2 Kevcai 9
9
Cov Neeg Tawv Ncauj
1“Ibtsoom Yixalayees, nej ua tibzoo mloog! Hnubno nej tabtom yuav hla tus Dej Yauladees mus tua lub tebchaws uas muaj cov neeg loj thiab muajzog dua nej. Lawv tej nroog loj thiab muaj ntsayeej xov siab nto ntuj. 2Cov neeg Anaj ntawd siab thiab muajzog heev. Lawv loj tshaj lwm haivneeg huv tibsi, thiab nej twb hnov moo lawm hais tias, tsis muaj leejtwg tawmtsam yeej lawv li. 3Tiamsis nimno nej yuav pom tias, tus TSWV, uas yog nej tus Vajtswv, yuav mus ua nej ntej ib yam li cov nplaimtaws cig lamlug. Thaum nej mus nias tsam, tus TSWV yuav ua kom lawv swb kom nej thiaj yuav caum tau lawv khiav thiab ua kom lawv puastsuaj tag sai heev, rawsli tus TSWV tau coglus tseg rau nej lawm.
4“Thaum tus TSWV, uas yog nej tus Vajtswv ntiab lawv khiav tag lawm, nej tsis txhob xav tias, qhov uas tus TSWV coj nej los nyob hauv lub tebchaws no, vim nej yeej tsimnyog los nyob. Tsis yog li ntawd, tus TSWV ntiab cov neeg ntawd khiav, twb yog vim lawv ua kev phem kev qias. 5Tsis yog vim nej coj ncaj thiab ua zoo, tus TSWV thiaj coj nej los nyob hauv lawv lub tebchaws. Tus TSWV ntiab lawv khiav vim lawv ua kev phem kev qias. Thiab tus TSWV yeej ua rawsli Nws tau coglus tseg rau Anplahas, Ixaj, thiab Yakhauj, uas yog nej cov yawgkoob lawm. 6Nej yuavtsum paub tias qhov uas tus TSWV muab lub tebchaws uas tej av zoo no rau nej, tsis yog vim nej ncajncees, rauqhov nej yeej yog cov neeg uas tawv ncauj.
7“Nej yuavtsum ncontsoov tias thaum nej tseem nyob nram tiaj suabpuam, nej tau ua rau tus TSWV, uas yog nej tus Vajtswv, npautaws npaum licas. Suav txij hnub uas nej tawm hauv tebchaws Iziv los txog ntawm no, nej tseem pheej ntxeevsiab rau tus TSWV. 8Thaum nej tseem nyob ntawm Roob Xinais, los nej ua rau tus TSWV npautaws heev, npautaws txog qhov uas Nws xav ua kom nej puastsuaj. 9Kuv nce mus rau saum roob, mus nqa ob daim txiag zeb uas sau tus TSWV tej lus cogtseg rau nej. Kuv mus nyob saud tau plaubcaug hnub plaubcaug hmo tsis noj tsis haus ib yam dabtsi li. #Khiav 24:18 10Tus TSWV tau muab ob daim txiag zeb rau kuv, uas yog Nws xuas Nws txhais tes sau tej lus uas Nws hais hauv cov nplaimtaws tuaj rau nej, uas yog hnub uas nej sawvdaws tuaj uake rau ntawm lub roob. 11Thaum dhau plaubcaug hnub plaubcaug hmo lawm, tus TSWV thiaj muab ob daim txiag zeb uas Nws sau Nws tej lus cogtseg rau kuv.
12“Tomqab ntawd tus TSWV hais rau kuv tias, ‘Koj ciali nqis saum roob tamsim no mus, rauqhov cov neeg uas koj coj khiav tawm hauv tebchaws Iziv los, twb ntxeevsiab ua phem ua qias lawm. Lawv tso tej kevcai uas Kuv tau xaaj kom lawv ua tseg, thiab lawv nchuav tau ib tug mlom rau lawv lawm.’
13“Tus TSWV hais ntxiv rau kuv tias, ‘Kuv paub tias cov neeg no tawv ncauj npaum licas. 14Tsis txhob cheem Kuv. Kuv npajsiab lawm uas yuav ua kom lawv puastsuaj mus, kom tsis muaj leejtwg hnov lawv lub moo ntxiv li lawm. Tomqab ntawd Kuv yuav tsa koj ua ib haivneeg uas muaj hwjchim thiab coob dua lawv.’
