Kalatias 4

1Lub ntsiablus uas kuv hais yog li no: rawsli ibtxwm leejtxiv yeej muab nws tej cuabtxhiaj cuabtam rau nws tus tub. Txawm yog tus tub yeej yuav tau txhua yam ntawd huv tibsi los thaum nws tseem yau, nws yeej txawv tsis ntau li ib tug qhev. 2Thaum nws tseem yau yeej muaj neeg saib nws thiab ceev nws tej qubtxeeg qubteg mus txog hnub uas nws txiv teem cia lawm. 3Ib yam nkaus li ntawd, thaum peb tseem zooli tus menyuam yaus uas tsis tau paub Vajtswv, peb ua dab tauj dab qhev. 4Tiamsis thaum txog lub sijhawm uas Vajtswv teem cia lawm, Vajtswv tau txib Nws tus Tub los yug rau hauv ib tug pojniam; Nws kuj coj rawsli cov Yudais txoj Kevcai ib yam li sawvdaws, 5Nws thiaj cawm tau cov uas txoj Kevcai muab khi cia lawm kom dim, kom peb thiaj tau los ua Vajtswv cov menyuam.

6Vim peb yog Vajtswv cov menyuam, Vajtswv thiaj txib Vajtswv tus Tub tus Ntsujplig los nyob hauv peb lub siab, tus Ntsujplig ntawd yog tus uas qhia peb hu Vajtswv hais tias, “Anpas,#4:6: Lolus Anpas yog los Alamej uas txhais hais tias “Txiv”. Txiv.” 7Yogli ntawd nej tsis yog ib tug qhev lawm, tiamsis nej yog Vajtswv li ib tug menyuam. Vim nej yog Nws cov menyuam lawm, nej yuav tau txais txhua yam uas Vajtswv npaj cia rau Nws cov menyuam. #Loos 8:15-17

Paulus Txoj Kev Txhawjxeeb Txog Cov Kalatias

8Yav tas los nej tsis paub Vajtswv, nej thiaj mus ua qhev rau tej uas twb tsis yog vajtswv kiag li. 9Tiamsis nimno nej twb paub Vajtswv lawm, lossis, qhov tseeb tiag yog nimno Vajtswv twb paub nej lawm, ua licas nej thiaj xav rovqab mus coj dab? Tej dab ntawd yeej tsis muaj hwjchim thiab tsis muaj qabhau dabtsi li, es nej tseem xav rovqab mus ua cov dab ntawd li qhev dua thiab no lov? 10Nej tseem caiv hnub, caiv hli, caiv caijnyoog, thiab caiv xyoo. 11Kuv txhawj txog nej heev! Puas yog tej haujlwm uas kuv tuaj ua rau nej ciali tsis muaj qabhau dabtsi li lawm?

12Cov kwvtij, kuv thov kom nej ua li kuv ua, rauqhov kuv twb ua li nej ua lawm thiab. Nej tsis tau ua dabtsi txhaum rau kuv li. 13Nej twb paub lawm hais tias thawjzaug uas kuv tuaj xyuas nej, kuv mob kuv thiajli tau qhia Txoj Moo Zoo rau nej. 14Tiamsis txawm yog kuv tus mob ua rau nej tau kev nyuajsiab los nej tsis ntxub kuv, nej tseem saib taus kuv. Nej tseem tostxais kuv zoo ib yam li kuv yog Vajtswv ib tug timtswv lossis ib yam li kuv yog Yexus Khetos ntag. 15Thaum ntawd nej zoosiab rau kuv kawg li! Nimno nej tsis ncoqab lawm lov? Kuv yeej muaj peevxwm hais tau hais tias thaum ntawd yog nej muaj cuabkav dawj tau nej ob lub qhovmuag rau kuv los nej yeej yuav dawj kom tau. 16Puas yog vim kuv qhia qhov tseeb rau nej, es nimno nej thiajli suav hais tias kuv yog nej tus yeebncuab lawm?

