Kalatias 3

Kevcai Lossis Kev Ntseeg

1Cov neeg Kalatias uas ruam! Leejtwg txawmsiv ua khawvkoob mooj tau nej lawm? Nej lub qhovmuag twb pom kiag meej-meej txog qhov uas Yexus Khetos tau raug ntsia rau saum ntoo khaublig lawm. 2Nej sim qhia ib qhov rau kuv seb: qhov uas nej tau txais Vajtswv tus Ntsujplig ntawd yog vim nej coj rawsli txoj Kevcai los yog vim nej mloog thiab ntseeg Txoj Moo Zoo? 3Uacas nej yuav ruam ualuaj li! Nej pib los ntawm Vajtswv tus Ntsujplig, tiamsis nimno nej ho yuav xaus los ntawm sab nqaijtawv no lov? 4Txhua yam uas nej tau raug los lawm, txawm tsis muaj qabhau rau nej li lov? Yeej muaj los sav! 5Qhov uas Vajtswv pub Vaj Ntsujplig rau nej thiab ua tej txujci tseemceeb rau nej pom, yog vim nej coj rawsli txoj kevcai los yog vim nej mloog thiab ntseeg Txoj Moo Zoo?

6Kom nej xav txog Anplahas lub neej; Vajtswv Txojlus hais tias, “Nws ntseeg Vajtswv, twb yog vim nws txoj kev ntseeg ntawd Vajtswv thiaj suav hais tias nws yog tus uas ncajncees.” #Chiv 15:6; Loos 4:3 7Yogli ntawd, kom nej totaub hais tias tsuas yog cov neeg uas ntseeg Vajtswv xwb thiaj yog Anplahas cajces tiag. #Loos 4:16 8Vajtswv Txojlus twb xub hais tseg lawm hais tias, los ntawm txoj kev ntseeg, Vajtswv yuav coj Lwm Haivneeg los nrog Vajtswv sib raugzoo, thiab Vajtswv twb xub qhia Txoj Moo Zoo rau Anplahas uantej hais tias, “Los ntawm koj, Vajtswv yuav foom koobhmoov rau txhua haivneeg.” #Chiv 12:3 9Vim Anplahas ntseeg Vajtswv, Vajtswv thiaj foom koobhmoov rau nws; yogli ntawd, txhua tus uas ntseeg Vajtswv yuav tau koobhmoov ib yam li Anplahas thiab.

10Cov neeg uas vamkhom qhov kev coj rawsli txoj Kevcai, yog cov uas raug foom phem, rauqhov Vajtswv Txojlus hais tias, “Yog leejtwg tsis ua rawsli txhua nqe uas sau cia rau hauv phau Kevcai, ces tus ntawd twb raug Vajtswv foom phem lawm.” #2Kev 27:26 (LXX) 11Yogli ntawd, peb paub tseeb hais tias tus uas coj rawsli txoj Kevcai, tsis yog tus uas Vajtswv suav hais tias ncajncees, rauqhov Vajtswv Txojlus hais tias “Tsuas yog tus uas ncajncees rau Vajtswv los ntawm txoj kev ntseeg xwb thiaj tau txojsia.”#3:11: ncajncees rau Vajtswv los ntawm txoj kev ntseeg xwb thiaj tau txojsia; lossis ncajncees rau Vajtswv thiaj tau txojsia vim nws txoj kev ntseeg. #Henpl 2:4 12Tiamsis txoj Kevcai tsis yog hais txog kev ntseeg. Vimli ntawd, Vajtswv Txojlus thiaj hais tias, “Yog leejtwg coj rawsli tej Kevcai ntawd hais txhua nqe, tus ntawd yuav tau txojsia.” #Levi 18:5

13Qhov uas Khetos los ris peb tej kev raug foom phem, twb yog Nws los txhiv kom peb dim ntawm txoj Kevcai uas tau raug foom phem lawm; rauqhov Vajtswv Txojlus hais tias, “Tus uas raug dai rau saum ntoo, tus ntawd twb raug foom phem lawm.” #2Kev 21:23 14Khetos ua li ntawd kom qhov koobhmoov uas Vajtswv tau coglus rau Anplahas lawm thiaj yuav ntws ntawm Yexus Khetos mus rau Lwm Haivneeg, thiab vim peb txoj kev ntseeg, peb thiaj yuav tau txais Vaj Ntsujplig rawsli Vajtswv tau coglus tseg lawm.

