2 Kevcai 2
2
1“Peb txawm tig rovqab thiab mus rau tiaj suabpuam, taug kev mus rau Hiavtxwv Liab rawsli tus TSWV tau qhia rau kuv, ces peb txawm ncig mus ncig los ntev loo ntawm lub laj roob tebchaws Edoos. #Teev 21:4
2“Ces tus TSWV hais rau kuv tias 3peb ncig mus ncig los ntawm tej laj roob no ntev txaus lawm, peb yuavtsum mus rau sab qaumteb. 4Nws kom kuv qhia rau nej hais tias, ‘Nej tabtom yuav mus phua plhawv ntawm lub laj roob hauv tebchaws Edoos, yog nej cov txheebze uas yog Exaus cajces lub tebchaws. Lawv yuav ntshai nej heev, tiamsis nej yuavtsum ceevfaj zoo. #Chiv 36:8 5Nej tsis txhob mus uarog rau lawv, rauqhov Kuv yuav tsis muab lawv lub tebchaws ib thaj av luaj xibteg rau nej li. Kuv twb muab lub tebchaws Edoos ntawd rau Exaus cajces lawm. 6Yog nej xav tau mov noj thiab dej haus, nej yuavtsum xuas nyiaj yuav ntawm lawv.’
7“Nej yuavtsum ncontsoov tias tus TSWV, uas yog nej tus Vajtswv, tau foom koobhmoov rau txhua yam uas nej ua tag los lawm. Nws tau tsomkwm nej thaum nej taug kev los hla lub tiaj suabpuam uas dav heev. Nws nrognraim nej tau plaubcaug xyoo, thiab pub txhua yam rau nej kom muaj txaus.
8“Peb txawm ncaim peb cov txheebze uas yog Exaus cov xeebntxwv ntawm lub moos Elas thiab Exi-oonkenpaws, uas yuav mus rau tom Hiavtxwv Tuag. Peb tau taug kev mus rau pem qaumteb tiaj suabpuam Mau-am lawm. 9Tus TSWV hais rau kuv tias, ‘Nej tsis txhob mus thab cov neeg Mau-am, uas yog Lauj cov xeebntxwv, lossis mus uarog rau lawv. Kuv twb muab lub nroog As rau lawv lawm, mas Kuv yuav tsis muab lawv lub tebchaws ntawd ib qho rau nej li.’ ” #Chiv 19:37
( 10Muaj ib haivneeg uas loj thiab siab heev, hu ua Emis, lawv yog cov neeg txumtim hauv lub nroog As ntawd. Lawv loj thiab siab ib yam li cov neeg Anaj uas yog ib haivneeg loj thiab siab heev. 11Cov neeg Emis muaj dua ib lub npe hu ua Lefayees, ib yam li cov neeg Anaj; tiamsis cov neeg Mau-am hu cov neeg ntawd ua Emis. 12Thaum xubthawj cov neeg Haulis nyob hauv lub tebchaws Edoos, tiamsis Exaus cov xeebntxwv muab lawv raws tawm, rhuav tshem lawv haivneeg thiab los nyob hauv lawv lub tebchaws, ib yam li cov Yixalayees muab lawv cov yeebncuab caum tawm hauv lawv lub tebchaws uas tus TSWV muab rau lawv lawm.)
13“Peb thiaj hla tus Dej Zeles mus rau sab tim ub rawsli tus TSWV tau hais rau peb lawm. 14Suav txij thaum peb khiav hauv Kades Npane-as los txog thaum peb hla tus Dej Zeles yog pebcaug-yim xyoo. Cov txivneej uas ua taus tubrog tiam ntawd tuag tas raws nraim li tus TSWV tau hais tseg lawm. #Teev 14:28-35 15Tus TSWV tau tawmtsam lawv mus txog thaum uas lawv puastsuaj tag huv tibsi.
16“Tomqab cov txivneej ntawd tuag tas lawm, 17tus TSWV hais rau peb tias, 18‘Hnubno nej yuavtsum mus ntawm As mus hla kom dhau cheebtsam Mau-am. 19Thaum ntawd nej twb mus yuav txog cov neeg Amoos uas yog Lauj cajces lub tebchaws. Nej tsis txhob mus thab lossis mus uarog rau lawv, rauqhov Kuv yuav tsis muab lub tebchaws uas Kuv twb muab rau lawv lawm, ib qho rau nej li.’ ” #Chiv 19:38
( 20Cheebtsam no rawsli sawvdaws paub, mas yog cov neeg Lefayees lub tebchaws. Yog haivneeg uas txumtim hauv lub tebchaws ntawd lub npe; cov neeg Amoos hu lawv cov ntawd ua Xaxumis. 21Lawv yog cov neeg uas loj thiab siab ib yam li cov neeg Anaj. Lawv muajzog thiab coob heev. Tiamsis tus TSWV muab lawv rhuav puastsuaj tag, yogli ntawd, cov Amoos thiaj mus txeeb tau lawv lub tebchaws nyob. 22Tus TSWV ua ib yam li ntawd rau Exaus cajces uas yog neeg Edoos uas nyob saum lub laj roob hauv tebchaws Edoos. Nws tau rhuav cov neeg Haulis puastsuaj tag, yogli ntawd, cov Edoos thiaj mus txeeb tau lub tebchaws ntawd ua lawv tug thiab mus nyob rau hauv, los txog niajhnub no. 23Tiamsis cov neeg uas nyob hauv lub povtxwv Khetes, tau los nyob sab tebchaws uas raws ntug Hiavtxwv Meditelanees. Lawv los tua cov neeg Avis uas yog haivneeg txumtim hauv lub tebchaws ntawd, thiab txeeb tau tagnrho lub tebchaws ntawd mus ti nkaus rau lub nroog Nkaxas ua lawv tug.)
