Tes Haujlwm 8

1Xaulaus pomzoo lawv tua Xatefanus thiab.

Xaulaus Tsimtxom Cov Ntseeg

Txij hnub ntawd los pawg ntseeg hauv lub nroog Yeluxalees pib raug kev tsimtxom hnyav heev. Tagnrho cov ntseeg sawvdaws txawm khiav uasab uasua mus thoobplaws lub xeev Yudas thiab xeev Xamalis, tsuas tshuav cov timthawj lawm xwb. 2Muaj qeeleej txivneej uas hwm Vajtswv thiaj tuaj muab Xatefanus lub cev mus log, lawv quaj thiab hlub Xatefanus kawg li.

3Tiamsis Xaulaus nrhiav kev ua kom pawg ntseeg puastsuaj mus; nws mus hauv ib lub tsev rau ib lub tsev, nws muab cov ntseeg uas yog pojniam thiab txivneej cab mus kaw rau hauv tsev lojcuj. #Teshl 22:4-5; 26:9-11

Filiv Qhia Txoj Moo Zoo Hauv Xeev Xamalis

4Cov ntseeg uas khiav uasab uasua mus ntawd, lawv mus txog twg lawv kuj qhia Txoj Moo Zoo txog ntawd. 5Filiv mus rau hauv ib lub nroog loj#8:5: ib lub nroog loj; tej phau ntawv qub uas xuas tes sau, muaj ib lub nroog. uas nyob rau hauv xeev Xamalis, nws qhia hais txog tus Mexiyas rau cov neeg ntawd mloog. 6Thaum sawvdaws hnov Filiv qhia thiab pom tej txujci tseemceeb uas nws ua, lawv txawm ua tibzoo mloog nws qhia. 7Muaj ntau tus ntsujplig phem tau quaj qw nrov heev thiab tau tawm hauv ntau tus neeg mus lawm. Ntau tus neeg tuagtes tuagtaw thiab neeg cegtawv ciali zoo mob huv tibsi. 8Cov neeg uas nyob hauv lub nroog ntawd, sawvdaws zoosiab kawg li.

9Muaj ib tug txivneej hu ua Ximoos, nws nyob hauv lub nroog ntawd tau ntev los lawm thiab nws yog ib tug uas txawj ua khawvkoob. Nws txeev ua rau cov neeg Xamalis xav tsis thoob los ntawm qhov uas nws pheej khav hais tias nws yog ib tug neeg tseemceeb; 10ua rau tagnrho cov neeg uas nyob hauv lub nroog ntawd, suav txij tus hlob txog tus yau puavleej mloog nws tej lus. Lawv hais tias, “Tus txivneej no yog Vajtswv lub hwjchim uas hu ua ‘Lub Hwjchim Loj Kawg Nkaus.’ ” 11Lawv mloog nws lus heev, vim nws tej khawvkoob uas nws tau ua ntev los lawm.

12Tiamsis thaum lawv ntseeg Filiv tej lus qhia uas hais txog Vajtswv lub Tebchaws thiab hais txog Yexus Khetos, ces lawv sawvdaws, tsis hais pojniam lossis txivneej, txawm ua kevcai rausdej huv tibsi. 13Ximoos los kuj ciali los ntseeg Yexus lawm thiab. Thaum Ximoos ua kevcai rausdej tag lawm, nws txawm nrognraim Filiv thiab ciali xav tsis thoob txog tej txujci tseemceeb uas nws pom Filiv ua.

14Thaum cov timthawj uas nyob hauv lub nroog Yeluxalees hnov tias cov neeg Xamalis tau txais yuav Vajtswv Txojlus lawm, cov timthawj txawm txib Petus thiab Yauhas mus saib lawv. 15Thaum nkawd mus txog, nkawd thiaj thov Vajtswv rau lawv kom lawv tau txais Vaj Ntsujplig tus Dawbhuv. 16Rauqhov Vaj Ntsujplig tus Dawbhuv tseem tsis tau los nrog cov ntseeg ntawd ib tug twg nyob li, lawv tsuas yog tau ua kevcai rausdej hauv tus Tswv Yexus lub npe nkaus xwb. 17Yogli ntawd, Petus thiab Yauhas nkawd thiaj tsa tes rau lawv, ces lawv txhua tus txawm tau txais Vaj Ntsujplig tus Dawbhuv.

18Thaum ob tug timthawj tsa tes rau cov ntseeg ntawd, Ximoos pom tias lawv ciali tau txais Vaj Ntsujplig tus Dawbhuv, ces nws txawm muab nyiaj rau Petus thiab Yauhas nkawd, 19thiab hais rau nkawd tias, “Thov neb muab lub hwjchim no rau kuv thiab, kom thaum kuv tsa tes rau leejtwg, tus ntawd thiaj yuav tau Vaj Ntsujplig tus Dawbhuv.”

20Tiamsis Petus teb nws hais tias, “Thov kom koj cov nyiaj ciali nrog koj puastsuaj mus, rauqhov koj xav tias koj tseem yuav muab nyiaj yuav tau Vajtswv qhov khoomplig ntawd thiab! 21Koj yuav tsis muaj feem lossis yuav koom nrog peb ua tes haujlwm no tsis tau, rauqhov koj lub siab tsis ncaj rau Vajtswv. 22Ciali tso koj tej kev txhaum tseg thiab thov Vajtswv zam qhov uas koj lub siab ciali xav tau tej yam uas tsis zoo ntawd. 23Rauqhov kuv pom tias koj lub siab puvnpo txoj kev khib thiab txoj kev txhaum twb khi tau koj lawm.”