Txoj Kevcai Thiab Cov Lus Cogtseg

15Cov kwvtij sawvdaws, cia kuv muab ib qhov yamntxwv uas peb niajhnub ua los rau peb saib. Yog tias muaj ob leeg tau hais haum ua ib yam dabtsi thiab tau suamnpe cia lawm, yeej tsis muaj leejtwg yuav rhuav tau lossis yuav ntxiv tau ib yam dabtsi rau. 16Zaumno, Vajtswv twb coglus rau Anplahas thiab nws tus xeebntxwv lawm. Vajtswv Txojlus tsis tau siv lolus uas hais tias, “cov xeebntxwv,” uas yog hais txog coob leej, tiamsis Vajtswv Txojlus siv lolus uas hais tias, “xeebntxwv,” uas hais txog tibleeg, uas yog Khetos xwb. 17Lub ntsiablus uas kuv hais yog li no: Vajtswv tau coglus tseg rau Anplahas lawm, mas Vajtswv yeej yuav ua rawsli Nws lolus cogtseg ntawd. Vajtswv twb coglus tseg tau 430 xyoo lawm, mamli muaj txoj kevcai. Yogli ntawd, txoj Kevcai yeej yuav rhuav tsis tau thiab hloov tsis tau Vajtswv lolus cogtseg. #Khiav 12:40 18Yog qhov koobhmoov uas Vajtswv yuav muab rau peb ntawd tseem yog ua rawsli txoj Kevcai xwb, ces kuj tsis yog muab rawsli lolus cogtseg. Tiamsis Anplahas tau txais Vajtswv txoj koobhmoov yog rawsli qhov uas Vajtswv tau coglus tseg lawm. #Loos 4:14

19Yogli ntawd, tseem yuav muaj txoj Kevcai ua dabtsi thiab? Qhov uas muaj txoj Kevcai ntawd los ntxiv, twb yog xav qhia kom neeg paub tias kev txhaum yog dabtsi, thiab txoj Kevcai ntawd tsuas nyob mus txog thaum Anplahas tus xeebntxwv uas Vajtswv tau coglus tseg lawd los txog xwb. Txoj Kevcai ntawd yog cov timtswv ceebtsheej muab rau ib tug uas yog tus cevlus rau sawvdaws. 20Tiamsis tsis tag yuav muaj tus cevlus, yog tias tes haujlwm ntawd tsuas muaj tibleeg ua xwb; tus ntawd yog Vajtswv.#3:20: tus ntawd yog Vajtswv; lossis Vajtswv tibleeg ua xwb.

Lub Homphiaj Ntawm Txoj Kevcai

21Qhov no puas txhais tau hais tias txoj Kevcai ntawd tawmtsam Vajtswv tej lus cogtseg? Yeej tsis yog li ntawd kiag li! Yog muaj ib txoj kevcai uas ua rau neeg muaj txojsia tau, ces txhua tus uas ua rawsli txoj kevcai ntawd yeej yuav muaj kev ncajncees rau ntawm Vajtswv xwb. 22Tiamsis Vajtswv Txojlus hais tias lub ntiajteb no nyob hauvqab hwjchim ntawm txoj kev txhaum; kom txhua tus uas ntseeg thiaj yuav tau txoj koobhmoov uas Vajtswv tau coglus tseg hais tias Vajtswv yuav muab pub rau cov uas ntseeg Yexus Khetos.

23Uantej uas txoj kev ntseeg tseem tsis tau los txog peb, txoj Kevcai yeej muab peb khi zooli tej neeg raug txim los txog rau thaum uas txoj kev ntseeg no tau tshwmsim los. 24Yogli ntawd, txoj Kevcai no thiaj kav peb los txog lub sijhawm uas Khetos los, kom peb thiaj ua tau neeg ncajncees rau Vajtswv vim yog txoj kev ntseeg. 25Nimno txoj kev ntseeg twb los txog peb lawm, yogli ntawd txoj Kevcai thiajli tsis kav peb ntxiv lawm.

26Nej txhua tus yog Vajtswv cov menyuam, vim nej ntseeg Yexus Khetos. 27Nej twb ua kevcai rausdej rau hauv kev koomxeeb nrog Khetos lawm, yog yuav muab hais ces, nej twb muab Khetos lub neej coj los hnav zooli cev khaubncaws lawm. 28Yogli ntawd, yeej tsis txawv txav dabtsi li, txawm yog cov Yudais lossis Lwm Haivneeg, cov uas ua qhev lossis cov uas nyob ywjpheej, pojniam lossis txivneej, nej sawvdaws puavleej yog ib tug uas koomxeeb nrog Yexus Khetos. 29Yog nej nyob rau hauv Khetos, ces nej yog Anplahas cajces, thiab nej yuav tau txais tej uas Vajtswv tau coglus tseg lawm hais tias nws yuav muab pub rau nej.

Currently Selected:

Kalatias 3: MWW2022

Highlight

Copy