17Cov neeg ntawd ua txhua yam txhua tsav kom nej muaj siab npuab lawv, tiamsis lawv muaj ib lub homphiaj uas tsis zoo. Qhov uas lawv xav tau ces yog lawv xav muab nej rho tawm ntawm kuv mus, kom nej lub siab thiajli npuab lawv ib yam li lawv npuab nej. 18Qhov uas muaj neeg muab siab npuab nej los ntawm pluajsiab uas zoo, qhov ntawd zoo heev, tsis hais thaum kuv nrog nej nyob lossis tsis nrog. 19Cov menyuam uas kuv hlub 'e, kuv mobsiab rau nej ib yam li tus pojniam uas yuav yug menyuam. Ntshe kuv yuav mobsiab li no mus txog thaum nej muaj tus yamntxwv zooli Yexus Khetos. 20Kheevlam yog tamsim no kuv nrog nej nyob, mas kuv yuav ua tibzoo hais nej, rauqhov kuv txhawj nej heev.

Hankas Thiab Xalas Nkawd Tus Yamntxwv

21Cia kuv nug nej cov uas xav nyob hauvqab kev tswjhwm ntawm txoj Kevcai seb, nej puas paub tias txoj Kevcai ntawd qhia licas rau nej? 22Txoj Kevcai ntawd qhia hais tias Anplahas muaj ob tug tub, ib tug yog tus pojniam uas ua qhev yug, ib tug yog tus pojniam uas tsis ua qhev yug. #Chiv 16:5; Chiv 21:2 23Tus tub uas yog tus pojniam qhev yug, nws yug rawsli neeg ibtxwm yug, tiamsis tus tub uas yog tus pojniam uas tsis ua qhev yug, nws yug rawsli Vajtswv lolus cogtseg.

24Ob tug pojniam uas kuv piav rau nej no piv ib yam li yog Vajtswv ob nqe lus cogtseg. Tus pojniam uas yug tau cov menyuam qhev ntawd yog Hankas, nws piv ib yam li Vajtswv nqe lus cogtseg uas Vajtswv muab saum Roob Xinais. 25Hankas piv ib yam li lub Roob Xinais uas nyob hauv tebchaws Alanpias uas#4:25: Hankas … uas; tej phau ntawv qub uas xuas tes sau, muaj Xinais yog ib lub roob uas nyob hauv tebchaws Alanpias. yog piv txog lub nroog Yeluxalees nimno, rauqhov lub nroog thiab cov pejxeem puavleej poob mus ua luag qhev. 26Tiamsis lub nroog Yeluxalees uas nyob saum ntuj, nws tsis ua qhev, nws yog peb niam. 27Rauqhov Vajtswv Txojlus hais tias:

“Tus pojniam uas xeeb tsis taus menyuam koj ciali zoosiab!

Tus pojniam uas tsis tau mob dua plab yug menyuam, koj ciali seev suab qw nrov-nrov hais tias koj zoosiab kawg li!

Rauqhov tus pojniam uas tus txiv muab tsotseg lawm, nws yuav muaj menyuam coob dua

tus pojniam uas muaj tus txiv nrog nyob.” #Yaxaya 54:1

28Zaumno, cov kwvtij, nej yog Vajtswv cov menyuam rawsli Vajtswv lolus cogtseg, ib yam li Ixaj ntag. 29Lub sijhawm ntawd, tus tub uas yug rawsli neeg ibtxwm yug, tau tsimtxom tus tub uas Vajtswv tus Ntsujplig yug; txawm yog niajhnub nimno los tseem muaj li ntawd thiab. #Chiv 21:9 30Tiamsis Vajtswv Txojlus hais licas? Vajtswv Txojlus hais tias, “Ciali ntiab tus poj qhev thiab nws tus tub khiav mus; rauqhov tus poj qhev ntawd tus tub yuav tsis muaj feem los nrog tus pojniam uas tsis ua qhev ntawd tus tub txais leejtxiv tej cuabtxhiaj cuabtam kiag li.” #Chiv 21:10 31Yogli ntawd cov kwvtij, peb tsis yog tus poj qhev cov menyuam, tiamsis peb yog tus pojniam uas tsis ua qhev cov menyuam.

Currently Selected:

Kalatias 4: MWW2022

Highlight

Copy