2 Kevcai 7

Tus TSWV Haivneeg

(Khiav Dim 34:11-16)

1“Tus TSWV uas yog nej tus Vajtswv, yuav coj nej mus rau hauv lub tebchaws uas nej tabtom yuav mus txeeb ntawd, thiab Nws yuav ntiab ntau haivneeg kom khiav tawm mus. Thaum nej mus ntawd, Nws yuav ntiab xya haivneeg uas loj thiab muajzog tshaj nej khiav tawm, xwsli: cov Hitis, cov Nkawkasis, cov Amaules, cov Kana-as, cov Pelixes, cov Hivis, thiab cov Yenpus. #Teshl 13:19 2Thaum tus TSWV, uas yog nej tus Vajtswv, muab tej haivneeg ntawd cob rau nej tes thiab nej kovyeej lawv lawm, nej yuavtsum muab lawv tua kom tuag tas huv tibsi. Tsis txhob nrog lawv sib coglus lossis tabncuab lawv hlo li. 3Tsis txhob nrog lawv ua tshoob ua kos, tsis txhob cia nej tej tub tej ntxhais mus yuav lawv tej tub tej ntxhais hlo li, 4rauqhov lawv yuav ua rau nej tej tub tej ntxhais tso tus TSWV tseg thiab mus pe lwmtus nyuag vajtswv. Yog muaj li ntawd tiag, tus TSWV yuav npautaws rau nej thiab yuav ua kom nej puastsuaj tamsim ntawd. 5Yogli ntawd, nej ciali rhuav lawv tej thaj, tsoo lawv tej ncej zeb dab, ntov lawv tej ncej Aselas, thiab hlawv lawv tej mlom huv tibsi povtseg. #2Kev 12:3 6Nej yuavtsum ua li no, rauqhov nej yog tus TSWV, uas yog nej tus Vajtswv haivneeg uas dawbhuv. Nws tau xaiv nej tawm ntawm txhua haivneeg hauv ntiajteb no los ua Nws haivneeg uas tshwjxeeb heev. #Khiav 19:5; 2Kev 4:20; 14:2; 26:18; Titus 2:14; 1Pet 2:9

7“Tus TSWV hlub nej thiab xaiv nej, tsis yog vim nej yog ib haivneeg uas coob tshaj lwm haiv; qhov tseeb, nej yog ib haivneeg uas tsawg kawg nkaus hauv ntiajteb no. 8Tiamsis vim tus TSWV hlub nej thiab Nws xav ua rawsli tej lus uas Nws tau cogtseg rau nej cov yawgkoob lawm. Vimli ntawd Nws thiaj siv Nws lub hwjchim uas loj kawg nkaus tso nej dim kev ua qhev ntawm Falaus uas yog cov Iziv tus vajntxwv. 9Ncontsoov tias tus TSWV, uas yog nej tus Vajtswv, tibleeg xwb thiaj yog Vajtswv thiab yog tus ncajncees. Nws yuav ua rawsli tej lus uas Nws tau cogtseg thiab yuav nthuav Nws txoj kev hlub ruaj-khov rau cov uas mloog Nws lus thiab muab siab npuab Nws mus txog 1,000 tiam neeg, 10tiamsis Nws yuav rautxim sai-sai rau cov uas ntxub Nws. #Khiav 20:5-6; 34:6-7; Teev 14:18; 2Kev 5:9-10 11Yogli ntawd, nej yuavtsum ua rawsli tej uas kuv tau xaaj nej; ua rawsli tej kevcai txhua nqe uas hnubno kuv muab cob rau nej.

Qhov Koobhmoov Ntawm Txoj Kev Mlooglus

(2 Kevcai 28:1-14)

