Kaulauxais 1

1Kuv yog Paulus, uas yog Yexus Khetos ib tug timthawj rawsli Vajtswv tus dejsiab, thiab peb tus kwv Timautes nrog kuv xa lus nojqab nyobzoo tuaj rau nej.

2Kuv sau tsab ntawv no rau cov ntseeg Vajtswv hauv lub nroog Kaulauxais, uas yog peb cov phoojywg uas muab siab rau ntseeg Yexus Khetos.

Thov Vajtswv uas yog peb Leejtxiv pub txoj hmoovhlub thiab kev nyabxeeb rau nej.

Paulus Ua Vajtswv Tsaug

3Txhua zaus uas peb thov Vajtswv pab nej, peb yeej ncontsoov ua Vajtswv uas yog peb tus Tswv Yexus Khetos Leejtxiv tsaug, 4rauqhov peb twb hnov xov hais tias nej muab siab rau ntseeg Yexus Khetos thiab nej hlub txhua tus uas yog Vajtswv haivneeg. 5Thaum txojlus tseeb uas yog Txoj Moo Zoo xub-xub tuaj txog nej, nej yeej hnov tias Txoj Moo Zoo ntawd yuav pub tau txoj kev ciasiab rau nej. Yogli ntawd, nej txoj kev ntseeg thiab kev hlub thiaj nyob rau hauv txoj kev ciasiab uas Vajtswv muab khaws zoo-zoo tseg cia rau nej nyob rau saum ntuj ceebtsheej lawm.

6Txoj Moo Zoo ntawd tabtom tawgpaj txitxiv thiab lojhlob nthuav dav mus thoobplaws hauv qabntuj no, zoo ib yam li thaum uas Txoj Moo Zoo ntawd nyuamqhuav tuaj txog nej, ua rau nej hnov thiab totaub txog qhov tseeb ntawm Vajtswv txoj hmoovhlub. 7Qhov uas nej paub li ntawd, twb yog nej kawm los ntawm Epafas, uas yog ib tug nrog peb ua haujlwm thiab yog ib tug uas peb hlub. Nws yog ib tug uas muab siab rau ua Yexus Khetos tes haujlwm sawvcev ntawm peb.#1:7: peb; tej phau ntawv qub uas xuas tes sau, muaj nej. #Kaulx 4:12; Filem 23 8Nws kuj qhia rau peb txog txoj kev sibhlub uas Vaj Ntsujplig twb ua rau nej lawm.

9Vimli ntawd, txij hnub uas peb tau hnov txog nej, peb thiajli niajhnub thov Vajtswv pab nej tsis tu tsis so. Peb thov Vajtswv pab kom nej puvnpo txoj kev totaub txog nws tus dejsiab, thiab muaj tswvyim totaub txog txhua yam uas Vajtswv tus Ntsujplig qhia rau nej. 10Thaum ntawd nej thiaj yuav muaj peevxwm ua tau nej lub neej rawsli Vajtswv lub siab nyiam thiab thiaj yuav niajhnub ua tau tej uas Vajtswv txaussiab. Nej lub neej los yuav tawgpaj txitxiv rau txhua tes haujlwm zoo uas nej ua thiab nej yuav lojhlob rau txoj kev paub Vajtswv heev zujzus tuaj.

11Thov Vajtswv tus uas muaj hwjchim pub Nws lub zog rau nej kom nej muajzog heev ntxiv, kom nej thiaj yuav muaj cuabkav ua tau lub siabntev nyiaj taus txhua yam. 12Thiab zoosiab hlo ua Leejtxiv tsaug,#1:11-12: ua tau lub siabntev nyiaj taus txhua yam. Thiab zoosiab hlo ua Leejtxiv tsaug; lossis ua siabntev thiab zoosiab nyiaj taus txhua yam. Thiab uatsaug rau Leejtxiv. Nws yog tus uas ua rau nej muaj feem mus txais nej qhov koobhmoov uas Nws tau npaj tseg cia rau Nws haivneeg nyob hauv lub tebchaws uas kajnrig. 13Vajtswv twb tso peb dim ntawm lub hwjchim uas kav qhov tsausntuj thiab tau coj peb los nyob rau hauv lub tebchaws uas Nws tus Tub uas Nws hlub heev ua tus kav lawm. 14Tus Tub ntawd yog tus uas txhiv peb dim, uas yog zam peb lub txim. #Efex 1:7

