2 Kevcai 12

Tibqho Chaw Rau Kev Pehawm

1“Nov yog tej kevcai uas nej yuav tau coj mus tas nej simneej nyob hauv lub tebchaws uas tus TSWV uas yog nej cov yawgkoob tus Vajtswv, muab rau nej. Nej yuavtsum ua rawsli ntawd! 2Thaum nej mus nyob hauv lub tebchaws ntawd, nej yuavtsum muab txhua thaj chaw uas lwm haivneeg teev lawv tej nyuag vajtswv uas nyob saum tej roob siab, tej povroob, thiab hauv tej qab ntoos uas muaj nplooj ntxoov nyos, rhuav kom puastsuaj tag huv tibsi. 3Ciali rhuav lawv tej thaj thiab tsoo lawv tej ncej zeb tseemceeb kom tawg ntsoog ntxaws tag huv tibsi. Muab lawv tej ncej mlom Aselas hlawv thiab muab lawv tej mlom ntov povtseg kom tag kom thiajli tsis muaj leejtwg tuaj pehawm nyob rau cov chaw ntawd ntxiv li lawm. #2Kev 7:5

4“Nej tsis txhob pehawm tus TSWV uas yog nej tus Vajtswv, zoo yam li cov neeg ntawd pehawm lawv tej nyuag vajtswv. 5Tus TSWV yuav xaiv ib thaj chaw hauv nej txhua xeem los ua qhov chaw rau sawvdaws tuaj cuag Nws thiab pehawm Nws. 6Nej yuavtsum coj nej tej khoom fij tuaj hlawv rau ntawm qhov chaw ntawd, thiab lwmyam khoom fij, nej tej ib feem kaum thiab tej uas nej txaussiab muab, tej khoom tshwjxeeb uas nej coglus rau tus TSWV, tej khoom fij siabdawb, thiab nej thawjtug menyuam nyuj thiab menyuam yaj. 7Nyob rau qhov chaw ntawd, nej thiab nej tsev neeg yuav tau noj tau haus txaussiab rau tej qoobloo uas nej khwv tau los, tabmeeg tus TSWV uas yog nej tus Vajtswv, tus uas tau foom koobhmoov rau nej.

8“Thaum txog lub sijhawm ntawd, nej yuavtsum tsis txhob ua li nej tau ua yav tas los lawm. Txij thaum ub los txog niajhnub no, nej yeej tseem pehawm rawsli nej lub siab nyiam xwb, 9rauqhov nej tseem tsis tau mus txog hauv lub tebchaws uas tus TSWV, uas yog nej tus Vajtswv, yuav muab rau nej, uas yog qhov chaw nyabxeeb. 10Thaum nej hla dhau tus Dej Yauladees mus rau sab tid lawm, tus TSWV yuav muab lub tebchaws ntawd rau nej nyob ua nej tug. Nws yuav tsis pub kom nej cov yeebncuab ua phem tau rau nej, thiab nej yuav tau nyob kajsiab lug. 11Tus TSWV yuav xaiv ib thaj chaw cia ua qhov chaw rau nej mus pehawm Nws, thiab nej yuavtsum coj txhua yam uas kuv xaaj rau nej no tuaj fij rau tus TSWV: nej tej khoom hlawv fij theej txhoj thiab lwmyam khoom fij, nej tej ib feem kaum thiab tej uas nej txaussiab muab, tej khoom tshwjxeeb uas nej tau coglus rau tus TSWV.

12“Nej nrog rau nej tej pojniam menyuam, nej tej tubqhe, thiab cov Levis uas nrog nej nyob hauv nej tej moos, ciali zoosiab tabmeeg tus TSWV; ncontsoov tias cov Levis yuav tsis muaj av ua lawv tug. 13Nej tsis txhob coj nej tej khoom mus fij rau ntawm qhov chaw uas nej xaiv; 14tiamsis nej yuavtsum coj nej tej khoom fij mus rau ntawm qhov chaw uas tus TSWV yuav xaiv ntawm nej ib xeem li av. Qhov chaw ntawd thiajli yog lub chaw uas nej mus hlawv khoom fij thiab ua txhua yam uas kuv tau xaaj rau nej lawm.

