Kalatias 2

Paulus Thiab Lwmtus Timthawj

1Kaum-plaub xyoos tomqab ntawd, kuv nrog Npananpas rovqab mus rau hauv lub nroog Yeluxalees. Kuv kuj coj Titus nrog kuv mus thiab. #Teshl 11:30; 15:2 2Kuv mus vim Vajtswv tau los qhia rau kuv hais tias kuv yuavtsum tau mus. Kuv mus sablaj nrog cov thawjcoj ntsiagto rau ib qho, kuv thiaj piav Txoj Moo Zoo uas kuv tau mus qhia Lwm Haivneeg lawm rau lawv mloog. Kuv ua li no, rauqhov kuv tsis xav kom tes haujlwm uas kuv ua, tsis hais yav tas los lossis niajhnub nimno ciali tag dawb tag do mus.

3Titus tus uas nrog kuv mus uake ntawd, nws txawm yog neeg Kilis los tsis muaj leejtwg yuav muab nws yuam ua kevcai txiav, 4txawm li ntawd los tseem muaj qeetus neeg xav kom nws ua kevcai txiav thiab. Lawv cov no uatxuj tuaj hais tias lawv yog cov ntseeg, kom lawv nkag tau los rau hauv peb pab, tiamsis yog lawv xav tuaj soj saib seb vim licas peb cov ntseeg Yexus Khetos ho muaj kev ywjpheej. Lawv xav ntxias kom peb ua lawv qhev, 5tiamsis peb yeej tsis kam ua rawsli lawv qhia ib nyuag qhov li, kom qhov tseeb ntawm Txoj Moo Zoo thiaj yuav nrog tau nej nyob mus li.

6Tiamsis cov neeg uas lawv hais tias lawv yog cov thawjcoj, txawm yog lawv yuav nyob lub meejmom twg los lawm los xij, tej ntawd tsis muaj qabhau dabtsi rau kuv; rauqhov Vajtswv yeej tsis xaiv leejtwg ntsejmuag, cov thawjcoj ntawd yeej ntxiv tsis tau ib yam dabtsi rau kuv li. #2Kev 10:17 7Yeej tsis yog li ntawd, lawv pom tias Vajtswv tau muab tes haujlwm uas mus qhuabqhia txog Txoj Moo Zoo rau Lwm Haivneeg uas tsis ua kevcai txiav ntawd rau kuv ua, ib yam li Vajtswv tau muab tes haujlwm uas mus qhuabqhia Txoj Moo Zoo rau cov neeg Yudais uas ua kevcai txiav rau Petus ua. 8Vajtswv tsa kuv ua ib tug timthawj rau Lwm Haivneeg licas, Vajtswv tau tsa Petus ua ib tug timthawj rau cov neeg Yudais ib yam li ntawd thiab.

9Yakaunpaus, Petus, thiab Yauhas lawv cov uas yog thawjcoj nres sawvdaws, puavleej paub tias Vajtswv twb muab tes haujlwm tshwjxeeb ntawd rau kuv ua lawm; lawv thiaj tuav kuv thiab Npananpas wb sab tes xis, ua lub cim qhia hais tias peb txhua tus yuav sib koomtes ua haujlwm. Peb thiaj pomzoo hais tias cia Npananpas wb mus qhia Lwm Haivneeg, thiab cia lawv qhia cov neeg Yudais. 10Qhov uas lawv thov ces yog kom wb ncontsoov pab cov neeg pluag uas nyob rau hauv lawv pab, qhov ntawd twb yog qhov uas kuv yeej ibtxwm ua los lawm.

Paulus Cem Petus Hauv Ati-aukias

11Thaum Petus tuaj rau hauv Ati-aukias, kuv tau tabmeeg nrog nws sibcav, rauqhov kuv yeej pom meej tias nws tau ua tsis yog lawm. 12Uantej thaum Yakaunpaus tseem tsis tau txib neeg tuaj, Petus yeej nrog Lwm Haivneeg uas ntseeg Vajtswv noj mov uake. Tiamsis thaum lawv cov ntawd tuaj txog lawm, Petus txawm ciali tsis nrog Lwm Haivneeg noj mov uake lawm, rauqhov nws ntshai cov uas qhia hais tias Lwm Haivneeg yuavtsum tau ua kevcai txiav. 13Cov Yudais uas ntseeg Vajtswv muaj qeeleej ciali pib nrog Petus coj tus yamntxwv uas ntaus siab yau li ntawd; txawm yog Npananpas los kuj ciali yuamkev coj tus yamntxwv zooli lawv thiab.

14Thaum kuv pom tias lawv tsis ua rawsli qhov tseeb uas Txoj Moo Zoo tau qhia, kuv thiajli hais rau Petus tabmeeg lawv sawvdaws hais tias, “Koj yog neeg Yudais, tiamsis koj mus ua li Lwm Haivneeg ua, koj tsis ua li koj yog neeg Yudais lawm. Ua licas koj tseem yuam kom Lwm Haivneeg ua li cov neeg Yudais ua thiab?”

Cov Yudais Thiab Lwm Haivneeg Yog Dim Los Ntawm Txoj Kev Ntseeg

15Peb yeej yog neeg Yudais, peb tsis yog “Lwm Haivneeg uas muaj txim” li uas luag tej hu lawv. 16Tiamsis peb paub tias tus neeg uas Vajtswv suav hais tias ncajncees tsis yog tus uas coj rawsli Kevcai hais, tiamsis yog tus uas ntseeg Yexus Khetos. Txawm yog peb los kuj ib yam nkaus li ntawd, qhov uas Vajtswv suav hais tias peb yog neeg ncajncees twb yog vim peb ntseeg Khetos, tsis yog vim peb coj rawsli txoj kevcai. Rauqhov yeej tsis muaj leejtwg uas Vajtswv yuav suav hais tias nws ncajncees vim nws coj rawsli txoj kevcai. #Nnkauj 143:2; Loos 3:20; Loos 3:22

17Thaum peb ua kom peb yog neeg ncajncees rau hauv Khetos, peb mamli pom tias peb yog neeg txhaum ib yam nkaus li Lwm Haivneeg thiab; qhov no puas hais tau hais tias Khetos yog tus uas txhawb txoj kev txhaum? Tsis yog li ntawd! 18Yog kuv tseem rovqab mus kho yam uas kuv twb muab rhuav lawm, ces kuv rov qhia rau kuv hais tias kuv yog tus uas ua txhaum kevcai. 19Rauqhov nyob rau hauv txoj Kevcai ntawd ces kuv twb tuag lawm, kom kuv thiaj ua tau kuv lub neej pub rau Vajtswv. Kuv twb raug muab ntsia nrog Khetos rau saum tus ntoo khaublig lawm, 20yogli ntawd, tus uas tseem ciajsia no tsis yog kuv, tiamsis yog Khetos tus uas nyob rau hauv kuv. Qhov uas nimno kuv ua neej nyob yog vim kuv ntseeg Vajtswv tus Tub, tus uas tau hlub kuv thiab muab Nws txojsia los txhiv kuv. 21Kuv yeej tsis hnovqab Vajtswv txoj hmoovhlub. Yog neeg tseem ncajncees tau los ntawm qhov uas ua rawsli txoj Kevcai thiab, ces txhais tau hais tias qhov uas Khetos tuag ntawd yeej tsis muajnqis dabtsi li.

Currently Selected:

Kalatias 2: MWW2022

Highlight

Copy