15“Yogli ntawd, kuv thiaj nqa ob daim txiag zeb uas sau Vajtswv tej lus cogtseg nqis saum roob los. Thaum ntawd muaj nplaimtaws cig liabploog saum roob los. 16Kuv pom tias nej tau tso tus TSWV, uas yog nej tus Vajtswv, tej lus uas Nws tau xaaj tseg rau nej ntawd sai kawg li. Nej tau ua txhaum rau Nws los ntawm qhov uas nej muab kub nchuav ua ib tug mlom nyuj rau nej. 17Kuv thiaj muab ob daim txiag zeb ntawd ntsawm tawg tas tabmeeg nej. 18Kuv thiaj rov txhoscaug ntua khoov ua ntsejmuag ti nkaus av thiab thov tus TSWV tau plaubcaug hnub plaubcaug hmo, kuv yeej tsis noj tsis haus ib yam dabtsi li. Kuv ua li no, twb yog vim nej ua txhaum rau tus TSWV thiab ua rau Nws chim lawm.
19“Kuv ntshai tus TSWV txoj kev npautaws heev, rauqhov Nws npautaws txog qhov uas Nws muaj cuabkav ua kom nej puastsuaj tau, tiamsis tus TSWV tseem mloog kuv tej lus dua ib zaug thiab. #Henpl 12:21 20Tus TSWV npautaws rau Aloos txog qhov uas Nws twb yuavluag muab Aloos tua povtseg, thaum ntawd kuv thiaj thov kom Nws zamtxim rau Aloos. 21Kuv thiaj muab nej txoj kev txhaum, uas yog tus mlom nyuj uas nej nchuav, pov rau hauv cubtawg. Kuv muab tsoo thiab muab quj ua hmoov nphoo rau hauv tus dej uas ntws saum roob los.
22“Thaum nej tseem nyob nram Tanpelas, Maxas, thiab Kinpalaus Hata-avas, nej tau ua rau tus TSWV, uas yog nej tus Vajtswv, npautaws heev. #Teev 11:3; Khiav 17:7; Teev 11:34 23Thiab thaum uas tus TSWV txib nej tawm hauv Kades Npane-as mus txeeb lub tebchaws uas Nws yuav muab rau nej, nej ntxeevsiab rau Nws; nej tsis ciasiab rau Nws lossis tsis mloog Nws lus. #Teev 13:17; 2Kev 1:21; Teev 13:31; 2Kev 1:26; Henpl 3:6 24Txij thaum kuv paub nej los, nej yeej ntxeevsiab rau tus TSWV tsis tseg li.
25“Kuv khoov ti nkaus hauv av, thov tus TSWV tau plaubcaug hnub plaubcaug hmo, rauqhov tus TSWV tau hais tias Nws yuav ua kom nej puastsuaj tag. 26Kuv thiaj thov tus TSWV hais tias, ‘Tus TSWV uas kav ibpuas tsavyam, thov Koj tsis txhob ua rau Koj haivneeg puastsuaj. Lawv yog cov neeg uas Koj lub zog thiab lub hwjchim uas loj kawg nkaus tau cawm thiab coj tawm hauv tebchaws Iziv los. 27Thov Koj ncontsoov Anplahas, Ixaj, thiab Yakhauj uas yog Koj cov tubtxib, es tsis txhob xav txog cov neeg no tej kev tawv ncauj, kev phem, thiab kev txhaum. 28Nyobtsam cov Iziv yuav hais tias Koj tsis muaj peevxwm coj Koj haivneeg mus nyob hauv lub tebchaws uas Koj tau coglus tseg rau lawv lawm. Cov Iziv yuav hais tias Koj ntxub Koj haivneeg es Koj thiaj coj lawv los tua rau ntawm tiaj suabpuam. 29Lawv cov no yeej yog cov uas Koj tau xaiv tseg ua Koj haivneeg, thiab yog cov uas Koj tau coj lawv tawm hauv tebchaws Iziv los ntawm Koj lub zogloj zognchav.’
Currently Selected:
2 Kevcai 9: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