15“Tiamsis tej tsiaj uas nej tua noj, nej nyob qhovtwg, nej tua noj rau qhov ntawd los tau. Nej yuav noj ntau npaum licas los tsuav yog tus TSWV pub rau nej muaj xwb. Txhua tus neeg, txawm yog huv thiab tsis huv los puavleej noj tau tej tsiaj ntawd, ib yam li nej noj tej nqaij kauv thiab nqaij muaslwj. 16Tiamsis nej tsis txhob noj cov tsiaj ntawd tej ntshav; nej yuavtsum muab hliv povtseg rau hauv av ib yam li hliv dej. #Chiv 9:4; Levi 7:26-27; 17:10-14; 19:16; 2Kev 15:23 17Tsis txhob nqa ib yam khoom twg uas nej muab fij rau tus TSWV lawm los noj hauv nej tej tsev: tsis hais tej ib feem kaum ntawm nej tej qoobloo, tej cawv txivhmab, tej roj txivntoo, lossis thawjtug menyuam nyuj thiab menyuam yaj, tej khoom uas nej coglus muab rau tus TSWV, tej khoom fij siabdawb lossis lwmyam khoom fij. 18Nej thiab nej tej menyuam, nej tej tubqhe thiab cov Levis uas nrog nej nyob hauv nej tej moos, tsuas noj tau tej khoom fij no tabmeeg tus TSWV uas yog nej tus Vajtswv, rau ntawm qhov chaw uas Nws tau xaiv tseg ua qhov chaw pehawm xwb. Nej ciali txaussiab rau txhua yam uas nej tau ua ntawd. 19Tiam twg uas nej tseem nyob hauv lub tebchaws ntawd, nej yuavtsum ncontsoov ceevfaj tsis txhob tso cov Levis tseg li.

20“Thaum tus TSWV uas yog nej tus Vajtswv, nthuav nej lub tebchaws kom dav ntxiv, rawsli Nws tau coglus tseg rau nej lawm, nej yuav tua nej tej tsiaj noj thaum twg los tau rawsli nej siab nyiam. 21Yog tias qhov chaw uas tus TSWV uas yog nej tus Vajtswv yuav xaiv ua chaw pehawm ntawd nyob deb nej heev, thaum twg uas nej xav tua tej nyuj thiab tej yaj uas tus TSWV pub rau nej muaj, nej ciali noj hauv nej tej tsev rawsli kuv qhia rau nej lawm los tau. 22Leejtwg los xij, tsis hais cov neeg huv thiab tsis huv los puavleej noj tau cov nqaij ntawd, ib yam li nej noj tej nqaij kauv thiab nqaij muaslwj. 23Tiamsis tsis txhob noj ntshav, rauqhov ntshav yog txojsia. Nej tsis txhob noj txojsia uake nrog cov nqaij. #Levi 17:10-14 24Nej yuavtsum tsis txhob noj ntshav, ciali muab hliv povtseg rau hauv av ib yam li hliv dej xwb. 25Yog nej ua rawsli nqe kevcai no, nej thiab nej cajces yuav vammeej thiab yuav ua rau tus TSWV txaussiab heev.

26“Ciali coj nej tej khoom fij thiab nej tej khoomplig uas nej coglus mus fij rau ntawm qhov chaw uas tus TSWV yuav xaiv ua chaw pehawm. 27Coj nej tej khoom fij uas yuav tau muab hlawv tagnrho rau saum tus TSWV lub thaj. Muab cov ntshav ntawm tej khoom fij uas nej nqa mus ntawd hliv rau saum lub thaj, tiamsis nej muaj cai noj tau tej nqaij. 28Nej yuav tau ua tibzoo coj thiab ua rawsli tej uas kuv tau xaaj rau nej lawm, kom nej thiab nej cajces thiaj tau txais kev vammeej mus ibtxhis, vim nej yuav ua qhov zoo thiab qhov uas haum tus TSWV uas yog nej tus Vajtswv, lub siab nyiam.

Txwv Tsis Pub Pe Mlom

29“Tus TSWV uas yog nej tus Vajtswv, yuav ua kom tej haivneeg uas nej tabtom yuav mus tua lawv lub tebchaws ntawd kom puastsuaj tag, nej yuav txeeb tau lub tebchaws ntawd thiab mus nyob rau hauv. 30Tomqab uas tus TSWV ua rau tej haivneeg ntawd puastsuaj tag lawm, nej yuavtsum ncontsoov tsis txhob mus coj li lawv txoj kev ntseeg, nyobtsam nej raug puastsuaj. Tsis txhob lam mus tshawb saib seb lawv pehawm lawv tej nyuag vajtswv licas, es nej yuav pehawm li ntawd thiab. 31Nej tsis txhob pehawm tus TSWV uas yog nej tus Vajtswv li lawv pehawm lawv tej nyuag vajtswv, rauqhov thaum lawv pehawm lawv tej nyuag vajtswv ntawd, lawv ua txhua yam qias vuabtsuab uas tus TSWV ntxub. Lawv tseem muab lawv tej menyuam tua hlawv fij rau saum lawv tej thaj thiab.

32“Nej yuavtsum ua txhua yam rawsli tej lus uas kuv xaaj rau nej lawm; tsis txhob ntxiv lossis rho ib yam dabtsi li. #2Kev 4:2; Tshwm 22:18-19

Currently Selected:

2 Kevcai 12: MWW2022

Highlight

Copy