24Ximoos txawm hais rau Petus thiab Yauhas hais tias, “Thov neb thov Vajtswv rau kuv, kom kuv tsis txhob raug tej uas neb hais ntawd ib qho li.”

25Thaum Petus thiab Yauhas nkawd hais nkawd tej lus povthawj thiab qhia tus Tswv tej lus rau sawvdaws mloog tag lawm, nkawd txawm rovqab mus rau nram lub nroog Yeluxalees. Thaum nkawd taug kev mus, nkawd qhia Txoj Moo Zoo rau ntau lub zos uas nyob hauv xeev Xamalis.

Filiv Thiab Tus Nom Uas Yog Neeg Etiupias

26Tus Tswv ib tug timtswv los hais rau Filiv hais tias, “Koj ciali sawv thiab mus rau sab qabteb,#8:26: mus rau sab qabteb; lossis thaum tavsu. taug txojkev uas tuaj tom lub nroog Yeluxalees tuaj mus rau nram lub nroog Nkaxas.” (Nimno tsis muaj leejtwg mus txojkev ntawd lawm.)#8:26: Nimno tsis muaj leejtwg mus txojkev ntawd lawm; lossis Txojkev no yog kev mus tom tiaj suabpuam. 27Yogli ntawd, Filiv thiaj sawvkev mus. Thaum nws tabtom taug kev mus, nws ntsib ib tug nraugsam uas yog neeg Etiupias, thiab yog ib tug nom uas saib poj vajntxwv Kadakes uas kav tebchaws Etiupias lub txhab nyiaj. Tus nom ntawd tuaj mus pehawm Vajtswv hauv lub nroog Yeluxalees, 28thiab tabtom caij lub tsheb nees rov los tsev; thaum ntawd, nws tabtom nyeem Yaxayas, uas yog tus xibhwb cev Vajtswv lus phau ntawv.

29Vaj Ntsujplig tus Dawbhuv txawm hais rau Filiv hais tias, “Koj ciali mus kom ti-ti rau ntawm lub tsheb nees ntawd.” 30Filiv khiav ceevnrooj mus thiab nws hnov tus nom ntawd tabtom nyeem Yaxayas, uas yog tus xibhwb cev Vajtswv lus phau ntawv. Filiv nug hais tias, “Koj puas totaub txog zaj uas koj nyeem ko?”

31Nws teb tias, “Twb tsis muaj leejtwg pab txhais rau kuv, es kuv yuav ua licas totaub?” Nws txawm kom Filiv nce mus nrog nws zaum hauv lub tsheb nees. 32Vajtswv Txojlus uas tus nom ntawd tabtom nyeem yog hais li no:

“Lawv coj Nws mus ib yam li coj tus yaj mus tua,

zoo ib yam li tus menyuam yaj uas nyob twjywm rau luag txiav nws cov plaub.

Nws tsis qhib ncauj hais ib los li. #Yaxaya 53:7-8 (LXX)

33Lawv ua saib tsis taus Nws thiab txiavtxim tsis ncaj rau Nws.

Tsis muaj leejtwg yuav taug tau Nws li cajces,

rauqhov Nws txojsia twb raug muab rho tawm hauv lub ntiajteb no mus lawm.”

34Tus nom ntawd nug Filiv hais tias, “Thov koj qhia rau kuv seb, tus uas tus xibhwb cev Vajtswv lus hais no, yog hais txog leejtwg? Nws hais txog nws tuskheej lossis nws hais txog lwmtus?” 35Filiv txawm pib ntawm nqe uas tus nom ntawd tabtom nyeem, uas yog qhia txog Txoj Moo Zoo hais txog Yexus rau tus nom ntawd mloog. 36Thaum nkawd caij tsheb nees mus txog ntawm ib qhov chaw uas muaj dej; tus nom ntawd txawm hais rau Filiv hais tias, “Ntawm no twb muaj dej lawm, kuv ua kevcai rausdej puas tau maj?” 37#8:37: Tej phau ntawv qub uas xuas tes sau, ntxiv nqe 37 no rau: Filiv hais rau nws hais tias, “Yog koj ntseeg tiag-tiag, ces koj yeej ua kevcai rausdej tau kawg.” Nws teb tias, “Kuv ntseeg tias Yexus Khetos yog Vajtswv tus Tub.”

38Tus nraugsam ntawd txawm cheem lub tsheb nees kom nres, ces nkawd txawm nqis mus rau hauv dej, thiab Filiv muab nws ua kevcai rausdej. 39Thaum nkawd tawm hauv dej los, tus Tswv tus Ntsujplig txawm coj Filiv mus rau lwmqhov lawm. Tus yawg ntawd tsis pom Filiv ntxiv li lawm, tiamsis nws txawm caij tsheb nees mus tsev thiab zoosiab kawg li. 40Muaj neeg pom Filiv nyob pem lub nroog Axautus; thaum nws mus rau pem lub nroog Xixaleyas, nws qhia Txoj Moo Zoo thoobplaws tej nroog uas nyob rau ib cheebtsam ntawd.

Currently Selected:

Tes Haujlwm 8: MWW2022

Highlight

Copy