Khetos Tuskheej Thiab Nws Tes Haujlwm

15Khetos yog tus hwvxyeej ntawm tus Vajtswv uas peb qhovmuag tsis pom. Nws yog Vajtswv thawjtug Tub Hlob uas loj tshaj ibpuas tsavyam uas Vajtswv tau tsim los lawm huv tibsi. 16Rauqhov Vajtswv tsim txhua yam los ntawm Nws los: tsis hais tej uas nyob saum nruabntug thiab tej uas nyob hauv ntiajteb no, tej uas qhovmuag pom tau thiab tej uas qhovmuag pom tsis tau, tej ntsujplig uas muaj hwjchim kav saum nruabntug, tej nomtswv, tej vajntxwv, thiab tej uas muaj hwjchim kav hauv ntiajteb. Txhua yam ntawd puavleej yog Vajtswv tsim los ntawm Yexus Khetos thiab Nws tsim tej ntawd los rau Yexus Khetos. 17Khetos twb yeej xub muaj nyob uantej txhua yam huv tibsi los lawm, thiab nyob rau hauv Nws, txhua yam nyias thiaj nyob muaj nyias chaw. 18Nws yog lub taubhau rau lub cev, lub cev ntawd yog pawg ntseeg; Nws yog lub hauvpaus uas ua rau lub cev ciajsia. Nws yog Vajtswv thawjtug Tub Hlob uas Vajtswv tsa sawv hauv qhovtuag rovqab los, kom Nws tibleeg thiaj yog tus uas loj dua txhua yam huv tibsi. #Efex 1:22-23 19Rauqhov Vajtswv yeej pomzoo cia Nws tus Tub muaj yamntxwv puvnpo ib yam li Nws, 20thiab Vajtswv pomzoo kom Nws tus Tub coj ibpuas tsavyam, xam tej uas nyob hauv qabntuj no thiab tej uas nyob saum nruabntug huvsi, rov los rau Vajtswv, uas yog los ntawm Nws tus Tub cov ntshav#1:20: Nws tus Tub cov ntshav; lossis nws tus Twb txoj kev tuag. saum tus ntoo khaublig. #Efex 2:16

21Yav tas los nej nyob deb ntawm Vajtswv thiab nej ua yeebncuab rau Vajtswv twb yog vim tej kev phem uas nej ua thiab nej xav. 22Tiamsis nimno, los ntawm qhov uas Nws tus Tub lub cev uas tau tuag txhiv nej, Vajtswv thiaj coj nej los ua Nws li phoojywg, kom nej yog neeg dawbhuv nyob rau ntawm Nws lub xubntiag, nej thiaj tsis muaj ib qho txhaum thiab tsis muaj chaw thuam tau. 23Vimli ntawd, nej yuavtsum muab siab rau ntseeg, cog cag kom tob thiab ruaj-khov, thiab tsis txhob cia ib yam dabtsi txeeb tau txoj kev ciasiab uas nej muaj thaum nej nyuamqhuav hnov Txoj Moo Zoo ntawd tawm ntawm nej mus. Txoj Moo Zoo no twb muaj neeg coj mus qhia rau txhua tus uas nyob hauv lub qabntuj no lawm. Kuv uas yog Paulus, txawm yog ib tug tubtxib uas qhia txog Txoj Moo Zoo no ntag.

Paulus Ua Haujlwm Li Tus Tubtxib Rau Pawg Ntseeg

24Nimno kuv zoosiab uas tau raug kev txomnyem pub rau nej, rauqhov los ntawm qhov uas kuv raug kev txomnyem ntawm sab nqaijtawv no ua rau kuv pab tau ib feem ntawm qhov uas Yexus Khetos raug kev txomnyem pub rau Nws lub cev, uas yog pawg ntseeg. 25Vajtswv yog tus tsa kuv ua ib tug tubtxib pab pawg ntseeg. Nws yog tus uas muab tes haujlwm no rau kuv ua, kom kuv thiaj pab tau nej. Tes haujlwm no yog qhov uas kom kuv qhia txhij qhia txhua txog nws Txojlus, 26uas nws twb muab zais cia tau ntau tiam los lawm, tsis pub rau leejtwg paub. Tiamsis nimno nws twb muab nthuav rau nws haivneeg paub lawm. 27Vajtswv lub homphiaj yog nws xav muab zaj uas nws twb muab zais cia lawm rho los qhia rau nws haivneeg paub. Zaj no yog ib zaj uas muajnqis heev thiab zoo kawg nkaus. Zaj uas muab zais cia lawm yog hais li no hais tias, Khetos twb nyob rau hauv nej lawm, yogli ntawd, nej yuav muaj feem koom nrog Vajtswv tus tshwjchim uas ci ntsa-iab.

28Vimli no, peb thiaj qhia txog Khetos rau txhua tus. Peb yeej siv tagnrho peb tej tswvyim uas zoo los ntuas thiab qhia txhua tus, kom peb thiaj yuav coj tau sawvdaws los rau ntawm Vajtswv lub xubntiag uas yog coj tau ib co uas ua tau lub neej khovkho nyob rau hauv Khetos. 29Vim qhov uas kuv xav kom tes haujlwm no tiav, kuv thiaj muab siab rau siv zog ua tiag-tiag, uas yog siv Khetos lub zog uas Nws pub rau kuv; lub zog ntawd tseem tabtom ua haujlwm hnyav nyob rau hauv kuv.

Currently Selected:

Kaulauxais 1: MWW2022

Highlight

Copy