12“Yog nej mloog thiab ua tibzoo coj rawsli tej kevcai no, tus TSWV, uas yog nej tus Vajtswv, yuav ua rawsli tej lus uas Nws tau cogtseg rau nej thiab yuav nthuav Nws txoj kev hlub uas ruaj-khov rau nej rawsli Nws tau coglus tseg rau nej cov yawgkoob lawm. #2Kev 11:13-17 13Nws yuav hlub nej thiab foom koobhmoov rau nej kom nej huamvam muaj tubki coob. Nws yuav foom koobhmoov rau nej tej liaj-teb kom nej muaj qoobloo, muaj cawv txivhmab, thiab roj txivntoo ntau. Nws yuav foom koobhmoov rau nej kom nej muaj nyuj, muaj yaj, thiab muaj tshis coob. Nws yuav pub tagnrho tej koobhmoov no rau nej, thaum nej mus nyob hauv lub tebchaws uas Nws tau coglus tseg rau nej cov yawgkoob lawm hais tias Nws yuav muab rau nej. 14Tsis muaj ib haivneeg nyob hauv ntiajteb no uas yuav tau koobhmoov ntau npaum li nej. Nej txhua tus txivneej thiab pojniam, thiab tej tsiajtxhu, yuav tsis muaj ib tug tshob li. 15Tus TSWV yuav tsomkwm tsis pub kom nej muaj mob muaj nkeeg, thiab Nws yuav tsis tso tej mob phem uas nej tau pom hauv tebchaws Iziv los raug nej, tiamsis Nws yuav tso tej ntawd los raug nej tej yeebncuab txhua tus. 16Nej yuavtsum tua txhua haivneeg uas tus TSWV, uas yog nej tus Vajtswv, muab cob rau nej tes kom puastsuaj tag, tsis txhob tabncuab lawv hlo li. Tsis txhob pehawm lawv tej nyuag vajtswv, vim tej ntawd yog voj hlua cuab nej xwb.

17“Nej tsis txhob xav tias cov neeg no coob dua nej, mas nej yuav caum tsis tau lawv khiav tawm. 18Tsis txhob ntshai lawv! Yuavtsum ncontsoov tej xwm uas tus TSWV, uas yog nej tus Vajtswv, tau ua rau Falaus thiab cov Iziv los lawm. 19Ncontsoov tej subtawg subntsha uas nej tau pom kiag ntawm nej lub qhovmuag, tej txujci tseemceeb thiab tus TSWV, uas yog nej tus Vajtswv, lub hwjchim thiab tus zogloj zognchav uas tau tso nej dim. Tus TSWV tau ua rau cov Iziv kom puastsuaj licas, Nws yuav ua rau cov neeg uas nimno nej ntshai ntawd kom puastsuaj tag ib yam li ntawd. 20Tus TSWV yuav tso kev txhawj kev ntshai#7:20: tso kev txhawj kev ntshai; lossis tso nkawj plev, lossis subtawg subntsha. los rau tej haivneeg ntawd, txawm yog cov uas khiav mus nkaum los yuav raug puastsuaj tag huv tibsi. 21Yogli ntawd, nej tsis txhob ntshai tej neeg ntawd. Tus TSWV uas yog nej tus Vajtswv, yuav nrognraim nej; Nws yog Vajtswv tus uas muaj hwjchim, tsimnyog sawvdaws hwm thiab ntshai Nws.

22“Tus TSWV uas yog nej tus Vajtswv, yuav ntiab lawv tawm zujzus mus uantej uas nej mus nyob. Nej yuav tsis muaj cuabkav ua tibzaug muab lawv tua kom puastsuaj tag huv tibsi, vim tias, yog nej ua li ntawd, yuav muaj tsiaj qus huamvam coob heev los txov nej. 23Tus TSWV yuav muab nej tej yeebncuab cob rau nej, Nws yuav ua kom lawv muaj kev kubntxhov mus txog thaum uas lawv raug kev puastsuaj tag. 24Tus TSWV yuav muab lawv tej vajntxwv cob rau nej tes. Nej yuav muab lawv tua, thiab lawv tej koobmeej yuav ploj mus tag huv tibsi. Tsis muaj leejtwg uas yuav tiv taus nej; nej yuav muab lawv tua tuag tas huv tibsi.

25“Nej yuavtsum muab lawv tej mlom hlawv povtseg. Tsis txhob ntshaw tej nyiaj tej kub uas luag muab vuam rau tej mlom ntawd, thiab tsis txhob muab tej ntawd los ua nej tug. Yog nej muab los, nej yuav raug puastsuaj, rauqhov tus TSWV ntxub tej ntawd heev. 26Nej tsis txhob coj tej mlom ntawd ib tug los tso rau hauv nej tej tsev, nyobtsam nej yuav raug foom phem ib yam li tej mlom ntawd. Nej yuavtsum ntxub thiab tsis txhob saib tej mlom ntawd muajnqis kiag li, rauqhov tus TSWV twb foom phem rau tej mlom ntawd lawm.

Currently Selected:

2 Kevcai 7: MWW2022

Highlight

Copy