 100 xyoo rau thaum yug Ixaj.

6Xalas thiaj hais tias, “Vajtswv tau muab txoj kev zoosiab thiab lub suab luag#21:6: suab luag: Ixaj lub npe, lus Henplais txhais hais tias “nws luag” (saib 17:17-19). rau kuv. Txhua tus uas hnov zaj no lawv yuav nrog kuv luag.” 7Nws hais ntxiv tias, “Leejtwg thiaj yuav hais tau rau Anplahas tias Xalas tseem yuav muaj taus mis rau menyuam noj? Txawm li ntawd los kuv tseem yug tau ib tug tub rau Anplahas thaum nws twb laus lawm thiab.”

8Tus tub ntawd lojhlob zoo, thiab hnub uas nws tso taus mis lawm, Anplahas thiaj ua ib rooj nojhaus loj heev.

Ntiab Hankas Thiab Yisamayees Khiav

9Muaj ib hnub Yisamayees, uas yog Hankas uas yog tibneeg Iziv tus tub uas nws yug rau Anplahas, tabtom uasi nrog#21:9: uasi nrog lossis ua saib tsis taus. Xalas tus tub Ixaj.#21:9: Tej cov ntawv qub-qub thaum ub sau hais tias nrog Xalas tus tub Ixaj; phau lus Henplais tsis muaj cov lus no. 10Xalas pom li ntawd, nws thiaj mus hais rau Anplahas tias, “Ciali muab tus ntxhais qhev no thiab nws tus tub ntiab khiav mus. Tsis tsimnyog tus pojniam no tus tub muaj feem tau txais koj tej qubtxeeg qubteg li, tsuas yog kuv tus tub Ixaj xwb!” #Kalat 4:29-30

11Zaj no ua rau Anplahas ntxhovsiab heev, rauqhov Yisamayees los kuj yog nws tus tub ib yam nkaus thiab. 12Tiamsis Vajtswv hais rau Anplahas tias, “Tsis txhob ntxhovsiab txog tus tub thiab txog koj tus ntxhais qhev Hankas. Ciali ua rawsli Xalas hais rau koj, rauqhov koj yuav muaj cajces coob los ntawm Ixaj rawsli Kuv tau coglus tseg rau koj lawm. #Loos 9:7; Henpl 11:18 13Kuv tseem yuav pub rau tus ntxhais qhev ntawd tus tub kom nws muaj tub muaj ki coob heev kom lawv dhau mus ua tau ib haivneeg thiab; Nws los kuj yog koj tus tub ib yam nkaus.”

14Hnub tomqab thaum sawvntxov Anplahas ntim zaub-mov thiab ib hnabtawv dej, thiab muab rau saum Hankas xubpwg. Anplahas tsaws tus metub rau saum Hankas nrobqaum thiab xa nkawd tawm mus. Hankas thiaj ua ib siab mus thiab ncig mus ncig los tom tiaj suabpuam Npe-awsenpas. 15Thaum dej tag lawm, nws thiaj muab tus menyuam tso pw rau hauv ib koog ntoo 16thiab nws mus zaum nrug deb kwvlam li 100 mev. Thaum nws mus zaum ntawd, nws#21:16: nws; ib phau ntawv qub-qub thaum ub txhais hais tias tus menyuam. txawm tsa suab hlo quaj thiab xav tias, “Kuv tsis xav pom kuv metub tusiav li.”

17Vajtswv hnov tus menyuam ntawd lub suab quaj, Vajtswv tus timtswv thiaj hais saum ntuj tuaj rau Hankas tias, “Hankas, koj ntxhovsiab ua dabtsi? Tsis txhob ntshai. Vajtswv tub hnov tus metub lub suab quaj lawm. 18Ciali sawv mus muab nws tsaws los puag thiab ua tibzoo ntxias nws. Kuv yuav ua kom nws muaj cajces huamvam coob mus ua tau ib haivneeg.”

19Ces Vajtswv txawm qhib Hankas lub qhovmuag, ua rau nws pom ib lub qhovdej. Nws thiaj mus cug dej ntim puvnkaus rau hauv lub hnabtawv thiab muab mentsis rau tus tub haus. 20Vajtswv yeej nrognraim tus tub ntawd mus txog thaum nws lojhlob; nws nyob hauv lub tiaj suabpuam Palas, thiab dhau mus ua ib tug uas muaj txujtes rau kev tua nqaij heev. 21Nws niam mus yuav tau cov tibneeg Iziv ib tug ntxhais los rau nws ua pojniam.

Anplahas Thiab Anpimelej Sib Coglus

22Thaum lub sijhawm ntawd Vajntxwv Anpimelej nrog Fikaus, tus thawj uas saib nws cov tubrog tuaj, thiab hais rau Anplahas tias, “Txhua yam uas koj ua, Vajtswv yeej nrognraim koj. #Chiv 26:26 23Yogli ntawd, kuv thov coglus tseg ntawm no tabmeeg Vajtswv hais tias koj yuav tsis dag kuv, tsis dag kuv tej menyuam, lossis kuv tej cajces hlo li. Kuv twb yeej ua zoo rau koj lawm, yogli ntawd, koj yuav tau coglus rau kuv hais tias koj yuav ua zoo rau kuv thiab rau lub tebchaws uas koj nyob no.”

24Anplahas teb tias, “Kuv thov coglus li ntawd.”

25Anplahas yws rau Anpimelej txog lub qhovdej uas Anpimelej cov tubtxib tuaj txeeb mus lawm. 26Anpimelej thiaj hais tias, “Kuv tsis paub tias leejtwg yog tus ua li ntawd. Koj yeej tsis tau qhia zaj no rau kuv li. No yog thawjzaug uas kuv hnov txog xwb.” 27Anplahas txawm muab tus puav yaj thiab nyuj pub rau Anpimelej, ces nkawd thiaj sib coglus. 28Anplahas muab xya tus menyuam yaj uas yog cov maum, cais tawm hauv nws pab tsiaj, 29ces Anpimelej txawm nug hais tias, “Vim licas koj thiaj ua li ntawd?”

30Anplahas teb tias, “Koj ciali txais yuav xya tus menyuam yaj no mus. Qhov kuv ua li no, yog ua kom koj nrog lees paub tias kuv yog tus khawb lub qhovdej no.” 31Yogli ntawd, thiaj hu qhov chaw ntawd ua Npe-awsenpas,#21:31: Npe-awsenpas: Lub npe no lus Henplais txhais hais tias “Lub Qhovdej Coglus,” lossis “Lub Qhovdej Xya” (saib 26:33). rauqhov nkawd tau sib coglus rau ntawm thaj chaw ntawd.

32Tomqab uas nkawd coglus nyob ntawm Npe-awsenpas tag lawm, Anpimelej thiab Fikaus thiaj rovqab mus rau tebchaws Filixatees lawm. 33Ces Anplahas txawm cog ib tsob ntoo tamalis rau hauv Npe-awsenpas thiab pehawm tus TSWV uas yog Vajtswv tus muaj sia nyob mus ibtxhis. 34Anplahas nyob hauv tebchaws Filixatees tau ntev heev.

Currently Selected:

Chivkeeb 21: MWW2022

Highlight

Copy