Efexaus 6

Cov Menyuam Thiab Niamtxiv

1Nej cov uas yog menyuam, vim nej yog cov ntseeg Yexus Khetos lawm, yeej yog nej lub luag haujlwm uas#6:1: Tej phau ntawv qub uas xuas tes sau, tsis muaj vim nej yog cov ntseeg Yexus Khetos lawm, yeej yog nej lub luag haujlwm uas. yuavtsum mloog nej niam nej txiv lus, vim qhov ntawd yog ib yam uas tsimnyog ua. #Kaulx 3:20 2“Koj yuavtsum hwm koj niam koj txiv” yog thawj nqe kevcai uas muaj ib lolus cogtseg ntxiv rau hais tias, 3“kom koj thiaj yuav vammeej thiab muaj txojsia nyob ntev hauv lub ntiajteb no.” #Khiav 20:12; 2Kev 5:16

4Nej cov uas yog leejtxiv, nej tsis txhob ua tej yam uas yuav ua rau nej tej menyuam npautaws. Tiamsis nej ciali tu lawv kom lojhlob los ntawm kev qhuabntuas thiab cobqhia rawsli tus Tswv Txojlus. #Kaulx 3:21

Cov Tubqhe Thiab Cov Tswvqhev

5Nej cov uas yog tubqhe, nej yuavtsum mloog nej cov tswv uas yog neeg sab nqaijtawv no tej lus; yuavtsum hwm thiab paub ntshai lawv. Nej yuavtsum ua nej tes haujlwm los ntawm lub siab ncajncees, zoo ib yam li nej ua rau Yexus Khetos. 6Nej tsis txhob ua haujlwm thaum cov tswv ntsiantsoov nej vim nej xav kom lawv qhuas nej xwb, tiamsis nej yuavtsum rausiab ntso ua rawsli Vajtswv lub siab nyiam, kom phim qhov uas nej yog Yexus Khetos cov tubqhe. 7Yeejmeem ua li nej yog ib co tubqhe uas zoosiab hlo ua nej tes haujlwm, ib yam li nej ua rau Vajtswv, tsis yog ua rau neeg. 8Ncontsoov tias Vajtswv yeej yuav muab nqizog rau peb txhua tus uas ua haujlwm zoo, tsis hais cov uas ua qhev lossis cov uas tsis ua qhev. #Kaulx 3:22-25

9Nej cov uas yog tswvqhev, nej yuavtsum ua zoo ib yam li ntawd rau nej cov tubqhe, nej tsis txhob pheej hem lawv. Ncontsoov tias nej thiab nej cov tubqhe tsuas muaj tibtug Tswv uas nyob saum ntuj ceebtsheej xwb, nws yeej tsis xaiv leejtwg ntsejmuag kiag li. #Kaulx 4:1; 2Kev 10:17; Kaulx 3:25

Vajtswv Tej Cuabyeej

10Thaum kawg no, nej yuavtsum khovkho rau hauv tus Tswv thiab rau hauv Nws lub hwjchim uas loj kawg nkaus. 11Ciali muab tej cuabyeej uas Vajtswv muab rau nej lawm los hnav, kom nej thiaj yuav muaj peevxwm sawv tawmtsam tau dab ntxwgnyoog tej tswvyim phem. 12Rauqhov tsis yog peb tawmtsam neeg tiamsis yog peb tawmtsam tej dab uas nyob saum nruabntug, tawmtsam tej uas tswjhwm, tawmtsam tej uas muaj hwjchim, thiab tawmtsam lub zog uas kav qhov tsausntuj nti nyob rau tiam no. 13Yogli ntawd, ciali muab Vajtswv tej cuabyeej los hnav kiag tamsim no! Yog nej ua li ntawd, hnub uas tej kev phem los txog, nej thiaj yuav sawv taus khovkho; thiab thaum tej kev tawmtsam ntawd dhau lawm, nej thiaj tseem nyob ruaj nrees.

14Yogli ntawd, nej ciali sawv khovkho npaj kom txhij tos. Ciali muab qhov tseeb los ua siv sia ntawm nej lub duav, muab txoj kev ncajncees los ua daim hlau thaiv hauvsiab. #Yaxaya 11:5; Yaxaya 59:17 15Thiab muab lub siab uas kublug mus qhia Txoj Moo Zoo uas hais txog txoj kev kajsiab los ua khau rau. #Yaxaya 52:7 16Nej yuavtsum tuav rawv txoj kev ntseeg ua daim hlau thaiv cev txhua lub sijhawm; yog nej ua li ntawd, nej yuav tua tau dab ntxwgnyoog tej xibxub hluavtaws uas nws tua tuaj kom tuag mus. 17Ciali muab txoj kev dim txim los ua kausmom hlau ntoo, thiab muab Vajtswv Txojlus uas Vaj Ntsujplig muab rau nej, los ua rab ntaj. #Yaxaya 59:17 18Nej yuavtsum ua txhua yam no los ntawm txoj kev thov Vajtswv, thov kom Vajtswv pab nej. Yuavtsum thov Vajtswv txhua lub sijhawm rawsli Vaj Ntsujplig coj nej. Yogli ntawd, nej yuavtsum npaj rawv tos thiab ua siabntev thov Vajtswv pab cov ntseeg sawvdaws. 19Thiab thov nej thov Vajtswv pab rau kuv, kom thaum kuv qhib ncauj qhia Vajtswv Txojlus, Vajtswv yuav ua tus cevlus rau kuv hais, kom kuv thiaj yuav muaj lub siab tawv qhia txog yam uas tau muab zais cia nyob rau hauv Txoj Moo Zoo lawm. 20Nimno kuv raug kaw rau hauv tsev lojcuj los twb yog vim kuv yog ib tug xeebcom uas qhia txog Txoj Moo Zoo ntawd ntag. Yogli ntawd, thov nej thov Vajtswv pab kom kuv muaj lub siab tawv qhia Txoj Moo Zoo kom tsimnyog.

Lus Xa Xov Thaum Xaus

21Tikhikus uas yog peb ib tug kwvtij uas peb hlub thiab yog ib tug tubtxib uas ncajncees ua tus Tswv tes haujlwm, nws yuav qhia txhua yam rau nej, kom nej thiaj paub tias kuv nyob licas thiab kuv niajhnub ua dabtsi. #Teshl 20:4; 2Tim 4:12 22Twb yog vimli ntawd ntag, kuv thiajli txib nws tuaj saib nej; tuaj qhia kom nej paub tias peb sawvdaws nyob licas, thiab kom nws tuaj txhawb nej lub zog. #Kaulx 4:7-8

23Thov Vajtswv uas yog peb Leejtxiv thiab tus Tswv Yexus Khetos pub kev kajsiab thiab kev hlub, nrog rau kev ntseeg rau txhua tus uas ntseeg Yexus Khetos. 24Thov Vajtswv txoj hmoovhlub nrognraim txhua tus uas muaj lub siab hlub peb tus Tswv Yexus Khetos mus ibtxhis.

Currently Selected:

Efexaus 6: MWW2022

Highlight

Copy