24“Thaum peb los dhau tebchaws Mau-am lawm, tus TSWV tau hais rau peb tias, ‘Nej ciali hla tus Dej Anoos mus rau sab tim ub. Kuv twb muab cov Amaules tus vajntxwv Xihoos uas kav lub nroog Hesenpoos, thiab nws lub tebchaws cob rau nej lawm. Nej ciali mus tua nws thiab chiv mus nyob hauv nws lub tebchaws. 25Txij hnubno mus, Kuv yuav ua kom tej neeg uas nyob txhua qhov ntshai nej. Txhua tus yuav ntshai tsheehnyo thaum lawv hnov txog nej lub npe.’
Cov Yixalayees Tua Yeej Vajntxwv Xihoos
(Teev Npe 21:21-30)
26“Kuv thiaj tso neeg ntawm tiaj suabpuam Kedemaus mus cuag Vajntxwv Xihoos uas nyob hauv Hesenpoos, thiab thov nws ntawm txoj kev thajyeeb hais tias: 27‘Thov pub peb hla nej lub tebchaws mus. Peb yuav taug kev ncajnraim xwb, yuav tsis mus rau sab xis lossis sab laug li. 28Peb yuav them nqi rau tej zaub-mov uas peb noj thiab tej dej uas peb haus. Peb tsuas thov koj tso kev rau peb hla koj lub tebchaws mus 29txog thaum peb hla dhau tus Dej Yauladees rau tim lub tebchaws uas tus TSWV uas yog peb tus Vajtswv muab rau peb ib yam li Exaus cov xeebntxwv uas nyob hauv tebchaws Edoos thiab cov Mau-am uas nyob hauv lub nroog As, tau tso kev rau peb hla lawv lub tebchaws los lawm.’
30“Tiamsis Vajntxwv Xihoos tsis kam peb hla hauv nws lub tebchaws mus li, rauqhov tus TSWV uas yog peb tus Vajtswv, tau ua rau nws muaj lub siab tawv heev, kom peb thiaj tua yeej nws thiab txeeb tau nws lub tebchaws, rawsli qhov uas Nws tau ua ntawd.
31“Tus TSWV hais rau kuv tias, ‘Nej saib maj, Kuv twb muab Vajntxwv Xihoos thiab nws lub tebchaws cob rau nej lawm; ciali mus txeeb nws lub tebchaws thiab mus nyob rau hauv.’ 32Xihoos thiab nws pab tubrog tuaj tua peb ze rau ntawm lub moos Yahaj, 33tiamsis tus TSWV uas yog peb tus Vajtswv twb muab nws cob rau peb lawm, ces peb thiaj tua tau nws, nws cov tub, thiab tagnrho nws cov tubrog. 34Thaum ntawd, peb txeeb tau tagnrho txhua lub moos thiab muab rhuav kom puastsuaj huv tibsi; muab txhua tus neeg tua kom tuag, tsis hais txivneej, pojniam, thiab menyuam. Peb yeej tsis tseg ib tug kom muaj sia nyob li. 35Peb coj lawv tej tsiajtxhu thiab huab lawv tej khoom hauv tej nroog mus kom tag. 36Tus TSWV uas yog peb tus Vajtswv cia peb mus txeeb tau tagnrho cov moos uas txij ntua ntawm Alu-aws, uas nyob npuab lub Hav Anoos, thiab lub moos uas nyob hauv plawv hav ntawd, mus txog ntawm Nkile-as. Tsis muaj ib lub moos twg uas muaj ntsayeej khov es peb yuav tsoo tsis tau li. 37Tiamsis peb kuj tsis mus ze rau ntawm cheebtsam uas cov Amoos nyob, lossis mus ze rau ntawm tus ntug Dej Yanpaus, lossis tej moos uas nyob rau saum laj roob, lossis txhua qhov chaw uas tus TSWV uas yog peb tus Vajtswv tsis pub peb mus.
Currently Selected:
2 Kevcai 2: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
